Read KO E TOH TAPU KATOA TONGA KAU FAKAMAAU 3 Bible Online

KAU FAKAMAAU 3 - KO E TOH TAPU KATOA TONGA bible

KAU FAKAMAAU 3

¹PEA ko eni ‘a e ngaahi pule‘anga na‘e tuku ‘e Sihova ke sivi ‘aki ‘a ‘Isileli, ‘a kinautolu na‘e ‘ikai te nau ‘ilo ki he ngaahi tau ‘i Kēnani;

²(ko e kehe pē ke ‘ilo ‘e he ngaahi to‘utangata ‘o ha‘a ‘Isileli ke nau ako ai ‘i he tau, ‘a kinautolu na‘e ‘ikai ‘ilo mu‘a ki ai);

³ko e hou‘eiki ‘e toko nima ‘o e kau Filisitia, mo e kau Kēnani kotoa pē, mo e kau Saitoni, mo e kau Hevi na‘e nofo ‘i he mo‘unga ko Lepanoni, mei he mo‘unga ko Peali-Heamoni ‘o a‘u ki he Hū‘anga ki Hēmati.

⁴Pea na‘a nau ‘i ai ke sivi ‘aki ‘a ‘Isileli, ke mahino pe te nau tokanga ki he ngaahi tu‘utu‘uni ‘a Sihova, ‘a ia na‘a ne ‘atu ki he‘enau ngaahi tamai, ‘o fakafai ‘ia Mōsese.

⁵Pea na‘e nofo ‘a ha‘a ‘Isileli ‘i he lotolotonga ‘o ha‘a Kēnani, mo ha‘a Heti, mo ha‘a ‘Āmoli, mo ha‘a Pēlisi, mo ha‘a Hevi, mo ha‘a Siepusi;

⁶pea na‘a nau mali mo honau ngaahi ‘ōfefine, pea na‘a nau ‘ange honau ngaahi ‘ōfefine ke ‘unoho mo e fānau ‘anautolu, pea na‘a nau tauhi honau ngaahi ‘otua.

⁷Pea na‘e fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova, he na‘a nau fakangalongalo‘i ‘a e ‘Eiki ko honau ‘Otua, pea nau tauhi ‘a e ngaahi Peali mo e ngaahi ‘Āsela.

⁸Ko ia na‘e langa‘i ai ‘a e houhau ‘o Sihova kia ‘Isileli, ‘o ne fakatau kinautolu ki he nima ‘o Kūsani-Lisataimi ko e Tu‘i Mesopotēmia: pea na‘e nofo ‘a ha‘a ‘Isileli kia Kūsani-Lisataimi ‘o valu ta‘u.

⁹Pea tautapa ki he ‘Eiki ‘a ha‘a ‘Isileli, pea fokotu‘u ‘e he ‘Eiki ha taukapo ma‘a ha‘a ‘Isileli ‘a ia na‘a ne fakahaofi kinautolu, ko ‘Ōtenili ko e foha ‘o Kēnasi, ko e tehina ‘o Kēlepi.

¹⁰He na‘e hā‘ele kiate ia ‘a e Laumālie ‘o Sihova, pea na‘a ne fakamaau ‘a ‘Isileli; pea na‘a ne ‘alu atu ‘o tau, pea na‘e tuku ‘e he ‘Eiki ki hono nima ‘a Kūsani-Lisataimi ko e Tu‘i Mesopotēmia: ko ia na‘e mālohi hono nima kia Kūsani-Lisataimi.

¹¹Pea na‘e nonga ‘a e fonua ‘o fāngofulu ta‘u. Pea pekia ‘a ‘Ōtenili ko e foha ‘o Kēnasi.

¹²Pea toe fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova: pea na‘e poupou ‘e he ‘Eiki ‘a ‘Ekeloni ko e Tu‘i Moape ke ne mālohi ki ha‘a ‘Isileli, koe‘uhi kuo ne fai ‘a e me‘a na‘e tau kovi ki he finangalo ‘o Sihova.

¹³Pea na‘a ne fakataha mai ‘a ha‘a ‘Āmoni mo ‘Amaleki, ‘o ne ‘alu ‘o taa‘i ‘a ‘Isileli, ‘o nau ma‘u ‘a Kolo-paame.

¹⁴Pea na‘e nofo ‘a ha‘a ‘Isileli kia ‘Ekeloni ko e Tu‘i Moape, ‘o hongofulu mā valu ta‘u.

¹⁵Ka ‘i he tautapa ‘a ha‘a ‘Isileli kia Sihova, na‘a ne fokotu‘u honau taukapo, ko ‘Ēhuti ko e foha ‘o Kela, ko ha ha‘a Penisimani, ko e tangata na‘e hema: he na‘e fakamoimoi ‘iate ia ‘e ha‘a ‘Isileli ha‘anau me‘a‘ofa kia ‘Ekeloni ko e Tu‘i Moape.

