Read KO E TOH TAPU KATOA TONGA KAU FAKAMAAU 7 Bible Online

KAU FAKAMAAU 7 - KO E TOH TAPU KATOA TONGA bible

KAU FAKAMAAU 7

¹PEA, ko Selupeali (‘a ia ko Kitione) pea mo e kakai kotoa na‘e ‘iate ia, na‘a nau tu‘u hengihengi hake, ‘o nau fokotu‘u tēniti ofi ki he vai ko Hāloti: pea ko e ‘apitanga ‘o Mitiani na‘e tu‘u mai mei he tokelau, mei he mo‘unga ‘o Mole ‘i he fonua ‘i lalo.

²Pea folofola ‘a e ‘Eiki kia Kitione, ‘o pehē, Ko e kakai ‘oku ‘iate koe ‘oku tokolahi fau ke u tuku ai ‘a Mitiani ki honau nima; na‘a pōlepole ‘a ‘Isileli kiate au, ‘o pehē, Ko hoku nima ni kuo ne fakamo‘ui au.

³Ka ko eni ke ke fanongonongo mu‘a ke ‘ilo ‘e he kakai, ‘o pehē, ‘Ilonga ha manavahē mo tailiili, ke ne foki ‘o fakatakamilo ‘i he mo‘unga ko Kiliati. Pea na‘e foki ai ha toko ua mano mā toko ua afe ‘o e kakai: pea ko e toko taha mano pē na‘e toe.

⁴Pea folofola ‘a e ‘Eiki kia Kitione, ‘Oku kei tokolahi fau ‘a e kakai: taki hifo kinautolu ki he vai, pea te u sivi kinautolu ma‘au, pea ‘ilonga ‘a ia te u lea ai kiate koe, ‘o pehē, Ko eni ‘e ‘alu mo koe, pea ‘e ‘alu ia mo koe; ka ka ‘ilonga ‘a kinautolu te u pehē ki ai, ‘E ‘ikai ‘alu ia mo koe, pea ‘e ‘ikai ‘alu ia.

⁵Ko ia na‘a ne taki hifo ‘a e kakai ki he vai: Pea folofola ‘a e ‘Eiki kia Kitione, ‘Ilonga ‘a ia ‘oku hepo ha me‘a mei he vai ‘aki hono ‘elelo, ‘o hangē ko e hepo ‘a ha kulī, te ke tukukehe ia: pehē foki ‘a kinautolu ‘oku tū‘ulutui ke inu.

⁶Pea ko e lau ‘o e kakai na‘e hepo ‘i he ‘ai honau nima ki honau ngutu ko e toko tolungeau; ka ko hono toe ‘o e kakai na‘a nau tū‘ulutui ke inu ‘a e vai.

⁷Pea folofola ‘a e ‘Eiki kia Kitione, Te u fakamo‘ui kimoutolu ‘aki ‘a e toko tolungeau na‘e hepo, pea te u tuku ‘a e kau Mitiani ki ho nima: ka ke ‘alu ‘a e kakai kotoa pē takitaha ki hono feitu‘u.

⁸Ko ia na‘a nau to‘o ‘a e ‘oho ‘o e kakai, pea mo ‘enau ngaahi talupite, ka ne tukuange ‘a e kakai ‘Isileli kotoa ke ‘alu takitaha ki hono tēniti; ka ne ta‘ofi mai ‘a e toko tolungeau pē: pea ko e ‘apitanga ‘o Mitiani na‘e tu‘u mai mei he fonua ‘i lalo.

⁹Pea ‘i he pō ko ia na‘e folofola mai ‘a e ‘Eiki kiate ia ‘o pehē, Tu‘u, ‘o ‘alu hifo ki he ‘apitanga tau; he kuo u tuku ia ki ho nima.

¹⁰Ka ‘o kapau ‘oku ke manavahē ke ‘alu hifo, ‘alu hifo mo ho‘o talavou ko Fiula;

¹¹pea te ke fanongo ki he‘enau lau, pea hili ia ‘e mālohi ho nima ke hifo ki he ‘apitanga tau. Pea ne ‘alu hifo ai mo ‘ene talavou ko Fiula ki he ngata‘anga ‘o e kau to‘o mahafu na‘e ‘i he ‘apitanga.

¹²Pea ko e kau Mitiani mo e kau ‘Amaleki, mo e ngaahi ha‘a ‘Ālepea, na‘a nau fakaholo atu ‘i he fonua ‘i lalo, ‘o hangē ha he‘e honau tokolahi; pea ko e me‘a ki he‘enau fanga kāmeli na‘e ‘ikai malau, ‘ene hangē ko e ‘one‘one ‘i he matātahi hono lahi.

