Read KO E TOH TAPU KATOA TONGA KAU FAKAMAAU 16 Bible Online

KAU FAKAMAAU 16 - KO E TOH TAPU KATOA TONGA bible

KAU FAKAMAAU 16

¹PEA ‘alu ‘a Samisoni ki Kesa, ‘o ne sio ai ki ha fefine fe‘auaki, ‘o ne ‘alu kiate ia. Pea na‘e fakahā ki he kau Kesa, ‘o pehē, Kuo ha‘u ‘a Samisoni ki heni.

²Pea na‘a nau nofo takatakai, ‘o toka malumu ki ai ‘i he pō ko ia ‘o ‘aho, ‘i he matanikolo; ‘o nau fakalongo pē ‘i he pō kotoa, he‘enau pehē, ‘Oua ke ‘aho hake, pea tau toki tāmate‘i ia.

³Pea tokoto ‘a Samisoni ‘o a‘u ki he tu‘uapō; ka ‘i he tu‘uapō mālie na‘a ne tu‘u, ‘o ne ala ki he ongo lau matapā ‘o e matanikolo, mo e ongo pou matapā, ‘o ne ta‘aki ia fakataha mo e ‘akau fakama‘u, ‘o ne hilifaki ki hono uma; ‘o ne ‘ohake ki he tumutumu ‘o e mo‘unga ‘oku hanga ki Hepeloni.

⁴Pea hili ia na‘e faifai pea ne ‘ofa ki ha fefine ‘i he tele‘a ‘o Sōleki, pea ko e hingoa ‘o e fefine ko Tīlila.

⁵Pea hā‘ele ange ki he fefine ‘a e hou‘eiki hau ‘o e kau Filisitia, ‘o nau pehē kiate ia, Fakatalanoa‘i ia ke vakai pe ‘oku tu‘u ‘i he hā hono fu‘u ivi, pea tu‘u ‘i he hā ha‘atau lava‘i ia, ka mau ha‘i ia ke fakavaivai‘i: pea te mau toki ‘atu ‘e kimautolu takitaha ha afe‘i pa‘anga mo ha teau.

⁶Ko ia, na‘e lea ai ‘a Tīlila kia Samisoni, Tala mai mu‘a pe ‘oku tu‘u ‘i he hā ho fu‘u ivi na, mo e hā ‘e lava ‘aki ho ha‘i ke fakavaivai‘i?

⁷Pea tali ‘e Samisoni ki ai, Ka ne ha‘i ‘aki au ha fitu‘i fau mata ‘a ia kuo te‘eki ke fakamōmoa, te u toki vaivai ai, ‘o u hoko ‘o hangē ha tangata kehe.

⁸Pea ‘ohake ki he fefine ‘e he hou‘eiki hau ‘o e kau Filisitia ha fitu‘i fau mata ‘a ia kuo te‘eki ke fakamōmoa; pea na‘a ne ha‘i ‘aki ia.

⁹Pea na‘e ai ha ni‘ihi na‘e nofo ke tokoni ki he fefine, ‘o nau toi ‘i he loki. Pea pehē ‘e he fefine kiate ia, Samisoni ē, ko e kau Filisitia ena ‘oku ‘oho mai kiate koe! Pea na‘a ne motuhi ‘a e fau, ‘o hangē ko e motu ha filo te‘ekafa ‘oka ki‘i lave ki ai ‘a e maama. Ko ia na‘e ‘ikai ‘iloa hono ivi.

¹⁰Pea pehē ‘a Tīlila kia Samisoni, Ko eni kuo ke kākaa‘i au, pea kuo ke lea‘aki mai ha koto loi; ‘ā! ke ke tala mai mu‘a pe ko e hā ‘e ha‘i ‘aki koe.

