Read KO E TOH TAPU KATOA TONGA KAU FAKAMAAU 12 Bible Online

KAU FAKAMAAU 12 - KO E TOH TAPU KATOA TONGA bible

KAU FAKAMAAU 12

¹PEA fakataha ‘a e kau tangata ‘Ifalemi, ‘o nau a‘a atu ki Sāfoni, pea na‘a nau pehē kia Sēfita, Ko e hā na‘a ke ‘alu atu ai ke fai tau mo ha‘a ‘Āmoni, ‘o ‘ikai te ke fakahā mai ke tau ō mo koe? Te mau tutu koe mo ho fale ‘aki ‘a e afi.

²Pea tali ‘e Sēfita kiate kinautolu, Ko au mo hoku kakai na‘a mau mo‘ua ‘i he fu‘u fekuki mo ha‘a ‘Āmoni; pea na‘a ku tautapa kiate kimoutolu, ka na‘e ‘ikai te mou taukapo‘i au meiate kinautolu.

³Pea ‘i he‘eku vakai ‘oku ‘ikai ha tokoni meiate koe, na‘a ku tuku li‘aki ‘eku mo‘ui, pea u ‘alu atu ke fai mo ha‘a ‘Āmoni, pea na‘e tuku kinautolu ‘e Sihova ki hoku nima: ko ia ko e hā kuo mou ‘ohofia ai au he ‘aho ni ke fai tau kiate au?

⁴Pea tānaki ‘e Sēfita ‘a e kakai Kiliati, ‘o ne tau‘i ‘a ‘Ifalemi: pea ko e kakai Kiliati na‘a nau taa‘i ‘a ‘Ifalemi; he na‘a nau pehē, Ko e kau ‘Ifalemi kimoutolu kuo hola (ko Kiliati ‘oku ‘i he vaha‘a ‘o ‘Ifalemi mo Manase).

⁵He na‘e hala tutu‘u ‘a Kiliati ki he kakai ‘Ifalemi, ‘o nau ma‘u ‘a e a‘a‘anga ‘o Soatani: pea ka faifai pea lea ange ‘e he kau ‘Ifalemi kuo hola, Ka u a‘a atu mu‘a; pea tali ange ‘e he kau Kiliati, Ko e ‘Ifalemi koe? Pea ka tali ‘e ia, ‘Ikai; pea te nau pehē ki ai, Lea mai ‘o pehē, Si‘ipoleti.

⁶Ka te ne pehē Sipoleti: he na‘e ‘ikai te ne lava ke fai hangē ko ia pea te nau toki puke ia, ‘o fakapoongi ‘i he ngaahi a‘a‘anga ‘o Soatani; pea ko e kakai ‘Ifalemi na‘e tō ‘i he taimi ko ia ko e toko fā mano mo e toko ua afe.

⁷Pea na‘e fai fakamaau ‘i ‘Isileli ‘a Sēfita, ‘o ono ta‘u; pea pekia ‘a Sēfita ko e tangata Kiliati, pea na‘e telio ‘i ha taha ‘o e ngaahi kolo Kiliati.

⁸Pea hili ia na‘e fai fakamaau ‘i ‘Isileli ‘a ‘Ipisani mei Pētelihema.

⁹Pea na‘a ne ma‘u ha foha ‘e toko tolungofulu, pea ai mo hono ngaahi ‘ōfefine ‘e toko tolungofulu, ‘a ia na‘a ne tuku atu ki he mama‘o, ‘o ne ‘omi mei he mama‘o ha kau ta‘ahine ‘e toko tolungofulu ke nonofo mo hono ngaahi foha.

¹⁰Pea fai fakamaau ‘e ia ‘i ‘Isileli ‘o fitu ta‘u. Pea pekia ‘a ‘Ipisani, pea na‘e telio ia ‘i Pētelihema.

¹¹Pea hili ia pea fai fakamaau ‘i ‘Isileli ‘a ‘Eiloni ko e tangata Sepulone; pea na‘e hongofulu ta‘u ‘ene fai fakamaau ‘i ‘Isileli,

¹²pea pekia ‘a ‘Eiloni ko e tangata Sepulone, pea na‘e telio ia ‘i ‘Esialoni ‘i he fonua ‘o Sepulone.

¹³Pea hili ia na‘e fai fakamaau ‘i ‘Isileli ‘a ‘Apitoni ko e foha ‘o Hīleli ko e tangata Pilatoni.

¹⁴Pea na‘a ne ma‘u ha ngaahi foha ‘e toko fāngofulu, mo e makapuna ‘e toko tolungofulu, ‘a ia na‘a nau heka ki ha fitungofulu‘i ‘asi mui: pea na‘a ne fai fakamaau ‘i ‘Isileli ‘o valu ta‘u.

¹⁵Pea pekia ‘a ‘Apitoni, ko e foha ‘o Hīleli, ko e tangata Pilatoni, pea na‘e telio ia ‘i Pilatoni ‘i he fonua ‘o ‘Ifalemi ‘i he mo‘unga ‘o ha‘a ‘Amaleki.