¹³Pea ‘i he a‘u atu ‘a Kitione, pea tā ‘oku fakamatala ‘e ha tangata ‘ene misi ki ha toko taha kehe, ‘o ne pehē, Siini, na‘a ku misi, pea tā ko ha keke mā pa‘ale na‘e teketeka hifo ki he ‘apitanga tau ‘o Mitiani, ‘o ne a‘u ki he Tēniti, ‘o taa‘i ia, pea holo, ‘o ne fulihi ia ke mafuli, pea tekefili ‘i lalo ‘a e Tēniti.

¹⁴Pea tali ‘e he taha, ‘o pehē, ‘Oku ‘ikai ko e me‘a kehe ia, ka ko e heletā ‘a Kitione ko e foha ‘o Soasi ko ha tangata ‘Isileli; kuo tuku ki hono nima ‘e ‘Elohimi ‘a Mitiani mo hono kotoa ‘o e hōsitē.

¹⁵Pea ‘i he fanongo ‘e Kitione ki he lau ‘o e misi mo hono faka‘uhinga, na‘a ne fai ‘ene lotu; pea ne foki ki he ‘apitanga ‘o ‘Isileli, ‘o ne pehē, Mou tu‘u, he kuo tuku ‘e Sihova ‘a e tau ‘a Mitiani ki homou nima.

¹⁶Pea na‘a ne vahevahe ‘a e toko tolungeau ko e vāhenga ‘e tolu, pea na‘a ne tuku ke nau to‘o talupite kotoa pē, mo ha nge‘esi sioki, pea mo e ngaahi tūhulu ‘i he loto sioki.

¹⁷Pea na‘a ne pehē kiate kinautolu, Mou sio kiate au, ‘o fa‘ifa‘itaki: pea ko eni, ka u ka a‘u atu ki he ngata‘anga ‘o e ‘apitanga, pea ‘ilonga ha me‘a te u fai, mou fai pehē foki.

¹⁸Pea ka u ka ifi talupite ‘e au, mo kinautolu ‘oku ‘iate au, pea mou ifi talupite foki kimoutolu mei he potu kehekehe, ‘o takatakai ki he ‘apitanga kotoa, pea mou kaila ‘o pehē, ‘A Sihova mo Kitione!

¹⁹Pea na‘e a‘u ‘a Kitione mo e toko teau na‘e ‘iate ia ki he ngata‘anga ‘o e ‘apitanga, ‘i he kamata‘anga ‘o e uasi loto, kuo toki fokotu‘u ‘a e kau le‘o; pea na‘a nau ifi talupite, ‘o ha‘aki ‘a e ngaahi sioki na‘a nau to‘o.

²⁰‘Io, ko e tolu‘i vāhenga na‘a nau ifi talupite, mo ha‘aki ‘a e ngaahi sioki, pea na‘a nau puke ‘a e ngaahi tūhulu ‘i honau nima to‘ohema, mo e talupite ‘i honau to‘omata‘u ke ifi;

²¹pea nau kalanga, Ko e Heletā ‘a Sihova mo Kitione! Pea tu‘u ‘a e tangata takitaha ‘i hono tu‘unga, ‘o takatakai ki he ‘apitanga; pea felelei ‘a e hōsitē kotoa, ka nau kaila pē mo faka‘ohovale‘i.

²²‘Io, na‘a nau ifi ‘a e tolungeau‘i talupite, pea na‘e ‘ai ‘e he ‘Eiki ke nau fehokohoka‘i pē kinautolu ‘i he hōsitē kotoa; pea na‘e feholaki pē ‘a e tau kātoa, ‘o a‘u ki Pete-sita ‘i he hala ki Sāleta, ki he ngutuvai ‘o ‘Ēpelimehola, ki Tāpati.

²³Pea na‘e fakataha mai ‘a e kau ‘Isileli mei Nafitalai mo ‘Āseli, mo Manase kātoa, ke tuli ki he kau, Mitiani.

²⁴Pea kouna atu ‘e Kitione ha kau talafekau ki he fonua mo‘unga kotoa ‘o ‘Ifalemi ke fakahā, Mou ‘alu hifo ‘o hala tutu‘u kia Mitiani, ke puke mu‘a ‘a e ngaahi vai, ‘o a‘u ki Petapala mo Soatani. Ko ia na‘e tānaki mai ‘a e kau ‘Ifalemi kātoa; pea nau hala tutu‘u, ‘o ma‘u ‘a e ngaahi vai ‘o a‘u ki Petapala mo Soatani.

²⁵Pea na‘a nau puke ‘a e ongo ‘eiki Mitiani, ‘a ‘Ōlepi mo Sī‘ipi; pea nau tāmate‘i ‘a ‘Ōlepi, ‘i he Makatu‘u ‘o ‘Ōlepi, pea nau tāmate‘i ‘a Sī‘ipi ‘i he Tata‘o‘anga uaine ‘o Sī‘ipi; pea na‘a nau tuli atu kia Mitiani; pea na‘a nau ‘omi ‘a e ‘ulu ‘o ‘Ōlepi mo Sī‘ipi kia Kitione, ‘a ia na‘a ne ‘i he kauvai ‘o Soatani.