Read KO E TOH TAPU KATOA TONGA KAU FAKAMAAU 8 Bible Online

KAU FAKAMAAU 8 - KO E TOH TAPU KATOA TONGA bible

KAU FAKAMAAU 8

¹PEA lea ange ‘e he kau tangata ‘Ifalemi, Ko e hā kuo ke ngaohi pehē ai kimautolu, ‘o ‘ikai te ke ui kimautolu ‘i ho‘o ‘alu ke tau mo Mitiani? Pea na‘a nau lea mālohi kiate ia.

²Pea pehē ‘e ia kiate kinautolu, ‘E fakatatau ‘a e me‘a kuo u fai ki ho‘omoutolu? ‘Ikai ‘oku lelei hake ‘a e tufi ‘o e toenga kālepi ‘a ‘Ifalemi ‘i he ta‘u kotoa ‘o ‘Apiesa?

³Ko homou nima na‘e tuku ki ai ‘e he ‘Otua ‘a e ongo ‘eiki ‘o Mitiani, ‘a ‘Ōlepi mo Sī‘ipi: pea ko e hā ‘aku na‘e lava ke ofi ki ho‘omou me‘a ko ē? Pea na‘e toki lolou ‘enau ‘ita ‘i he‘ene fai ‘a e lea ko ia.

⁴Pea a‘u ‘a Kitione ki Soatani ke a‘a atu, ‘a ia mo e toko Tolungeau na‘e ō mo ia; kuo nau vaivai

⁵Pea lea ‘e ia ki he kakai Sūkote, ‘Omi mu‘a ha ngaahi fo‘i mā koe‘uhi ko e kakai ‘oku omi mo au; he ‘oku nau vaivai, pea ko ‘eku tuli ē kia Sipa mo Salamuna, ko e ongo Tu‘i Mitiani.

⁶Pea tali ‘a e hou‘eiki Sūkote, He ‘oku ‘i ho nima na ‘a e nima ‘o Sipa mo Salamuna ke mau foaki ha me‘akai ki ho‘o tau?

⁷Pea pehē ‘e Kitione, ‘Oua koā ke tuku ‘e Sihova ‘a Sipa mo Salamuna ki hoku nima, pea te u toki have‘i homou kakano ‘aki ‘a e ngaahi talatala ‘o e toafa, mo e talatala‘āmoa.

⁸Pea na‘a ne ‘alu hake mei ai ki Penueli, ‘o ne lea pehē kiate kinautolu; pea na‘e tali ki ai ‘e he kakai Penueli, ‘o hangē ko e tali ‘a e kakai Sūkote.

⁹Pea lea ‘e ia ki he kau Penueli foki, ‘o pehē, Ka u ka foki tu‘umālie, te u holoki ‘a e taua ni.

¹⁰Ka ko Sipa mo Salamuna na‘a na ‘i Kalikoa mo ‘ena ngaahi kongakau, fe‘unga nai mo e toko taha mano mo ha toko nima afe; ko e toe ia ‘o e fu‘u tau ‘o ha‘a ‘Ālepea: ka kuo tō ‘a e toko taha kilu mā ua mano na‘e to‘o heletā.

¹¹Pea ‘alu hake ‘a Kitione ‘i he hala ‘o e kau nofo tēniti, ‘i he potu hahake ‘o Nopa mo Siokipeha, ‘o ne taa‘i ‘a e ‘apitanga tau he na‘e nofo ta‘e‘amanaki ‘a e tau.

¹²Pea feholaki ‘a Sipa mo Salamuna, pea ne tuli ki ai, ‘o ne puke ‘a e ongo Tu‘i Mitiani, ‘a Sipa mo Salamuna, ‘o ne faka‘ohovale‘i ‘a e tau kotoa.

¹³Pea foki ‘a Kitione ko e foha ‘o Soasi mei he tau, ‘i he ‘alu hake ‘a e la‘ā.

¹⁴Pea ne puke ha talavou na‘e kau ki Sūkote, ‘o ne ‘eke kiate ia: pea na‘a ne tohi ma‘ana ‘a e hou‘eiki ‘o Sūkote, mo hono kau mātu‘a, ko e toko fitungofulu mā toko fitu.

¹⁵Pea na‘a ne a‘u ki he kakai Sūkote, ‘o ne pehē; Vakai, ko Sipa mo Salamuna eni, ‘a ia na‘a mou manukia ai au, ‘o pehē, ‘Oku ‘i ho nima ni ‘a e nima ‘o Sipa mo Salamuna, ke mau ‘atu me‘akai ki ho‘o kakai na ‘oku vaivai?

¹⁶Pea na‘a ne puke ‘a e kau mātu‘a ‘o e kolo, pea ne to‘o ‘a e ‘akau talatala ‘o e toafa, mo e talatala‘āmoa, ‘o ne ako ‘aki ‘a e kakai Sūkote.

¹⁷Pea ne holoki ‘a e taua ‘o Penueli, ‘o ne tāmate‘i ‘a e kakai ‘o e kolo.

¹⁸Pea ne pehē kia Sipa mo Salamuna, Na‘e fēfē ‘a e anga ‘o e kau tangata na‘a mou tāmate‘i ‘i Tepoa? Pea na‘a na pehē, Hangē ko koe na‘e pehē kinautolu; na‘e ngalingali kotoa pē ko e fānau ‘a ha tu‘i.

