Read KO E TOH TAPU KATOA TONGA KAU FAKAMAAU 13 Bible Online

KAU FAKAMAAU 13 - KO E TOH TAPU KATOA TONGA bible

KAU FAKAMAAU 13

¹PEA toe fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova; pea tuku kinautolu ‘e Sihova ki he nima ‘o e kau Filisitia, ‘o fāngofulu ta‘u.

²Pea na‘e ai ha tangata mei Sola, na‘e kau ki he fāmili ‘o ha‘a Tani, pea ko hono hingoa ko Mānoa; pea ko hono uaifi na‘e pa‘a ‘o ‘ikai te ne fanau.

³Pea hā ‘a e ‘Āngelo ‘a Sihova ki he fefine, ‘o ne me‘a ki ai, Sī ni, ko eni kuo ke pa‘a, ‘o ‘ikai te ke fanau: ka te ke feitama, pea te ke fā‘ele‘i ha tama tangata.

⁴Pea ko ia ke ke faka‘ehi‘ehi mu‘a, ‘o ‘oua te ke inu uaine, pe ha kava mālohi, pea ‘oua te ke kai ha me‘a ‘oku tapu;

⁵he, vakai, te ke feitama, ‘o ke fā‘ele‘i ha tama tangata, pea ‘e ‘ikai apo ha tele ki hono ‘ulu: he ko e tamasi‘i te ne nofo ko e nāsili[28] kia Sihova mei hono fanau‘i: pea ko ia ia te ne kamata ke fakahaofi ‘a ‘Isileli mei ke kau Filisitia.

⁶Pea ‘alu ‘a e fefine, ‘o tala ki hono husepāniti, ‘o pehē, Na‘e ha‘u kiate au ha tangata ‘o ‘Elohimi, pea ko hono fōtunga na‘e hangē koe fōtunga ‘o e ‘Āngelo[29] ‘a ‘Elohimi, ‘o fakailifia faufau; pea na‘e ‘ikai te u fehu‘i pe ko e toko taha mei fē, pea na‘e ‘ikai te ne tala kiate au hono hingoa.

⁷Ka na‘a ne pehē kiate au, Sī ni, te ke feitama, pea te ke fā‘ele‘i ha tama tangata; pea ko eni, ‘oua te ke inu ha uaine, pe ha kava mālohi, pea ‘oua te ke kai ha me‘a ‘oku tapu; he ko e tama te ne nofo ko e nāsili ki he ‘Otua mei hono fanau‘i, ‘o a‘u ki he‘ene pekia.

⁸Pea lotu ‘a Mānoa ki he ‘Eiki, ‘o pehē, ‘Ātonai ē, tuku ke toe ha‘u kiate kimaua ‘a e tangata ‘o ‘Elohimi ‘a ia na‘a ke fekau mai, ke hīnoi‘i kimaua ‘i ha me‘a te ma fai ki he tama ‘e fā‘ele‘i.

⁹Pea tali ‘e ‘Elohimi ‘a e lea ‘a Mānoa; pea na‘e toe ha‘u ‘a e ‘Āngelo ‘a ‘Elohimi ki he fefine, ‘oku ne nofo ‘i he vao: ka na‘e ‘ikai ‘iate ia ‘a Mānoa ko hono husepāniti.

¹⁰Pea fakavave ‘a e fefine, ‘o ne lele ‘o tala ki hono husepāniti, ‘o ne pehē ki ai, ‘eni, kuo hā kiate au ‘a e tangata na‘e ha‘u he ‘aho.

¹¹Pea tu‘u ‘a Mānoa, ‘o ne muimui ki hono uaifi, ‘o ne a‘u ki he tangata, ‘o ne pehē ki ai, Ko koe ‘a e tangata na‘e lea ki he fefine?

¹²Pea ne pehē, Ko au. Pea pehē ‘e Mānoa, ‘Ofa ke hoko mai ho‘o lea: ko e hā ‘a e tu‘utu‘uni ki he tamasi‘i, mo ‘ene ngāue?

