Read KO E TOH TAPU KATOA TONGA KAU FAKAMAAU 1 Bible Online

KAU FAKAMAAU 1 - KO E TOH TAPU KATOA TONGA bible

KAU FAKAMAAU 1

¹PEA hili ‘a e pekia ‘a Siosiua, na‘e fakafehu‘i ‘e ha‘a ‘Isileli kia Sihova, ‘o pehē, Ko hai ‘e fuofua ‘alu hake ma‘amautolu ki ha‘a Kēnani ke fai tau ki ai?

²Pea folofola ‘a Sihova, Ko Siuta ‘e ‘alu: vakai, kuo u tuku ‘a e fonua ki hono nima.

³Pea lea ‘a Siuta kia Simione ko hono tokoua, ‘Alu hake ke tau ō mo au ki hoku tofi‘a, ke tau tau‘i ‘a ha‘a Kēnani: pea te u ‘alu foki mo au, ‘o kau mo koe ‘i ho tofi‘a.

⁴Pea na‘e ō mo ia ‘a Simione. Pea ‘alu hake ‘a ha‘a Siuta, pea na‘e tuku ki honau nima ‘e Sihova ‘a ha‘a Kēnani mo ha‘a Pēlisi: pea na‘a nau taa‘i kinautolu ‘i Pīseki, ‘o tō ai ha toko taha mano.

⁵Pea na‘a nau ‘ilo ‘i Pīseki ‘a ‘Ātonai-Pīseki, ‘o nau fai tau mo ia; pea nau taa‘i ‘a ha‘a Kēnani mo ha‘a Pēlisi.

⁶Ka ka hola ‘a ‘Ātonai-Pīseki; ka na‘a nau tuli kiate ia, ‘o nau ma‘u, ‘o nau tu‘usi hono ongo motu‘a nima mo hono ongo motu‘a va‘e.

⁷Pea pehē ‘e ‘Ātonai-Pīseki, Ko e tu‘i ‘e toko fitungofulu na‘e tufi ‘i hoku lalo tēpile, kuo tu‘usi honau motu‘a nima mo e motu‘a va‘e: hangē ko ‘eku fai, kuo pehē ‘a e totongi ‘a e ‘Otua kiate au. Pea na‘a nau ‘ave ia ki Selusalema, ‘o ne pekia ai.

⁸Pea tau‘i ‘e ha‘a Siuta ‘a Selusalema, ‘o nau kapa ia, ‘o nau tā ‘aki ‘a e mata ‘o e heletā, pea nau tuku ‘a e kolo ke fakamomofi.

⁹Pea hili ia na‘e ‘alu hifo ‘a ha‘a Siuta ke tau‘i ‘a ha‘a Kēnani na‘e nofo ‘i he fonua mo‘unga, mo e feitu‘u ko Tonga, mo e Sēfela‘a.

¹⁰Pea fai ‘e Siuta ki ha‘a Kēnani na‘e nofo ‘i Hepeloni: (pea ko e hingoa ‘o Hepeloni ‘i mu‘a ko Kiliati-A‘apa) pea na‘a nau taa‘i ‘i Sesai, mo ‘Ahimani, mo Talimai.

¹¹Pea na‘a ne ‘alu atu mei ai ki he kakai ‘o Tēpili. (Pea ko e hingoa mu‘a ‘o Tēpili ko Kiliati-sefa.)

¹²Pea pehē ‘e Kēlepi, Ko ia te ne taa‘i ‘a Kiliati-sefa, ‘o kapa ia, te u ‘atu ki ai hoku ‘ōfefine ko ‘Ākesa ke na nonofo.

¹³Pea kapa ia ‘e ‘Ōtenili, ko e foha ‘o Kēnasi ko e tehina ‘o Kēlepi: pea na‘a ne ‘ange kiate ia ‘a hono ‘ōfefine ko ‘Ākesa moono uaifi.

¹⁴Pea ‘i he ha‘u kiate ia ‘a e fefine, na‘a ne[1] o‘i ia ke kole mei he‘ene tamai ha vao. Ko ia na‘e puna hifo ‘a e fefine mei he‘ene ‘asi; pea lea kiate ia ‘a Kēlepi ‘o pehē, Ko e hā ‘au?

¹⁵Pea tali ‘e ia, ‘Omi haku tāpuaki; kuo ke tuku au ‘i ha fonua Tonga; ke ke foaki mai foki ha matavai. Pea na‘e ange kiate ia ‘e Kēlepi ‘a e ngaahi matavai ‘olunga mo lalo.

¹⁶Pea ko e hako ‘o Keini, ko e kāinga mali ‘o Mōsese, na‘a nau ‘alu hake mo ha‘a Siuta mei he Kolo-paame ki he toafa ‘o Siuta, ‘a ia ‘oku tu‘u ‘i he potu tonga ‘o ‘Ālati; pea na‘a nau ‘alu ‘o nonofo mo e kakai.[2]

¹⁷Pea ō ‘a Siuta mo Simione ko hono tokoua, pea na‘a nau taa‘i ‘a e kau Kēnani na‘e nofo ‘i Sīfati, ‘o nau faka‘auha ia. Pea na‘e fakahingoa ‘a e kolo ko Hoama (ko Faka‘auha).

