Read KO E TOH TAPU KATOA TONGA KAU FAKAMAAU 15 Bible Online

KAU FAKAMAAU 15 - KO E TOH TAPU KATOA TONGA bible

KAU FAKAMAAU 15

¹PEA fuoloa atu, lolotonga ‘a e ututa‘u uite, na‘e ‘a‘ahi ‘a Samisoni ki hono uaifi ‘aki ha ki‘i kosi; ‘o ne pehē, Ka u ‘alu atu mu‘a ki hoku uaifi ki he loki. Ka ka ‘ikai tuku ‘e he tamai ‘a e fefine ke ne ‘alu kiate ia.

²He na‘e pehē ‘e he motu‘a; Na‘a ku mātu‘aki lau kuo ke fehi‘a kiate ia, pea u ‘ange ki ho takaua: vakai, ‘ikai ‘oku faka‘ofo‘ofa ange hono tehina ‘iate ia? ke ke ma‘u mu‘a ia moono fetongi.

³Pea pehē ‘e Samisoni kiate kinautolu, Te u toki tonuhekina eni mei he kau Filisitia, ‘oka u ka fai ha kovi kiate kinautolu.

⁴Pea ‘alu ‘a Samisoni, ‘o ne pō ha fanga fōkisi ‘e toko tolungeau; ‘o ne to‘o mo e ngaahi tūhulu, ‘o ne fetu‘utaki ‘a e iku mo e iku, ‘o ne ‘ai ha tūhulu ‘e taha ki he vaha‘a ‘o ha ongo iku, ‘o pehē pē.

⁵Pea ne tutu ‘a e ngaahi tūhulu, ‘o ne toki tukuange kinautolu ki he toutu‘u uite ‘a e kau Filisitia, pea na‘e vela ai ‘a e ngaahi fokotu‘unga uite, pea mo e me‘a na‘e kei tu‘u, ‘o fai atu ki he ngoue ‘ōlive.

⁶Pea felau‘aki ‘a e kau Filisitia, ‘o pehē, Ko hai kuo ne fai eni? Pea nau tali, Ko Samisoni, ko e foha mali ‘o e motu‘a Timinate, koe‘uhi na‘a ne to‘o hono uaifi, ‘o ‘ange ki hono takaua. Pea ō hake ai ‘a e kau Filisitia, ‘o nau fakamomofi ‘a e fefine mo ‘ene tamai ‘aki ‘a e maama.

⁷Pea pehē ‘e Samisoni kiate kinautolu, Neongo ho‘omou fai pehē, ka te u fai ha sauni kiate kimoutolu, pea hili ia pea u tuku.

⁸Pea ne tā fesifesi kinautolu, ko e tāmate lahi: ‘o ne toki ‘alu hifo, ‘o nofo ‘i he ava ‘i he makatu‘u ko ‘Eitami.

⁹Pea ‘alu hake ‘a e kau Filisitia, ‘o fokotu‘u tēniti ‘i Siuta, ‘o nau fakatē ‘enau tau ‘i Lehi.

¹⁰Pea fakalea ange ‘a e kau tangata Siuta, Ko e hā kuo mou omi ai kiate kimautolu? Pea na‘a nau tali, Ko ‘emau omi ke ha‘i ‘a Samisoni, ke fai kiate ia ‘o hangē ko ‘ene fai kiate kimautolu.

¹¹Pea na‘e toki ‘alu hifo ha toko tolu afe ‘o ha‘a Siuta ki he ava ‘o e makatu‘u ko ‘Eitami, pea na‘a nau fakalea ange kia Samisoni, ‘o pehē, ‘Ikai ‘oku ke ‘ilo ‘oku pule ‘a ha‘a Filisitia kiate kitautolu? Pea ko e hā eni kuo ke fai kiate kimautolu. Pea ne tali ki ai, Hangē ko ‘enau fai kiate au, na‘e pehē ‘eku fai kiate kinautolu.

¹²Pea na‘a nau pehē kiate ia, Ko ‘emau hifo eni ke ha‘i koe, ‘o tuku ki he nima ‘o e kau Filisitia. Pea pehē ‘e Samisoni kiate kinautolu, Fuakava mai ‘e ‘ikai te mou ala kiate au ‘e kimoutolu.

¹³Pea na‘a nau tali ki ai ‘o pehē, ‘Ikai; ka te mau ha‘i koe ke ma‘u, ‘o tukuange ki honau nima: ka ‘e ‘ikai te mau kākunga ke tāmate‘i koe. Pea na‘a nau ha‘i ia ‘aki ha ongo maea fo‘ou, ‘o nau ‘ohake ia mei he makatu‘u.

¹⁴Ha‘u ai ia ki Lehi, pea tuē ‘a e kau Filisitia ‘i he‘enau fakafetaulaki ki ai: ka ka ‘ohofia ia ‘e he Laumālie ‘o e ‘Eiki, pea ko e ongo maea na‘e ‘i hono nima na‘e hoko leva ‘o hangē ha vavae kuo mōfia ‘i he maama, pea na‘e mokulu ‘a e ha‘i mei hono nima.

¹⁵Pea na‘a ne ‘ilo ‘a e hui kou‘ahe fo‘ou ‘o ha ‘asi, ‘o ne ala ‘o to‘o, ‘o ne te‘ia ‘aki ha afe‘i tangata.

¹⁶Pea lea hake ‘a Samisoni, Ko ha hui kou‘ahe pē ‘o ha ‘asi, Kae hono taha ‘a e esi![35] Ko e hui kou‘ahe pē ‘o ha ‘asi, Kuo u tāmate‘i ‘aki ha afe‘i kakai.

¹⁷Pea hili ‘ene lea ko ia, na‘a ne li‘aki ‘a e hui kou‘ahe; pea na‘e ui ‘a e potu ko ia ko Lama-Lehi (ko Lī‘anga-hui-kou‘ahe).[36]

¹⁸Pea ne mate he fie inu, ‘o ne tautapa ki he ‘Eiki, ‘o ne pehē, Ko eni kuo ke fakafai ‘i ho‘o tamaio‘eiki ‘a e fu‘u fakahaofi ko eni, ka u mate ai au he fie inu, ‘o tō ki he nima ‘o e fa‘ahinga ta‘ekamu na.

¹⁹Ka ka foa‘i ‘e he ‘Otua ‘a e luo na‘e ‘i Lehi, pea na‘e ha‘u mei ai ‘a e vai; pea ne inu, pea toe ake hono laumālie, ‘o ne mo‘ui: ko hono ‘uhinga ia na‘e ui ai hono hingoa ko Eni-Hākole (ko e Vaikeli ‘o e Tautapa), ‘a ia ‘oku tu‘u ‘i Lehi ‘o a‘u ki he ‘aho ni.

²⁰Pea ne fai fakamaau ‘i ‘Isileli ‘o uofulu ta‘u, ‘i he kuonga ‘o e kau Filisitia.