¹⁶Ka ko ‘Ēhuti kuo ne ngaohi mai ha heletā na‘e fakatoumata, ko e kiupite hono lōloa; pea na‘a ne no‘o ia ‘i hono loto kofu ‘i hono tenga to‘omata‘u.

¹⁷Pea na‘a ne ‘oatu ‘a e me‘a‘ofa kia ‘Ekeloni ko e Tu‘i Moape; pea ko ‘Ekeloni ko e ‘eiki sino ‘aupito.

¹⁸Pea ‘i he faifai pea ‘osi ‘ene ‘atu ‘a e me‘a‘ofa, na‘a ne fekau ‘a e kakai na‘e ha‘u mo ia ke ‘alu.

¹⁹Ka ka foki mai ia mei he ngaahi tamapua ‘a ia ‘oku ‘i Kilikali, ‘o ne pehē, ‘Ēī, ‘oku ‘i ai ha‘aki fekau fufū ki he ‘Afiona. Pea ne folofola mai, Tuku ‘a e lea. Pea hū atu leva kitu‘a ‘a kinautolu kotoa pē na‘e fe‘ao mo ia.

²⁰Pea ‘alu atu ‘a ‘Ēhuti kiate ia, ka ‘oku ne nofo toko taha ‘i ha fale fakahavilivili na‘a ne ma‘u. Pea lea ange ‘a ‘Ēhuti, Kuo u ha‘u mo au ha folofola ‘a e ‘Otua kiate koe.

²¹Pea ne tu‘u mai mei hono nofo‘anga. Pea mafao atu ‘e ‘Ēhuti hono nima to‘ohema, ‘o ne to‘o ‘a e heletā mei hono tenga to‘omata‘u, ‘o ne velo‘i ia ki hono kete:

²²pea na‘e hū atu mo e ‘esia foki; pea ngalo ‘a e mata ‘i he ngako, he na‘e ‘ikai te ne ta‘aki ‘a e heletā mei hono kete;

²³pea na‘e ‘asi atu ia kitu‘a.[6] Pea hū kitu‘a ‘a ‘Ēhuti ki he falehala, ‘o ne tāpuni ‘a e ngaahi matapā ‘o e fale kiate ia, ‘o ne fakama‘u.

²⁴Pea kuo ‘alu ia, na‘e ha‘u ‘a e kau tamaio‘eiki; pea na‘a nau vakai, tā kuo fakama‘u ‘a e ngaahi matapā ‘o e fale; pea na‘a nau pehē, Kuo pau ‘oku ne fai ‘ene me‘a ‘i he fale fakahavilivili.

²⁵Na‘a nau tatali, tatali, pea nau mā ai: pea tā na‘e ‘ikai to‘o ‘a e ngaahi matapā ‘o e fale; ko ia na‘a nau to‘o ‘a e kī, ‘o fakaava ia: pea tā ko honau ‘eiki ena kuo tō ki lalo kuo mate.

²⁶Kae lolotonga ‘enau tatali na‘e hola ‘a ‘Ēhuti, ‘o ne laka atu ‘i he ngaahi tamapua, ‘o ne hao atu ki Seila.

²⁷Pea ‘i he‘ene a‘u atu, na‘a ne ifi talupite ‘i he fonua mo‘unga ‘o ‘Ifalemi, pea na‘e ‘alu hifo mo ia ‘a ha‘a ‘Isileli mei he fonua mo‘unga, pea taki ‘e ia.

²⁸Pea ne pehē kiate kinautolu, Mou muimui kiate au: he kuo tuku ‘e he ‘Eiki homou ngaahi fili ‘a e kau Moape ki homou nima. Pea na‘a nau muimui kiate ia, ‘o nau puke ‘a e ngaahi a‘a‘anga ‘o Soatani ki Moape, pea na‘e ‘ikai te nau tuku ha taha ke a‘a atu.

²⁹Pea na‘a nau taa‘i ‘i he taimi ko ia ha kau Moape ‘e taha mano nai, ko e kau tangata kaukaua kotoa pē mo to‘a: pea na‘e ‘ikai hao ha taha.

³⁰Pea na‘e fakavaivai‘i ‘a Moape ‘i he ‘aho ko ia ‘i he lalo nima ‘o ‘Isileli, pea na‘e nonga ‘a e fonua ‘o valungofulu ta‘u.

³¹Pea hili ia na‘e ‘i ai ‘a Sāmika‘a ko e foha ‘o ‘Ānati, ‘a ia na‘a ne taa‘i ‘a e kau Filisitia ‘e toko onongeau ‘aki ha tao fakateka pulu: pea ko ia foki na‘a ne taukapo ‘a ‘Isileli.