¹⁸Na‘e kapa foki ‘e Siuta ‘a Kesa mo hono feitu‘u,[3] pea mo ‘Asikeloni mo hono feitu‘u, pea mo ‘Ekiloni mo hono feitu‘u.

¹⁹Pea kau ‘a e ‘Eiki mo Siuta; pea na‘a ne kapusi ‘a e kakai ‘o e fonua mo‘unga; ka na‘e ‘ikai te ne lava ke kapusi ‘a e nofo ‘i lalo, he na‘e ai ha‘anau sāliote ukamea.

²⁰Pea na‘a nau tuku ‘a Hepeloni kia Kēlepi, ‘o hangē ko e me‘a ‘a Mōsese: pea na‘a ne kapusi mei ai ‘a e foha ‘e toko tolu ‘o ‘Ānaki.

²¹Pea ko ha‘a Siepusi na‘e nofo ‘i Selusalema, na‘e ‘ikai kapusi kinautolu ‘e ha‘a Penisimani; ka ‘oku nonofo ‘a ha‘a Siepusi mo ha‘a Penisimani ‘i Selusalema ‘o a‘u ki he ‘aho ni.

²²Pea ko e fale ‘o Siosifa na‘e ‘alu hake kinautolu foki ki Pēteli, pea na‘e kau mo kinautolu ‘a e ‘Eiki.

²³Pea na‘e fekau atu ‘e he fale ‘o Siosifa ha asiasi ki Pēteli. (Pea ko e hingoa mu‘a ‘o e kolo ko Lusa.)

²⁴Pea na‘e vakai ‘e he asiasi ha tangata ‘oku ne hū mai mei he kolo, pea nau pehē kiate ia, Fakahā mai mu‘a ‘a e hū‘anga ki he kolo, pea te mau fai ‘ofa kiate koe.

²⁵Pea ne faka‘ilo kiate kinautolu ‘a e hū‘anga ki he kolo, pea na‘a nau taa‘i ‘a e kolo ‘aki ‘a e mata ‘o e heletā; ka na‘e tukuange pē ‘a e tangata mo hono fāmili kātoa.

²⁶Pea ‘alu ‘a e tangata ia ki he fonua ‘o ha‘a Heti, ‘o ne langa ai ha kolo, ‘o ne fakahingoa ko Lusa; pea ko hono hingoa ia ‘o a‘u ki he ‘aho ni.

²⁷Pea na‘e ‘ikai kapusi ‘e Manase ‘a e kakai ‘o Pete-sani mo e ngaahi kolo na‘e fakaongo kiate ia, pe ko Ta‘anaka mo hono ngaahi kolo, pe ko e kakai ‘o Toa mo hono ngaahi kolo, pe ko e kakai ‘Ipileami mo hono ngaahi kolo, pe ko e kakai Mekito mo hono ngaahi kolo: he na‘e pau ‘a ha‘a Kēnani ke nofo ‘i he fonua.

²⁸Pea ‘i he hoko ‘o kaukaua ‘a ‘Isileli, na‘a nau fakafatongia‘i ‘a ha‘a Kēnani, ka na‘e ‘ikai te nau kapusi ‘aupito.

²⁹Ko ‘Ifalemi foki na‘e ‘ikai te nau kapusi ‘a e kau Kēnani na‘e nofo ‘i Kēseli; ka ka nonofo ai pē mo kinautolu ‘a ha‘a Kēnani ‘i Kēseli.

³⁰Ko Sepulone na‘e ‘ikai te ne kapusi ‘a e kakai ‘o Kitaloni, pe ko e kakai ‘o Nahaloli; ka na‘e nonofo mo kinautolu ‘a ha‘a Kēnani, ‘o tali fatongia.

³¹Ko ‘Āseli na‘e ‘ikai te nau kapusi ‘a e kakai ‘o Ako, mo Saitoni, mo ‘Akilapi, mo ‘Akisipi, mo Hēlipa, mo ‘Āfiki, mo Lēhopi;

³²ka ‘oku nonofo ‘a e kau ‘Āseli mo ha‘a Kēnani, ‘a e kainanga ‘o e fonua: he na‘e ‘ikai te nau kapusi kinautolu.

³³Ko Nafitalai na‘e ‘ikai te nau kapusi ‘a e kakai ‘o Pete-semesi, pe ko e kakai ‘o Pete-‘ānati; ka na‘a ne nofo ‘i he lotolotonga ‘o ha‘a Kēnani, ko e kainanga, ‘o e fonua: ka ko e kakai ‘o Pete-sēmesi mo Pete-‘ānati na‘a nau tali fatongia kiate kinautolu.

³⁴Pea na‘e loki ‘e ha‘a ‘Āmoli ‘a ha‘a Tani ki he mo‘unga; he na‘e ‘ikai te nau tuku kinautolu ke ‘alu hifo ki he fonua ‘i lalo;

³⁵pea na‘e pau ‘a ha‘a ‘Āmoli ke nofo ‘i he mo‘unga ko Hēlesi, mo ‘Esialoni, pea mo Sa‘alipimi: ka na‘e mamafa ‘a e nima ‘o e fale ‘o Siosifa, ko ia na‘a nau tali fatongia.

³⁶Pea ko e ngata‘anga ‘o ha‘a ‘Āmoli[4] na‘e fai mei he Hakenga ‘o ‘Akelapimi, pea mei he Makatu‘u ‘o fai hake.