Read KO E TOH TAPU KATOA TONGA KAU FAKAMAAU 17 Bible Online

KAU FAKAMAAU 17 - KO E TOH TAPU KATOA TONGA bible

KAU FAKAMAAU 17

¹PEA na‘e ai ha tangata na‘e kau ki Mo‘unga ‘Ifalemi, ko Maika hono hingoa.

²Pea pehē ‘e ia ki he‘ene fa‘ē, Ko e siliva ‘e taha afe mā teau na‘e mole meiate koe, pea ke lea tuki ai, pea ke toe tutuki‘i ka u fanongo, vakai ‘oku ‘iate au ‘a e siliva ko ia; ko au na‘a ku to‘o. Pea tali ‘e he‘ene fa‘ē, Ke monū‘ia mai ‘eku tama meia Sihova!

³Pea ne fakafoki ‘a e taha afe mā teau‘i siliva ki he‘ene fa‘ē; pea pehē ‘e he‘ene fa‘ē, ‘Oku ou mātu‘aki fakatāpui ‘a e siliva ni kia Sihova mei hoku nima ki he‘eku tama, ke ngaohi ‘aki ha ‘īmisi mo ha fakatātā ukamea: ko ia te u fakafoki ia kiate koe.

⁴Ka ka fakafoki ‘e ia ‘a e siliva ki he‘ene fa‘ē, pea to‘o ‘e he fefine ha uangeau‘i siliva, ‘o ne ‘atu ki he tufunga, pea ne ngaohi ‘aki ha ‘īmisi mo ha fakatātā ukamea: pea na‘e tuku ia ‘i he fale ‘o Maika.

⁵Pea ko e tangata ko Maika na‘e ai hano fale ‘otua, pea ne ngaohi ha ‘ēfoti,[43] moni telāfimi, pea ne fakatāpui ha taha ‘i he‘ene fānau tangata, ‘a ia na‘e nofo mai ko hono taula.

⁶Ko e taimi ko ia na‘e ‘ikai ha tu‘i ‘i ‘Isileli; na‘e takitaha fai hono loto.

⁷Pea na‘e ‘i ai ha talavou mei Pētelihema-Siuta (na‘a ne nofo mo ha‘a Siuta, ka ko e Līvai, pea ne ‘āunofo ‘i he potu ko ia).

⁸Pea hiki ‘a e tangata mei he kolo ko ē, ‘a Pētelihema-Siuta, ke kumi nofo‘anga; pea ne a‘u ki Mo‘unga-‘Ifalemi ki he fale ‘o Maika ‘i he‘ene fononga.

⁹Pea lea kiate ia ‘e Maika, Ko ho‘o ha‘u mei fē? Pea ne tali ange, Ko e Līvai au mei Pētelihema Siuta, pea ko ‘eku ‘alu ke ‘āunofo ‘i he potu te nau tali au.

¹⁰Pea pehē kiate ia ‘e Maika, Ta nonofo, pea ke hoko ko ha tamai mo taula‘eiki kiate au; pea te u ‘atu ha‘o hongofulu‘i siliva ki he ta‘u, mo ha tangata — kotoa, mo ha‘o kai, pea hū ‘a e Līvai.[44]

¹¹Pea loto lelei ‘a e Līvai ke nofo ki he tangata; pea hangē ‘a e talavou ko ha taha ‘i hono ngaahi foha.

¹²Pea na‘e fakanofo ‘e Maika ‘a e Līvai; pea na‘e hoko ‘a e talavou ko hono taula‘eiki, ‘o ne nofo ‘i he fale ‘o Maika.

¹³Pea pehē ‘e Maika, Kuo u ‘ilo pau eni ‘e ‘ofa ‘a Sihova kiate au, he kuo u ma‘u ha Līvai mooku taula‘eiki.