Read KO E TOH TAPU KATOA TONGA KAU FAKAMAAU 6 Bible Online

KAU FAKAMAAU 6 - KO E TOH TAPU KATOA TONGA bible

KAU FAKAMAAU 6

¹PEA fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova, pea na‘e tuku kinautolu ‘e Sihova ki he nima ‘o Mitiani, ‘o fitu ta‘u.

²Pea na‘e mālohi ‘a e nima ‘o Mitiani ki ‘Isileli: pea ko e me‘a ‘ia Mitiani na‘e ngaohi ai ‘e ha‘a ‘Isileli ma‘anautolu ‘a e ngaahi toitoi‘anga ko ē ‘oku ‘i he ngaahi mo‘unga, pea mo e ngaahi ‘ana, mo e ngaahi talitau‘anga.

³Pea ka faifai pea ‘osi ‘a e tō ta‘u ‘a ‘Isileli, na‘e toki ‘alu hake ‘a e kau Mitiani mo e kau ‘Amaleki mo ha‘a ‘Ālepea, ke fai mo kinautolu:

⁴pea na‘a nau nofo ‘aki mai, ‘o maumau‘i ‘a e fua ‘o e fonua ‘o a‘u atu ki Kesa, ‘o ‘ikai te nau fakatoe ha me‘akai ‘i ‘Isileli, pe ha sipi, pe ha pulu, pe ha ‘asi.

⁵He na‘a nau ha‘u mo kinautolu ‘enau fanga manu, mo honau ngaahi tēniti; na‘e hangē ko ha ta‘emalau ‘o ha fanga he‘e ‘enau tokolahi; na‘e ‘ikai lava ke lau ‘a kinautolu, pe ko ‘enau fanga kāmeli: pea na‘a nau ha‘u ki he fonua ke faka‘auha ia.

⁶Pea na‘e hoko ‘o vaivai ‘aupito ‘a ‘Isileli koe‘uhi ko Mitiani, pea tautapa ‘a ‘Isileli ki he ‘Eiki.

⁷Pea ‘i he faifai pea tautapa ‘a ha‘a ‘Isileli ki he ‘Eiki koe‘uhi ko e ngāue ‘a Mitiani.

⁸Na‘e toki fekau atu ‘e he ‘Eiki ha tangata palōfita ki ha‘a ‘Isileli, ke ne pehē kiate kinautolu, Ko eni ‘a e folofola ‘a Sihova ko e ‘Otua ‘o ‘Isileli, Ko au na‘a ku ‘ohake kimoutolu mei ‘Isipite, pea u fakahū mai kimoutolu mei he fale pōpula;

⁹pea u fakahaofi kimoutolu mei he nima ‘o e kau ‘Isipite, pea mei he nima ‘o e kakai kotoa na‘e fakamālohia kimoutolu, pea u kapusi kinautolu mei homou ‘ao, pea u foaki kiate kimoutolu honau fonua;

¹⁰pea u pehē kiate kimoutolu, Ko Sihova au ko homou ‘Otua: ‘e ‘ikai te mou ‘apasia ki he ngaahi ‘otua ‘o e kau ‘Āmoli, ‘a ia ‘oku mou nofo ki honau fonua: ka kuo ‘ikai te mou tokanga ki hoku le‘o.

¹¹Pea na‘e hā‘ele mai ‘a e ‘Āngelo ‘a Sihova, ‘o ne nofo ‘i he lolo ‘oke na‘e ‘i ‘Ōfila, ‘a ia ko e ‘api ‘o Soasi ko e tangata ‘Apiesa; pea ko hono foha ko Kitione na‘a ne tuki uite ‘i he tata‘o‘anga uaine ke puli mei he kakai Mitiani.

¹²Pea hā kiate ia ‘a e ‘Āngelo ‘a Sihova, ‘o ne pehē kiate ia, ‘Oku ‘iate koe ‘a e ‘Eiki, si‘i to‘a tete‘e.

¹³Pea tali ki ai ‘a Kitione, ‘Oiauē, Tangata‘eiki, kapau ‘oku ‘iate kimautolu ‘a e ‘Eiki, pea ko e hā ai kuo hoko mai ‘a e ngaahi fu‘u me‘a pehē? pea ko e fē ‘ene ngaahi ngāue fakaofo ‘a ia kuo talanoa‘ia mai ‘e he‘emau ngaahi kui, ‘o pehē, ‘Ikai na‘e ‘ohake kimautolu ‘e Sihova mei ‘Isipite? ka ko eni kuo li‘aki kimautolu ‘e he ‘Eiki, pea kuo ne tuku kimautolu ki he ‘aofinima ‘o Mitiani.

