Read KO E TOH TAPU KATOA TONGA KAU FAKAMAAU 5 Bible Online

KAU FAKAMAAU 5 - KO E TOH TAPU KATOA TONGA bible

KAU FAKAMAAU 5

¹PEA toki hiva ‘i he ‘aho ko ia ‘a Tepola, pea mo Pēlake ko e foha ‘o ‘Apinoame, ‘o pehē,

²Mou fakafeta‘i ki he ‘Eiki, ‘I he mu‘aki ‘a e kau takimu‘a ‘o ‘Isileli, Mo e vēkeveke fai ‘a e kakai.

³Me‘a mai, ‘a e ngaahi tu‘i, Fanongo mai ‘a hou‘eiki; Ko au ē te u lave ki he ‘Eiki, Te u tā nafa kia Sihova ko e ‘Otua ‘o ‘Isileli.

⁴‘Eiki, ‘i ho‘o me‘a atu mei Seia, ‘I ho‘o hā‘ele atu mei he vao ‘o ‘Ītomi na, Na‘e tekelili ‘a e fonua, na‘e tutu‘u foki ‘a e langi, ‘Io, ko e ngaahi ‘ao na‘e lōvai.

⁵Na‘e ngalaku[8] ‘a e ngaahi mo‘unga‘i he ‘ao ‘o e ‘Eiki, ‘Io, ‘a Sainai na ‘i he ‘ao ‘o Sihova ko e ‘Otua ‘o ‘Isileli.

⁶‘I he taimi ‘o e foha ‘o ‘Ānati ko Sāmika‘a, ‘I he taimi ‘o Siaili, na‘e ta‘e‘uhia ‘a e ngaahi hala, Pea fou ‘i he ngaahi hala vao ‘a e ngaahi fononga.

⁷Na‘e li‘aki ‘a e ngaahi mala‘e[9] ‘o ‘Isileli, ‘Io, na‘e li‘ekina; ‘O a‘u ki he‘eku tu‘u hake, ‘a au Tepola,[10] ‘Eku tu‘u hake ko ha fa‘ē ‘i ‘Isileli,

⁸Na‘a nau fili ‘otua fo‘ou; Toki a‘u mai ki he matanikolo ‘a e tau: Na‘e ‘iloa koā ha pā pe ha tao ‘I ha ‘Isileli ‘e faa‘i mano?

⁹‘Oku ngaue hoku fatu ki he kau ‘Isileli ‘oku angi, ‘A kinautolu na‘e tō mo mate ma‘a e kakai: Mou fakafeta‘i ki he ‘Eiki.

¹⁰Lau ki ai,[11] ha‘a heka ‘asi hina, Ha‘a nofo he ngaahi fata,[12] Mo ha‘a hā‘ele he ngaahi hala.

¹¹He mama‘o ē ‘a e kalamū[13] ‘a e kakai fana na‘e le‘o he ‘utuvai — Ko e potu ko ia te nau ‘a‘au ai ‘a e ngaahi faitotonu ‘a e ‘Eiki, ‘Ene taukapo‘i hono ngaahi mala‘e ‘i ‘Isileli,[14] Toki ‘alu hifo ki he ngaahi matanikolo ‘a e kakai ‘a e ‘Eiki.[15]

¹²‘Ā mu‘a, Tepola, ‘ā; ‘Ā, ‘ā, ‘o fai ha ta‘anga! Tu‘u hake Pēlaki ē! ‘O taki pōpula ho‘o vete, Si‘i foha ‘o ‘Apinoame!

¹³Toki ‘alu hifo ‘a e toe ‘ei‘eiki — ko e kakai;[16] Na‘e ‘alu hifo ‘a Sihova ma‘aku[17] ‘i he kau mafi.

¹⁴Meia ‘Ifalemi, ‘a kinautolu kuo akaaka ‘i ‘Amaleki na;[18] Mei ho tu‘a ‘a Penisimani, ‘o ō mo ho ngaahi fa‘ahinga; Meia Mākili na‘e ‘alu hifo ha kau angi, Pea meia Sepulone ‘a kinautolu ‘oku ala ki he tokotoko lau kakai.

¹⁵Pea ko e hou‘eiki meia ‘Īsaka na‘e ha‘u mo Tepola; ‘Io, na‘e tatau mo Pēlake ‘a ‘Īsaka, Na‘e leleekina kinautolu ‘e honau va‘e ki he tele‘a.[19] ‘I he ngaahi funga vai ‘o Lūpeni Na‘e fokotu‘u ‘a e ngaahi lea ‘a loto lahi.

