Read KO E TOH TAPU KATOA TONGA KAU FAKAMAAU 14 Bible Online

KAU FAKAMAAU 14 - KO E TOH TAPU KATOA TONGA bible

KAU FAKAMAAU 14

¹PEA ‘alu hifo ‘a Samisoni ki Tīmina, ‘o ne mamata ai ki ha fefine, ko e ta‘ahine Filisitia.

²Pea ne ‘alu hake, ‘o ne fakahā ki he‘ene tamai mo ‘ene fa‘ē, ‘o pehē, Kuo u mamata ki ha fefine ‘i Tīmina ko ha ta‘ahine Filisitia; pea ko eni, ke ke ma‘u mai ai mooku uaifi.

³Pea lea kiate ia ‘e he‘ene tamai mo ‘ene fa‘ē, ‘Oku ‘ikai koā ha fefine ‘i he ngaahi ‘ōfefine ‘o ho kāinga, pe ‘i hoku kakai kātoa, ‘oku ke ‘alu ai ke ma‘u hao uaifi mei he kau Filisitia ta‘ekamu na? Ka ka tali ‘e Samisoni ki he‘ene tamai, Ke ke ma‘u mai ‘a e fefine mo‘oku, he ‘oku ou matamatalelei‘ia ai.

⁴He na‘e ‘ikai ‘ilo ‘e he‘ene tamai pe ko ‘ene fa‘ē, ko e me‘a mei he ‘Eiki ia, he‘ene kumi hano ava ke fai mo e kau Filisitia; he ko e taimi ko ia ko e kau Filisitia na‘e pule ki ‘Isileli.

⁵Pea ‘alu hifo ‘a Samisoni mo ‘ene tamai pea mo ‘ene fa‘ē ki Tīmina; pea ‘i he‘enau a‘u ki he ngaahi ngoue vaine ‘o Tīmina, ‘iloange na‘e kālou mai ha laione mui, mo fakafetaulaki kiate ia.

⁶Pea ‘ohofia ia ‘e he Laumālie ‘o e ‘Eiki, pea ne hae ia ‘o hangē ko ‘ene hae ha ki‘i kosi; ka na‘e ‘ikai ha me‘a ‘i hono nima: pea na‘e ‘ikai te ne tala ki he‘ene tamai pe ko ‘ene fa‘ē ‘a e me‘a kuo ne fai.

⁷Pea ‘alu hifo ia, ‘o afea mo e fefine;

⁸pea lelei‘ia ‘a Samisoni ‘iate ia. Pea faifai pea ne foki ke ‘omai ‘a e fefine, ‘o ne afe ke vakai ‘a e ‘anga‘anga ‘o e laione: pea tā na‘e ‘i ai ha fuifui pī ‘i he kete ‘o e laione, mo ha honi foki.

⁹Pea ne paki‘i, ‘o to‘o, ‘o ne ‘alu ai pē mo kai, ‘o ne a‘u ki he‘ene tamai mo ‘ene fa‘ē, ‘o ne ‘ange kiate kinaua, ‘o na kai: ka na‘e ‘ikai te ne tala kiate kinaua ko e kete ‘o e laione kuo ne to‘o mei ai ‘a e honi.

¹⁰Pea ‘alu hifo ‘ene tamai ki he fefine: pea fai ai ‘e Samisoni ha kātoanga; he ko e anga ia ‘o e fai ‘a talavou.

¹¹Pea ‘i he‘enau fe‘iloaki mo ia, na‘a nau ‘omi ha kāinga ‘e toko tolungofulu ke nonofo mo ia.

¹²Pea pehē ‘e Samisoni kiate kinautolu, Ka u ‘ai atu mu‘a ha tupu‘a kiate kimoutolu: kapau te mou lava ke tala ia kiate au lolotonga ‘a e fitu‘i ‘aho ‘o e kātoanga, ‘o mou mate‘i ia, pea te u ‘atu kiate kimoutolu ha sote ‘e tolungofulu, pea mo ha tangata — kotoa ‘e tolungofulu:

¹³pea kapau ‘e ‘ikai te mou lava ke mate‘i ia, te mou ‘omi kiate au ha sote ‘e tolungofulu, pea mo ha tangata — kotoa ‘e tolungofulu. Pea nau pehē, Fokotu‘u mai ho‘o tupu‘a, ke mau fanongo ki ai.

¹⁴Pea ne pehē kiate kinautolu, Na‘e tupu ha me‘akai mei he u‘akai, Pea na‘e tupu ha melie mei he mālohi. Pea na‘e ‘osi ha ‘aho ‘e tolu mo e ‘ikai te nau lava ke mate‘i ‘a e tupu‘a.

¹⁵Pea ko ia ‘i hono fā ‘o e ‘aho[32] na‘a nau pehē ki he uaifi ‘o Samisoni, Ke ke tauhele‘i ho husepāniti ke ne vete mai ‘a e tupu‘a, na‘a mau tutu koe mo ho fale ‘aki ‘a e afi.[33] Kuo mou tala kātoanga koā kiate kimautolu ke fa‘ao ‘emau koloa?

¹⁶‘Ikai ko ia? Pea tangi fakafiu ‘a e uaifi ‘o Samisoni kiate ia, ‘o ne pehē, Uī! ‘oku ke fehi‘a kiate au; ‘oku ‘ikai te ke ‘ofa mai: kuo ke fokotu‘u ha tupu‘a ki he fānau ‘a hoku kakai, pea kuo ‘ikai te ke tala kiate au. Pea ne pehē ki he fefine; Vakai, na‘a mo ‘eku tamai mo ‘eku fa‘ē kuo ‘ikai te u tala ki ai, pea te u tala koā kiate koe?

¹⁷Pea na‘a ne tangi fakafiu kiate ia ‘i he fitu‘i ‘aho, ‘a ia na‘e fai ai ‘ena kātoanga; pea ko ia ‘i he hoko ‘a hono fitu ‘o e ‘aho, na‘a ne tala kiate ia, he na‘a ne fakafiu‘i ia: pea tala ‘e he fefine ‘a e tupu‘a ki he fānau ‘a hono kakai.

¹⁸Pea lea kiate ia ‘a e kakai ‘o e kolo ‘i hono fitu ‘o e ‘aho, ‘i he te‘eki ke tō ‘a e la‘ā,[34] ‘o pehē, Ko e hā ‘oku melie ange ‘i he honi, pea ko e hā ‘oku mālohi ‘i he laione? Pea pehē ‘e ia kiate kinautolu, Ka ne ta‘e‘oua ho‘omou keli ‘aki ‘eku kau na, ‘E ‘ikai te mou mate‘i ‘eku tupu‘a.

¹⁹Pea ‘ohofia ia ‘e he Laumālie ‘o Sihova, ‘o ne ‘alu hifo ki ‘Asikeloni, ‘o ne taa‘i honau tu‘unga tangata ‘e toko tolungofulu, ‘o ne vete honau kofu, ‘o ne ‘ange ‘a e ngaahi tangata — kotoa kiate kinautolu kuo nau fakahā ‘a e tupu‘a. Pea na‘e puke hono ‘ita, ‘o ne ‘alu hake ki he fale ‘o ‘ene tamai.

²⁰Ka na‘e ‘ange ‘a e uaifi ‘o Samisoni ki hono takaua ‘a ia kuo ne kaume‘a ‘aki.