¹³Pea folofola ‘a e ‘Āngelo ‘a Sihova kia Mānoa, Ko e me‘a kotoa na‘a ku fakahā ki he fefine, ke ne faka‘ehi‘ehi mei ai.

¹⁴‘Oku tapu kotoa ‘a e me‘a ‘oku tupu mei he vaine ha‘ane kai ai, pea ‘e ‘ikai te ne inu uaine pe ha kava mālohi; pea ‘ilonga ha me‘a ‘oku tapu pea ‘e ‘ikai te ne kai: ko e me‘a kotoa na‘a ku tu‘utu‘uni te ne fai ki ai.

¹⁵Pea lea ‘a Mānoa ki he ‘Āngelo ‘a Sihova, ‘o pehē, Ke ma ta‘ofi mu‘a koe, kae‘oua ke ma ngaohi atu ha ki‘i kosi.

¹⁶Pea folofola ‘a e ‘Āngelo ‘a Sihova kia Mānoa, Neongo ha‘o ta‘ofi au, ka ‘e ‘ikai te u tokoni ‘aki ho‘o me‘akai; pea kapau ko ho‘o teu ha feilaulau, te ke ‘atu ia kia Sihova. He na‘e ‘ikai ‘ilo ‘e Mānoa ko ha ‘āngelo ‘a Sihova ia.

¹⁷Pea lea ‘a Mānoa ki he ‘Āngelo ‘a Sihova, Ko hai ho hingoa? Koe‘uhi ‘oka hoko ho‘o ngaahi lea, pea mau fakahīkihiki koe.

¹⁸Pea folofola ki ai ‘a e ‘Āngelo ‘a Sihova, Ko e hā ‘oku ke ‘eke ai ki hoku hingoa, he ‘oku fakaofo ia?[30]

¹⁹Pea to‘o ‘e Mānoa ‘a e ki‘i kosi mo e feilaulau me‘akai, ‘o ne ‘oatu ia ‘i he funga makatu‘u kia Sihova: pea na‘e fakaofo ‘ene fai: pea ko Mānoa mo hono uaifi na‘a na tu‘u ‘o sio.[31]

²⁰He ‘i he ‘iloange na‘e ‘alu hake ‘a e ulo ‘i he ‘ōlita ki langi, na‘e hā‘ele hake ‘a e ‘Āngelo ‘a Sihova ‘i he ulo ‘o e ‘ōlita; pea ko Mānoa mo hono uaifi na‘a na tu‘u ‘o sio, ‘o na tō fo‘ohifo ki he kelekele.

²¹Pea na‘e ‘ikai ke toe hā ‘a e ‘Āngelo ‘a Sihova kia Mānoa, pe ki hono uaifi. Na‘e toki ‘ilo ‘e Mānoa ko e ‘Āngelo ‘a Sihova ia.

²²Pea pehē ‘e Mānoa ki hono uaifi, Kuo pau te ta mate, he kuo ta sio ki he ‘Otua.

²³Ka ka tali ‘e hono uaifi, Ka ne ko e finangalo ‘o e ‘Eiki ke tāmate‘i kitaua, ‘e ‘ikai te ne tali ‘eta feilaulau mo e me‘akai, pea ‘e ‘ikai te ne fakahā mai ‘a e ngaahi fu‘u me‘a ko ē, pea ‘e ‘ikai te ne ongoongoa ha ngaahi me‘a pehē ‘i onopooni.

²⁴Pea fā‘ele‘i ‘e he fefine ha tama tangata, ‘o ne fakahingoa ko Samisoni: pea na‘e tupu ‘a e tamasi‘i, pea na‘e tāpuaki‘i ia ‘e he ‘Eiki.

²⁵Pea kamata ‘e he Laumālie ‘o Sihova ke o‘i ia ‘i ‘Apitanga-Tani, ‘i he vaha‘a ‘o Sola mo ‘Esitaoli.