Read KO E TOH TAPU KATOA TONGA KAU FAKAMAAU 21 Bible Online

KAU FAKAMAAU 21 - KO E TOH TAPU KATOA TONGA bible

KAU FAKAMAAU 21

¹PEA ko e kau ‘Isileli kuo nau fuakava ‘i Mīsipa, ‘o pehē, ‘E ‘ikai ‘ange ‘e hatau toko taha hano ‘ōfefine ke mali ki Penisimani.

²Pea ha‘u ‘a e kakai ki Pēteli, pea nau nofo ‘i he ‘ao ‘o ‘Elohimi ‘i he potu ko ia ‘o a‘u ki he efiafi, pea nau ‘ai ‘enau fu‘u fākafoa.

³Pea nau pehē, ‘E Sihova, ‘Otua ‘o ‘Isileli, ko e hā kuo hoko ai ‘a e me‘a ni ‘i ‘Isileli? he ko e ‘aho ni kuo tō ha matakali ‘e taha ‘i ‘Isileli.

⁴Pea pongipongi hake, na‘e tu‘u hengihengi ‘a e kakai, ‘o nau fokotu‘u ha ‘ōlita ‘i he potu ko ia, ‘o nau feia ai hani feilaulau-mōifua mo hani feilaulau-‘ofa.

⁵Pea fepehē‘aki ‘e ha‘a ‘Isileli, Ko hai ‘i he ngaahi matakali ‘Isileli na‘e ‘ikai ha‘u ki he fakataha kia Sihova? He kuo nau fai ha fuakava mamafa, ‘o kau kiate ia na‘e ‘ikai ‘alu hake kia Sihova ki Mīsipa, ‘o pehē, ‘E mate tāmate‘i ia.

⁶Pea kuo fakatomala ‘a ha‘a ‘Isileli koe‘uhi ko honau tokoua ko Penisimani, ‘o nau pehē, Kuo tu‘usi he ‘aho ni ha matakali ‘e taha mei ‘Isileli.

⁷Ko e hā te tau fai kiate kinautolu ‘oku toe, ke nau ma‘u uaifi ai? he ko kitautolu kuo tau fuakava ‘ia Sihova ‘e ‘ikai te tau ‘ange hatau fānau fefine mōnau ‘unoho.

⁸Ko ia na‘a nau pehē ai, Ko hai ha taha ‘i he ngaahi matakali ‘Isileli ne ‘ikai ‘alu hake kia Sihova ki Misipa? Pea tā na‘e ‘ikai ha‘u ki he ‘apitanga ha taha mei Siepesi-kiliati ke kau ‘i he fakataha.

⁹Pea na‘e lau ‘a e kakai, pea tā na‘e ‘ikai ha taha mei he kakai ‘o Siepesi-kiliati.

¹⁰Pea fekau atu ki ai ‘e he fakataha ‘a e toko taha mano mā ua afe mei he kau to‘a, ‘o nau tu‘utu‘uni kinautolu ‘o pehē, ‘Alu ‘o taa‘i ‘a e nofo Siepesi-kiliati ‘aki ‘a e mata ‘o e heletā, ‘a e kau fefine foki mo e tamaiki.

¹¹Pea ko eni ‘a e me‘a te mou fai, ‘ilonga ha tangata, pea ‘ilonga ha fefine kuo ne ‘ilo ha tangata, te mou faka‘auha.

¹²Pea na‘e ‘ilo ‘i he kakai ‘o Siepesi-kiliati ha fāngeau‘i finemui kei tāupo‘ou, pea na‘a nau ‘omi kinautolu ki he ‘apitanga ki Sailo, ‘a ia ‘oku ‘i Kēnani Mo‘oni.

¹³Pea fekau atu ‘e he fakataha kotoa ke lea ki he kau Penisimani na‘e ‘i he makatu‘u ko Līmoni, ‘o tala kiate kinautolu kuo melino.

¹⁴Pea foki ‘a Penisimani ‘i he taimi ko ia, pea nau ‘atu kiate kinautolu ‘a e kau fefine kuo nau fakamo‘ui ‘i he kau fefine Siepesi-kiliati, ka na‘e ‘ikai te nau tofu ai.

¹⁵Pea na‘e fakatomala koe‘uhi ko Penisimani, he kuo fakaava ‘e he ‘Eiki ha tu‘unga ‘e taha ‘i he ngaahi matakali ‘Isileli.

¹⁶Pea pehē ‘e he mātu‘a ‘o e fakataha, Ko e hā te tau fai ma‘a e toe, ke nau ma‘u uaifi ai, he kuo faka‘auha ‘a e kau fefine Penisimani?

¹⁷Pea nau pehē, Kuo pau ke ‘i ai ha tofi‘a ki he kakai kuo hao ‘i Penisimani, ke ‘oua na‘a tāmate‘i ha matakali mei ‘Isileli.

¹⁸Ka ko kitautolu ‘e ‘ikai te tau lava ke ‘atu hanau ‘unoho mei he‘etau fānau fefine: he kuo fuakava ‘a ha‘a ‘Isileli, ‘o pehē, Ke mala‘ia ‘a ia te ne ‘ange ha uaifi ki Penisimani.

¹⁹Pea nau pehē, Ko eni, ‘oku ai ha kātoanga ‘o Sihova ‘oku fai ‘i he ta‘u kotoa pē ‘i Sailo (‘a ia ‘oku tu‘u ‘i he potu tokelau ‘o Pēteli, ‘i he potu hahake ‘o e hala tanu ‘oku ‘alu mei Pēteli ki Sikemi, pea ‘oku tu‘u ‘i he potu saute ‘o Lēpona).

²⁰Pea nau tu‘utu‘uni ki he kau Penisimani, ‘o pehē, ‘Alu ‘o fakatoka malumu ‘i he ngaahi ngoue vaine;

²¹pea mou vakai, pea ka ‘iloange ‘e ‘alu atu ‘a e kau ta‘ahine Sailo ke me‘e ‘i he ngaahi me‘e, pea mou ‘alu ki tu‘a mei he ngaahi ngoue vaine, ‘o takitaha puke hano uaifi ‘i he kau ta‘ahine Sailo, ‘o mou ō ki he fonua ‘o Penisimani.

²²Pea kapau ‘e ha‘u[54] ‘enau mātu‘a, pe ko honau ngaahi tuonga‘ane, ke lāunga mai, pea te mau[55] pehē kiate kinautolu, Me‘a‘ofa ‘aki mai pē, koe‘uhi na‘e ‘ikai te mau ma‘u ma‘anautolu takitaha ha uaifi ‘i he tau: pea na‘e ‘ikai te mou ‘ange ‘e kimoutolu, he ka ne pehē kuo mou halaia ni.

²³Pea fai pehē ‘e ha‘a Penisimani, ‘o nau ma‘u meiate kinautolu na‘e me‘e ha kau fefine ke nau tōfuhia ai, ‘a ia na‘a nau holataki‘i, pea nau laka ‘o foki ki honau ngaahi tofi‘a, ‘o nau langa ‘a e ngaahi kolo ‘o nofo ai.

²⁴Pea movete mo ha‘a ‘Isileli ‘i he taimi ko ia, ‘o ‘alu takitaha ki hono matakali mo hono fāmili, pea nau ‘alu mei ai takitaha ki hono tofi‘a.

²⁵Ko e taimi ko ia na‘e ‘ikai ha tu‘i ‘i ‘Isileli: na‘e takitaha fai hono loto.