¹¹Pea pehē ‘e ia ki he fefine, Kapau te nau mātu‘aki ha‘i au ‘aki ha ngaahi maea fo‘ou, ‘a ia kuo te‘eki fai‘aki ha ngāue, pea te u toki vaivai ai, ‘o tatau mo ha tangata kehe.

¹²Ko ia na‘e to‘o ‘e Tīlila ha ngaahi maea fo‘ou, ‘o ne ha‘i ‘aki ia, ‘o ne toki pehē ki ai, Samisoni ‘ē, ko e kau Filisitia ena ‘oku ‘oho mai kiate koe! (he na‘e ai ha malumu na‘e nofo ‘i he loki). Pea na‘a ne motuhi ‘a e ngaahi maea mei hono nima hangē ha filo.

¹³Pea lea ‘a Tīlila kia Samisoni, Tā ko ho‘o lea kotoa pē kiate au ko e koto kākā pē mo e loi; tala mai pe ko e hā ‘e ha‘i ‘aki koe. Pea tali ‘e ia ki ai, Ka ne ke lalanga hoku fitu‘i fiinga ni fakataha mo e lālanga —

¹⁴Pea hanga ‘e he fefine, ‘o ne fakama‘u[37] ‘aki ‘a e fa‘o, pea ne pehē ange, Samisoni ē, ko e kau Filisitia ena ‘oku ‘oho mai kiate koe! Pea ne ofo mei he‘ene mohe, ‘o ne ta‘aki ‘a e fa‘o ‘o e me‘a lalanga, pea mo e me‘a kuo lalanga.

¹⁵Pea pehē ‘e he fefine kiate ia, ‘Oku fēfē ho‘o lau ‘o pehē, ‘Oku ou ‘ofa kiate koe; ‘osi, ‘oku ‘ikai ‘iate au ho loto? ko e ta tu‘o tolu eni ho‘o kākaa‘i au, pea ‘oku ‘ikai te ke tala mai pe ‘oku tu‘u ‘i he hā ho fu‘u ivi na.

¹⁶Pea ‘i he‘ene fakafiu kiate ia, ‘i he‘ene lau ‘i he ‘aho kotoa pē, mo fakakina kiate ia, na‘e faifai pea ‘ikai te ne meimei kātaki ke mo‘ui;

¹⁷ko ia na‘a ne tala ki he fefine hono loto kotoa, ‘o ne pehē ki ai, Kuo te‘eki ke ‘ai ha tele ki hoku ‘ulu, he kuo u nofo ko e nāsili[38] ki he ‘Otua talu hoku fanau‘i. Kapau ‘e fafai au, pea ‘e toki mahu‘i meiate au hoku ivi, pea te u vaivai ‘o tatau mo ha tangata kehe.

¹⁸Pea vakai ‘e Tīlila kuo ne tala eni hono loto kotoa, pea ne fekau ‘o ui mai ‘a e hou‘eiki hau ‘o e kau Filisitia, ‘o ne pehē, Me‘a mai ‘a e tātu‘otaha ko eni; he kuo ne fakahā mai ‘a e kotoa ‘o hono loto. Pea hā‘ele hake ki he fefine ‘a e hou‘eiki hau ‘o e kau Filisitia, ‘o nau ‘alu mo kinautolu ‘a e pa‘anga.

¹⁹Pea na‘a ne fakamohe ia ‘i hono funga; ‘o ne ui ange ‘a e tangata, pea tele ‘e he fefine[39] ‘a e fiinga ‘e fitu ‘i hono ‘ulu; ‘o ne kamata ke fakavaivai‘i ia, pea na‘e mahu‘i hono ivi meiate ia.

²⁰Pea ne pehē ange, Samisoni ē, ko e kau Filisitia ena ‘oku ‘oho mai kiate koe! Pea ne ‘ā mei he‘ene mohe, ‘o ne pehē, Te u ‘alu atu pē ‘o hangē ko ‘eku fa‘a fai, ‘o tupe‘i. Ka na‘e ‘ikai te ne ‘ilo kuo mahu‘i ‘a e ‘Eiki meiate ia.