¹⁴Pea hāngai fofonga kiate ia ‘a Sihova, ‘o ne folofola mai, ‘Alu ‘aki ho ivi ko ena, ‘o fakahaofi ‘a ‘Isileli mei he ‘aofinima ‘o Mitiani: ‘ikai kuo u kouna koe?

¹⁵Pea tali ‘e ia ki ai, ‘Oiauē, Tangata‘eiki, te u fakahaofi ‘a ‘Isileli ‘aki ‘a e hā? Vakai, ko e kongakau ‘oku ou kau ki ai ko e vaivai taha ia ‘ia Manase, pea ko e si‘i taha au ‘i he fale ‘o ‘eku tamai.

¹⁶Pea folofola ki ai ‘a Sihova, Ka te u ‘iate koe pē, pea te ke taa‘i ‘a Mitiani ‘o hangē ko e toko taha pē.

¹⁷Pea tali ‘e ia ki ai, Kapau leva kuo u ta‘imālie ho‘o ‘ofa, pea ke fai mai ha faka‘ilonga, ko koe pē ‘oku ta fefolofolai mo au.

¹⁸‘Oua ā te ke hiki mei heni, kae‘oua ke u toe ha‘u, ‘o ‘atu ha‘aku me‘a‘ofa, ‘o tuku ‘i ho ‘ao. Pea folofola mai ‘e ia, Te u nofo kae‘oua ke ke toe ha‘u.

¹⁹Pea hū ki fale ‘a Kitione, ‘o ne ngaohi ha ki‘i kosi, ‘o ne natu ha mahoa‘a ‘e taha: na‘a ne ‘ai ‘a e kanomate ki ha kato, ka ne tuku ‘a e huhu‘a ki ha kulo, ‘o ne hū mo ia ki tu‘a ki he lolo ‘oke, ‘o ne ‘oatu ai.

²⁰Pea me‘a mai ‘a e ‘Āngelo ‘a ‘Elohimi, To‘o ‘a e kanomate mo e ngaahi keke, ‘o tuku ki he maka ko ē, pea lilingi ‘a e huhu‘a.

²¹Pea na‘a ne fai pehē. Pea ‘ai atu ‘e he ‘Āngelo ‘a Sihova ‘a e mui tokotoko na‘a ne to‘o, ke lave ki he kanomate mo e ngaahi keke; pea na‘e ‘alu hake ‘a e afi mei he maka, ‘o keina ‘a e kanomate mo e ngaahi keke; pea hā‘ele ‘a e ‘Āngelo ‘a Sihova ‘o puli meiate ia.

²²Pea vakai ‘e Kitione tā ko e ‘Āngelo ‘a Sihova ia, ‘o ne pehē, ‘Oiauē, ‘Ātonai Sihova! he ko e pehē koā ke u mamata ki he ‘Āngelo ‘a Sihova ‘o mātu‘aki femātaaki!

²³Pea folofola ‘a e ‘Eiki kiate ia, Melino pē ho loto; ‘oua te ke manavahē;

²⁴‘e ‘ikai te ke mate. Pea fokotu‘u ‘e Kitione ‘i he potu ko ia ha ‘ōlita ki he ‘Eiki, ‘o ne fakahingoa ia ko Sihova-Sālome (ko Sihova-ko-e-melino): ‘oku kei tu‘u ia ‘o a‘u ki he ‘aho ni ‘i ‘Ōfila ‘a ia ‘oku kau ki ha‘a ‘Apiesa.

²⁵Pea ‘i he pō ko ia na‘e folofola ‘a e ‘Eiki kiate ia, ‘Ave ‘a e pulu mui ‘a ho‘o ‘eiki, pea mo hono ua ‘o e pulu ‘oku fitu ta‘u,[25] pea holoki ‘a e ‘ōlita ‘o Peali, ‘a ia ‘oku ‘a ho‘o tangata‘eiki, pea tā ‘a e ‘āsela ‘oku tu‘u ai;

²⁶pea te ke fokotu‘u ha ‘ōlita kia Sihova ko ho ‘Otua ‘i he funga ‘o e talitau‘anga ni ‘aki ‘a e me‘a kuo ‘osi teu; pea ke to‘o hono ua ‘o e pulu,[26] ‘o fai‘aki ha feilaulau-mōifua, ‘o tutu ‘aki ‘a e ‘akau ‘o e ‘āsela ‘a ia kuo ke tā.

