Read KO E TOH TAPU KATOA TONGA KAU FAKAMAAU 19 Bible Online

KAU FAKAMAAU 19 - KO E TOH TAPU KATOA TONGA bible

KAU FAKAMAAU 19

¹PEA ‘i he taimi ko ia na‘e ‘ikai ha tu‘i ‘Isileli; pea na‘e ai tokua ha motu‘a Līvai na‘e ‘āunofo ki he potu ki kō ‘o Mo‘unga-‘Ifalemi, na‘a ne to‘o ma‘ane sinifu ha fefine mei Pētelihema-Siuta.

²Pea hanga ‘ene sinifu, ‘o fai kovi mo ha tangata kehe, pea ne toki li‘aki ‘a e motu‘a, ‘o ne ‘alu ki he ‘api ‘o ‘ene tamai, ki Pētelihema-Siuta, pea ne ‘i ai fuoloa, fe‘unga mo e māhina ‘e fā.

³Pea tu‘u hono motu‘a ‘o ‘alu hono kumi, ke ne lea ki ai ke fakafoki hono loto, pea na‘e ō mo ia ‘ene talavou mo e ongo ‘asi: pea fakahū mai ia ‘e he fefine ki he fale ‘o ‘ene tamai: pea ‘i he mamata kiate ia ‘e he tamai ‘a e finemui, na‘a ne fiefia ke fe‘iloaki mo ia.

⁴Pea ta‘ofi ‘a e motu‘a ‘e hono kāinga mali, ‘a e tamai ‘a e fefine; pea nau nonofo ‘o ‘aho tolu: ‘o nau kai mo inu mo mohe ai.

⁵Pea ‘i hono ‘aho fā tokua pea nau tu‘u hengihengi hake, pea tu‘u ‘a e motu‘a ke ‘alu: ka ka pehē mai ‘a e motu‘a, ‘a e tamai ‘a e fefine, ki hono foha, ‘Oua ke fakafiemālie ‘aki ho loto ha me‘i tokoni pea mou toki ō.

⁶Ko ia na‘a na nonofo hifo ai, ‘o kai kinaua ‘osi pē, pea nau fai kava; pea pehē ‘e he tamai ‘a e fefine ki he motu‘a, Loto lelei, ka tau tatoka, ka tau fiefia mu‘a.

⁷Ka ka tu‘u ‘a e motu‘a ke ‘alu, ka ka ta‘ofi mālohi ki ai ‘e he‘ene tamai: ko ia na‘a ne foki mai, ‘o mohe ‘i he potu ko ia.

⁸Pea ne tu‘u hengihengi hake ‘i hono ‘aho nima ke ‘alu: ka ka lea mai ‘a e tamai ‘a e fefine, Fakafiemālie mu‘a ho loto, ‘o fakatotoka ho‘o ‘alu, kae‘oua ke pale ‘a e ‘aho: ko ia na‘a na tokoni kinaua.

⁹Pea tu‘u ‘a e motu‘a ke ‘alu, ‘a ia mo ‘ene sinifu mo ‘ene talavou, pea lea mai ki ai hono kāinga ko e tamai ‘a e fefine, ‘Oua koā; vakai ange mu‘a kuo efiafi hifo; tau tatoka mu‘a. Vakai, kuo mei ‘osi ‘a e ‘aho; mohe heni ka tau fakafiefia; pea ke ‘ā pongipongi, ‘o tu‘u hengihengi ‘o fai ho fononga, ‘o ‘alu ki ho tēniti.

¹⁰Ka e ‘ikai loto ‘a e tangata ke toe mohe, pea ne tu‘u pē ‘o ‘alu, ‘o a‘u ki he hāngai ki Siepusi (ko Selusalema ia): pea na‘e ‘iate ia ha ongo ‘asi kuo teuteu; na‘a nau ō foki mo ‘ene sinifu.

¹¹Kuo fe‘unga kinautolu mo Siepusi, kuo efiafi fau, pea lea mai ‘a e talavou ki hono ‘eiki, Me‘a mai mu‘a ka tau afe ki he kolo Siepusi ni, ‘o tau tatoka ai.

¹²Ka ka tali ‘e hono ‘eiki, ‘E ‘ikai te tau afe ki ha kolo hīteni, ‘a ia ‘oku ‘ikai ke kau ki ha‘a ‘Isileli; ka tau laka atu ki Kipea.

¹³Pea ne pehē ki he‘ene talavou, Ha‘u ange ka tau fakaofiofi ki ha taha ‘o e ngaahi feitu‘u ko ē, ‘o ta mohe ki Kipea, pe ki Lama.

¹⁴Ko ia, na‘a nau laka atu ‘o fononga, pea na‘e tō ‘a e la‘ā ‘i he‘enau ofi ki Kipea, ‘a ia ‘oku kau ki Penisimani.

¹⁵Pea na‘a nau afe ki he potu ko ia, ‘o hū ki Kipea ke mohe ai: ‘io, na‘a ne hū ki ai, ‘o ne nofo ‘i he mala‘e ‘o e kolo, he na‘e ‘ikai ha taha ‘e fakaafe kinautolu ke mohe ‘i hono ‘api.