¹⁶Ko e hā ‘a e mo‘utangutu na ‘i he ngaahi loto‘ā sipi Ke fanongo ki he mimiha ‘a e kau tauhi? ‘I he ngaahi funga vai ‘o Lūpeni Na‘e fokotu‘u ‘a e ngaahi lea ‘a lotolahi.[20]

¹⁷Tekefili ‘a Kiliati ‘i Tu‘a-Soatani, Mo Tani — ko e hā na‘a ne ma‘unga ki vaka ai? Ko ‘Āseli na‘e nofo ‘i matātahi, ‘O tekefili ‘i hono ngaahi kōmaki.

¹⁸Sepulone — ko e kakai na‘e va‘inga‘aki ki he mate ‘enau mo‘ui. Pehē ‘i he ngaahi tumu‘i mo‘unga ‘a Nafitalai.

¹⁹Na‘e ha‘u ‘a e ngaahi tu‘i — na‘a nau tau mai; Toki tau ‘a e ngaahi tu‘i Kēnani, ‘I Ta‘anaka, ‘i he ngaahi vai ‘o Mekito: Ka na‘e ‘ikai ha momo‘i pa‘anga vete te nau to‘o.

²⁰Na‘e fai tau mei langi na, Ko e ngaahi feitu‘u mei ho‘onautolu founga na‘a nau fai tau mo Sīsela.

²¹Na‘e ‘auhia kinautolu ‘e vaitafe Kīsoni, ‘A e vaitafe panea, ‘a e vaitafe ko Kīsoni! Fai atu hoku loto ‘o mālohi!

²²Toki patatū ‘a e va‘e ‘o e fanga hoosi ‘I he takai holo, takai holo ‘a honau kau mālohi.

²³Folofola mai ‘a e ‘āngelo ‘a e ‘Eiki, “Mou tukitala‘i ‘a Mēlosi, Mou tuki‘aungafa‘i ‘a e kau nofo ai; Ko e ‘ikai te nau ha‘u ki he tokoni ‘o Sihova, Ki he tokoni ‘o Sihova kuo ō mo e kau to‘a.”[21]

²⁴Ke monū‘ia taha ‘i he kau fefine ‘a Siaili, ‘A e uaifi ‘o Hepa ko e Keini, Ke ne monū‘ia taha ‘i he fine nofo tēniti!

²⁵Na‘a ne kole vai: na‘a ne ‘ange hu‘akau: ‘I he ipu ‘a hou‘eiki na‘a ne ‘atu hu‘akau fatu.

²⁶Na‘a ne ala ki he fa‘o ‘aki hono nima, Puke ‘aki hono to‘omata‘u ‘a e hāmala ‘a tufunga: Pea ne hapo‘i ‘aki ia ‘a Sīsela, Na‘a ne laiki hono ‘ulu na; ‘Io, na‘a ne fahi‘i mo tui‘i hono manifinifihanga.

²⁷‘I he vaha‘a ‘o ongo va‘e na‘a ne mākaua, Na‘a ne tō, na‘a ne tokoto; ‘I he vaha‘a ‘o ongo va‘e na‘a ne mākaua, na‘a ne tō: Ko e potu na‘a ne mākaua ē Ko ia na‘a ne tō ai ‘o mate.

²⁸He fakasio mai he tupa mo lāulau[22] ‘a e fa‘ē na ‘a Sīsela ‘i he tukihau! “Ko e hā ‘oku fakatuai ai ‘ene sāliote ‘ene ha‘u? Ko e hā ‘oku ve‘etuia ai ‘ene fanga manu?”

²⁹Tali hake ‘e hono kau fine‘eiki poto na, ‘Io, na‘a ne tali ‘e ia ma‘ana[23]

³⁰“‘Ikai kuo nau ma‘u vete, pea ‘oku nau tufa? Taki taha, taki ua ‘a e to‘a ‘ene kaunanga” “Ko e kofu pulepule ko e koloa ia ‘a Sīsela, Ko e koloa pulepule — ha taha kuo teu‘i, Ha pulepule ‘e ua kuo teu‘i, ki he kia ‘o e ma‘itaki.”[24]

³¹Ke pehē ‘a e ‘auha ‘o ho fili fua pē, ‘e Sihova! Ka ko ha‘a ‘ofa ki he ‘Afiona Ke nau hangē ko e la‘ā ‘ene hopo mo hono ha‘aha‘a. Pea na‘e nonga ‘a e fonua ‘o fāngofulu ta‘u.