²⁷Pea ‘ave ‘e Kitione ha toko hongofulu ‘o ‘ene kau tamaio‘eiki, ‘o ne fai ‘o hangē ko e me‘a ‘a e ‘Eiki kiate ia: pea ko e me‘a ‘i he‘ene manavahē ki he fale ‘o ‘ene tamai, pea mo e kau tangata ‘o e kolo, na‘e ‘ikai te ne lava ke fai ‘aho, ka na‘a ne toki fai po‘uli.

²⁸Pea ‘i he ‘ā hengihengi ‘a e kau tangata ‘i he kolo tā kuo holoki ‘a e ‘ōlita ‘o Peali, pea kuo tā ‘a e ngaahi keke ta‘elēvani ‘aki ha efa ‘āsela na‘e tu‘u ai, pea ko hono ua ‘o e pulu kuo feilaulau ‘aki ‘i he ‘ōlita kuo fokotu‘u.

²⁹Pea nau fepehē‘aki, Ko hai tū kuo ne fai eni? Pea ‘i he‘enau fakatotolo mo ‘eke, na‘e tala, Ko Kitione ko e foha ‘o Soasi na‘a ne fai ‘a e me‘a ko ia.

³⁰Pea pehē ‘a e kau tangata ‘o e kolo kia Soasi, ‘Omi ho foha kitu‘a ke ne mate; koe‘uhi kuo ne holoki ‘a e ‘ōlita ‘o Peali, pea kuo ne tā ‘a e ‘āsela na‘e tu‘u ai.

³¹Pea lea ‘a Soasi kiate kinautolu kotoa pē na‘e tu‘u mai kiate ia, Te mou taukapo‘i ‘a Peali, ‘e kimoutolu? pea te mou fakahaofi ia? Ko ia te ne taukapo‘i ia ke ne mate pē kei pongipongi. Kapau ko e ‘otua ia, tuku ke ne taukapo‘i ia ‘e ia, he kuo ne holoki hono ‘ōlita.

³²Ko ia na‘e fakahingoa ia ‘i he ‘aho ko ē ko Selupeali (ko Taukapo‘i-‘e-Peali)[27] he‘ene pehē, Ke talatalaaki‘i ia ‘e Peali, he kuo ne holoki hono ‘ōlita.

³³Pea fakatahataha ‘a Mitiani kātoa mo e kau ‘Amaleki, mo e ngaahi ha‘a ‘Ālepea, ‘o nau a‘a mai, ‘e fokotu‘u tēniti mei he potu fonua ‘i lalo ‘o Sisilili.

³⁴Ka ko e Laumālie ‘o Sihova na‘e kofu ‘aki ‘a Kitione, pea ne ifi ‘a e talupite; pea na‘e fakataha mai ‘a ‘Apiesa, ‘o muimui kiate ia.

³⁵Pea ne tuku atu ha kau talafekau ki ha‘a Manase kātoa, pea na‘e fakataha mai mo kinautolu ‘o muimui kiate ia: pea ne tuku atu ha kau talafekau kia ‘Āseli mo Sepulone mo Nafitalai, pea na‘a nau ‘alu hake ke fakafetaulaki kiate kinautolu.

³⁶Pea fakatau folofola ‘a Kitione kia ‘Elohimi, Kapau ko ho‘o fai ke fakahaofi ‘a ‘Isileli ‘aki hoku nima, ‘o hangē ko ho‘o me‘a, ko eni, te u tuku ha fulufulu‘i sipi ki he mala‘e uite;

³⁷kapau ‘e hausia ‘a e fulufulu‘i sipi pē, kae mātu‘u ‘a e kelekele kotoa, pea te u toki ‘ilo ai te ke fakamo‘ui ‘a ha‘a ‘Isileli ‘aki hoku nima, ‘o hangē ko ho‘o me‘a.

³⁸Pea na‘e pehē; he na‘a ne tu‘u hengihengi hake, ‘o ne kuku ‘a e fulufulu‘i sipi, ‘o ne tatau mei ai ‘a e hahau, pea fonu ha tisi ‘i he vai.

³⁹Pea fakatau folofola ‘a Kitione kia ‘Elohimi, Ke ‘oua na‘a tuputāmaki ‘a e ‘Afiona kiate au, he ko ‘eku lea tātu‘otaha pē ‘eni; ka u sivi mu‘a ‘aki ‘a e fulufulu‘i sipi, ‘o tātu‘otaha pea ngata. Ke mōmoa mu‘a ‘a e fulufulu‘i sipi pē, kae hausia ‘a e kelekele kotoa.

⁴⁰Pea na‘e fai pehē ‘e he ‘Otua ‘i he pō ko ia: he ko e fulufulu‘i sipi pē na‘e mōmoa, kae ‘i he funga kelekele kotoa ‘a e hahau.