¹⁶Mo e ‘iloange na‘e ha‘u ha tangata kuo motu‘a mei he‘ene ngāue ‘i he ngoue‘anga, he kuo efiafi, he na‘e kau ‘a e tangata ki Mo‘unga-‘Ifalemi, pea ko e nofo hili ki Kipea: he ko e kakai ‘o e feitu‘u ko e kau Penisimani.

¹⁷Pea hanga hake ‘a e motu‘a, ‘o ne vakai ‘a e tangata vūlangi ‘i he mala‘e ‘o e kolo: pea lea ange kiate ia ‘e he a‘ua‘u, Ko ho‘o ha‘u mei fē? Pea mo ho‘o ‘alu ki fē?

¹⁸Pea tali ‘e ia ki ai? Ko si‘emau mole mei Pētelihema-Siuta ki he potu ki kō ‘o Mo‘unga-‘Ifalemi; ‘oku ou kau ki he feitu‘u ko ia; pea u ‘alu ki Pētelihema-Siuta; pea ko e taha au ‘oku ou taka ‘i he fale ‘o Sihova,[47] ka ‘oku ‘ikai ha taha ‘e fakaafe au ki hono fale.

¹⁹Ka ‘oku mau ma‘u mohenga mo e me‘akai fakatou‘osi ki he ongo ‘asi; mo e me‘akai foki mo e uaine kiate au mo ho‘o kaunanga ni, pea ki he talavou ni, ‘a ia ‘oku hangē ha taha ‘i ho‘o kau tamaio‘eiki: ‘oku ‘ikai ha me‘a te mau masiva ai.

²⁰Pea lea ange ‘e he a‘ua‘u, Si‘oto‘ofa atu; tuku kiate au ho tali, kaekehe pē ke ‘oua te ke mohe ‘i tu‘a.

²¹Pea ne fakahū ia ki fale, pea ne ngaohi ha me‘akai ki he ongo ‘asi: pea nau tatafi honau va‘e, ‘o nau kai mo inu.

²²Lolotonga ‘enau fakafiefia, ‘iloange na‘e kapui ‘a e fale ‘eni kakai ‘o e kolo, ko e hako‘i Pileali, ‘o nau toutou tuki atu ‘i he matapā, pea nau lea ki he motu‘a ‘oku ‘o‘ona ‘a e fale, ‘a e a‘ua‘u, ‘Omi ki tu‘a ‘a e tangata na‘e hū ki ho fale, ke mau fe‘iloaki mo ia.

²³Pea hū ki tu‘a kiate kinautolu ‘a e tangata na‘e ‘o‘ona ‘a e fale, ‘o ne pehē ange, ‘Oua kāinga, ‘oua na‘a fai kovi pehē fau; ‘osi, kuo hū mai ‘a e tangata ni ki hoku fale: ‘oua te mou fai fakavalevale pehē.

²⁴Ko hoku ‘ōfefine ē ko e ta‘ahine, pea mo e sinifu ‘a e motu‘a, ka u ‘omi mu‘a kinaua kiate kimoutolu, pea mou fakamālohi‘i kinaua, ‘o fai homou loto ki ai: kae ‘oua na‘a feia ha vale pehē ki he tangata ni.

²⁵Kae ‘ikai momo‘i fie tokanga ki ai ‘e he kau siana, ko ia na‘e ala ‘e he tangata ki he sinifu ‘a e motu‘a, ‘o ne ‘atu ia ki tu‘a kiate kinautolu, pea nau ‘ilo‘i ia, ‘o nau toki ‘i he pō kotoa, ‘o ‘aho: pea nau toki tukuange ‘i he fakalau hake ‘a e ata.

²⁶Pea ha‘u ‘a e fefine ‘i he mafoa ‘a e ata, ‘o ne tō ki lalo ‘i he matafale ‘o e tangata, ‘a ia na‘e ‘i ai hono ‘eiki, ‘o a‘u ki he ma‘a mālie ‘a e ‘aho.

²⁷Pea tu‘u pongipongi hono ‘eiki, ‘o ne fakaava ‘a e ngaahi matapā ‘o e fale, ‘o ne hū ki tu‘a ke fai hono fononga: Pea tā ko ‘ene fefine sinifu kuo tō ‘i he matafale, pea kuo mafao atu hono nima ‘o a‘u ki he tu‘unga matapā ‘o e fale.

²⁸Pea ne lea ki he fefine, Tu‘u, ka tau fai atu. Ka na‘e ‘ikai ha tali. Pea ne toki hiki, ‘o hilifaki ki he ‘asi; pea ne tu‘u ‘a e tangata, ‘o ‘alu ki hono feitu‘u.

²⁹Pea kuo ne hū ki hono fale, pea ne to‘o ha hele, ‘o ne puke ‘ene sinifu, ‘o tafa ke konga hongofulu mā ua, ‘o ne tufa ‘a e fefine ki he ngaahi feitu‘u ‘o ‘Isileli.

³⁰Pea hoko ai, ka ‘ilonga ha taha na‘e mamata ki ai na‘a nau pehē, Te‘eki ke hoko ha me‘a pehē, pea te‘eki ke mamata ki ha me‘a pehē, talu ‘a e ‘aho na‘e ‘alu hake ai ‘a ha‘a ‘Isileli mei ‘Isipite, ‘o a‘u mai ki he ‘aho ni: ‘ai ki homou loto, fakakaukau ki ai, pea mou lea.