²¹Pea puke ia ‘e he kau Filisitia, ‘o nau kape‘i hono ongo mata, ‘o nau ‘ohifo ki Kesa, pea nau ha‘i palasa; pea na‘a ne fai ‘a e momosi ‘i he fale fakapōpula.

²²Ka na‘e kamata ke toe tupu hono lou‘ulu hili hono fafai.

²³Pea fakataha ‘a e hou‘eiki hau ‘o e kau Filisitia ke feia ha feilaulau lahi kia Tākoni ko honau fa‘ahikehe, pea ke fakafiefia: he na‘a nau pehē, Ko hotau ‘otua kuo ne tuku ki hotau nima ‘a hotau fili ko Samisoni.

²⁴Pea ‘i he sio kiate ia ‘e he kakai na‘a nau halelu‘ia ki honau ‘otua; he na‘a nau pehē, Ko hotau ‘otua kuo ne tuku ki hotau nima ‘a hotau fili, ‘a e toko taha na‘a ne maumau‘i ‘a hotau fonua, pea kuo ne tāmate‘i hotau tokolahi.

²⁵Pea ‘i he faifai pea māfana honau loto, na‘a nau pehē, Ui mai ‘a Samisoni ke ne fai faiva ma‘atautolu.[40] Pea na‘a nau ui mai ‘a Samisoni mei he fale pōpula; pea na‘a ne fai faiva ‘i honau ‘ao:[41] pea na‘a nau taki ia ki he vaha‘a pou.

²⁶Pea na‘e lea ‘a Samisoni ki he tama na‘e puke hono nima, Tuku ke u fāfā ki he ongo pou ‘a ia ‘oku tu‘u ai ‘a e fale, ka u faaki ki ai.

²⁷Ka ko e fale na‘e fonu ‘i he kakai tangata mo e kakai fefine; pea na‘e ‘i ai ‘a e hou‘eiki hau kotoa ‘o e kau Filisitia; pea na‘e nofo mei he tu‘a fale ha toko tolu afe nai, ‘a tangata mo fafine, ‘o nau mamata ki he fai faiva ‘a Samisoni.[42]

²⁸Pea tautapa ‘a Samisoni kia Sihova, ‘o ne pehē: ‘Ātonai Sihova ē, manatu‘i au; ‘io, fakamālohi‘i au, ‘Elohimi ē, ‘a e tātu‘otaha ko eni: kehe pē ke u sauni ki he kau Filisitia ha taha ‘o hoku ongo poko‘i mata ‘o‘oku ni!

²⁹Pea fā‘ofua ‘e Samisoni ‘a e ongo fu‘u pou loto, ‘a ia na‘e tu‘u ai ‘a e fale, ‘o ne puke ‘a e taha ‘aki hono nima to‘omata‘u mo e taha ‘aki hono to‘ohema.

³⁰Pea pehē ‘e Samisoni, Ke mole ‘eku mo‘ui fakataha mo e kau Filisitia! Pea ne tulolo ‘aki hono ivi kotoa, pea na‘e holo ‘a e fale ki he hou‘eiki mo e kakai kotoa na‘e ‘i ai. Ko ia ko e kakai na‘a ne tāmate‘i ‘i he‘ene pekia na‘e tokolahi ‘i he kakai na‘a ne tāmate‘i ‘i he‘ene mo‘ui.

³¹Pea na‘e ‘alu hifo hono kāinga mo e fale kotoa ‘o ‘ene ‘eiki, pea na‘a nau fata ia, ‘o ‘ohake, ‘o nau telio ‘i he vaha‘a ‘o Sola mo ‘Esitaoli, ‘i he fonualoto ‘o ‘ene ‘eiki ko Mānoa. Pea kuo ne fakamaau ‘a ‘Isileli ‘i he ta‘u ‘e uofulu.