Read KO E TOH TAPU KATOA TONGA Sioné 3 1 Bible Online

Sioné 3 1 - KO E TOH TAPU KATOA TONGA bible

Sioné 3 1

¹TŪ ko au ko e Faifekau, ko ‘eku tohi kia Keio ko e ‘ofeina, ‘a ia ‘oku ou ‘ofa ki ai, he‘ete tu‘u ‘i he mo‘oni.

²Si‘i ‘ofa‘anga, ‘oku ou hūfia koe ke ke tu‘umālie ‘i he me‘a kotoa pē, kae‘uma‘ā ke ke mo‘ui lelei, ‘o hangē ko e tu‘umālie ‘a ho laumālie.

³He na‘a ku fiefia ‘aupito ‘i he omi ‘a e kāinga, ‘o nau fakahā ho‘o ma‘u ‘a e mo‘oni, ‘a ia ‘oku hoa mo e fai he mo‘oni ho‘o laka.

⁴‘Oku ‘ikai ha‘aku toe fiefia ‘oku lahi ‘i he me‘a ni, ‘a ‘eku fanongo ki he‘eku fānau, ‘oku nau laka ‘i he mo‘oni.

⁵Si‘i ‘ofa‘anga, ko e ngāue ngali lotu ia ‘oku ke fai, ‘i ho‘o fakafitefita‘a ma‘a e kāinga lotu, kae‘uma‘ā ‘a kinautolu ‘oku ‘āunofo;

⁶‘a ia na‘a nau fakamo‘oni ki ho‘o ‘ofa ‘i he ‘ao ‘o e siasi: pea ‘e mālō ho‘o ngāue ‘o kapau te ke moimoi‘i kinautolu ‘i ha anga ‘oku ngali mo e ‘Otua.

⁷He na‘a nau ‘alu atu koe‘uhi pē ko e Huafa, ‘o ‘ikai te nau to‘o ha me‘a mei he hīteni.

⁸Ko ia ‘oku totonu ke tau tauhi ‘e kitautolu ‘a e fa‘ahinga pehē, koe‘uhi ke tau hoko ko e kaungā ngāue mo kinautolu ki he mo‘oni.

⁹Na‘e ‘i ai ha me‘a na‘a ku tohi atu ki he Siasi na: ka ko ia ‘oku ne fie tāfataha ‘iate kinautolu, ‘a Taiotifi, ‘oku ‘ikai te ne tali kimautolu.

¹⁰Ko ia kapau te u ‘alu atu te u fakamanatu hake ‘ene ngaahi ngāue, ‘a e koto laukovi ‘oku ne fai kiate kimautolu, mo e ‘ikai te ne topono ai ka ne fakafisi ‘e ia ‘a e kāinga ni, mo ne ta‘ofi foki ‘a kinautolu na‘e loto ke tali, mo ne kapusi mei he siasi.

¹¹Si‘i ‘ofa‘anga, ‘oua te ke fa‘ifa‘itaki ki he kovi, ka ki he lelei. Ko ia ‘oku fai lelei ko e tupu mei he ‘Otua ia: ko ia ‘oku fai kovi kuo te‘eki ke ne mamata ki he ‘Otua.

¹²Ko e me‘a kia Temetelio, kuo fakamo‘oni ki he‘ene lelei ‘e he kakai kotoa pē, ‘io, pea ‘e he mo‘oni ‘e ia: kae‘uma‘ā ‘oku mau fakamo‘oni ‘e kimautolu foki, pea ‘oku ke ‘ilo ‘oku mo‘oni ‘a e fakamo‘oni ‘amautolu.

¹³Na‘e lahi ‘eku me‘a ke tohi atu ki ai, ka ‘oku ‘ikai te u fie tohi kiate koe ‘aki ‘a e vaitohi mo e peni:

¹⁴ka ‘oku ou ‘amanaki ‘e vave ‘eta fe‘iloaki, pea ta toki talanoa ngutu pē.

¹⁵Si‘oto‘ofa atu. ‘Oku ‘ofa atu ho ngaahi kaume‘a. Tala hoku ‘ofa ki hoku ngaahi kaume‘a tāutaha.