¹⁹Pea pehē ‘e ia, Ko hoku ngaahi tokoua kinautolu, ko e fānau ‘a ‘eku fa‘ē. Tangi mo‘oni ‘a e mo‘ui ‘a e ‘Eiki, ka ne mou fakamo‘ui kinautolu, ‘e ‘ikai te u tāmate‘i kimoua.

²⁰Pea ne pehē ki hono ‘uluaki foha ko Sēteli, Tu‘u, ‘o tāmate‘i kinaua. Ka ka ‘ikai unuhi ‘ene heletā ‘e he tama, he na‘a ne manavahē ko ‘ene kei talavou.

²¹Pea pehē ‘e Sipa mo Salamuna, Tu‘u koe, ‘o te‘ia kimaua; he ‘oku taau mo e tangata hono ivi. Pea tu‘u ai ‘a Kitione, ‘o ne tāmate‘i ‘a Sipa mo Salamuna, ‘o ne to‘o ‘a e fanga ki‘i māhina-kalipa na‘e ‘i he kia ‘o ‘ena fanga kāmeli.

²²Pea lea ‘a e kakai ‘Isileli kia Kitione, Pule koe kiate kimautolu, ‘a koe, mo ho foha, mo e foha ‘o ho foha; he kuo ke huhu‘i kimautolu mei he nima ‘o Mitiani.

²³Pea lea ‘a Kitione kiate kinautolu, ‘E ‘ikai te u pule kiate kimoutolu ‘e au, pea ‘e ‘ikai pule ‘a hoku foha kiate kimoutolu: ko Sihova pē ‘e pule kiate kimoutolu.

²⁴Pea pehē ‘e Kitione kiate kinautolu, ‘Oku ai ‘eku kole kiate kimoutolu, ke mou takitaha tuku mai ‘a e hau telinga na‘e ma‘u ‘i he vete; (he na‘a nau teunga koula, koe‘uhi ko e kau ‘Isime‘eli kinautolu).

²⁵Pea na‘a nau tali, Te mau mātu‘aki fie ‘atu pē. Pea na‘a nau folahi ha pulupulu, pea nau lī ki ai takitaha ‘a e hau telinga na‘e ‘i he‘ene vete.

²⁶Pea tā ko e mamafa ‘o e ngaahi hau koula kuo ne kole ko e sikeli koula ‘e taha afe mā fitungeau: tukukehe ‘a e fanga ki‘i māhina-kalipa, mo e ngaahi teunga tāupe, mo e ngaahi kofu kulokula na‘e kofu ‘aki ‘a e ongo Tu‘i Mitiani, pea tukukehe ‘a e ngaahi kahoa na‘e ‘i he kia ‘o ‘enau fanga kāmeli.

²⁷Pea ngaohi ‘aki ia ‘e Kitione ha ‘ēfoti, ‘o ne tuku ‘i hono kolo, ‘i ‘Ōfila; pea na‘e tango ki ai ‘a ha‘a ‘Isileli kātoa: pea na‘e hoko ia ko e tauhele kia Kitione mo hono fāmili.

²⁸Ko ia na‘e vaivai ‘a Mitiani ‘i he ‘ao ‘o ha‘a ‘Isileli, pea na‘e ‘ikai te nau toe hiki hake honau ‘ulu. Pea na‘e nonga ‘a e fonua ‘o fāngofulu ta‘u, ‘i he kuonga ‘o Kitione.

²⁹Pea ‘alu ‘a Selupeali, ko e foha ‘o Soasi, ‘o ne nofo ‘i hono fale.

³⁰Pea na‘e ma‘u ‘e Kitione ha ngaahi foha ‘e fitungofulu, ko e kakano ‘o hono manava: he na‘e tokolahi hono ngaahi uaifi na‘a ne ma‘u.

³¹Pea ko ‘ene sinifu na‘e nofo ‘i Sikemi, na‘a ne fā‘ele‘i mo ia foki hano foha, ‘o ne fakahingoa ia ko ‘Apimeleki.

³²Pea na‘e pekia ‘a Kitione ko e foha ‘o Soasi kuo ne a‘ua‘u lelei, pea na‘e telio ia ‘i he fonualoto ‘o ‘ene tamai ko Soasi ‘i ‘Ōfila, ‘a ia na‘e kau ki ha‘a ‘Apiesa.

³³Pea hili ‘a e pekia ‘a Kitione na‘e tafoki ‘a ha‘a ‘Isileli, ‘o nau tango ki he ngaahi Peali, ‘o nau ‘otua ‘aki ‘a Peali-pēliti.

³⁴Pea na‘e ‘ikai ke manatu ‘e ha‘a ‘Isileli kia Sihova ko honau ‘Otua, ‘a ia kuo ne fakahaofi kinautolu mei he nima ‘o honau ngaahi fili takatakai:

³⁵pea na‘e ‘ikai te nau fai ‘ofa ki he fale ‘o Selupeali Kitione, ‘o taau mo e fu‘u lelei kuo ne fai ma‘a ‘Isileli.