Read KO E TOH TAPU KATOA TONGA Siuta 1 Bible Online

Siuta 1 - KO E TOH TAPU KATOA TONGA bible

Siuta 1

¹TŪ ko au Siutasi, ko e tamaio‘eiki ‘a Sīsū Kalaisi, pea ko e tehina ‘o Sēmisi, ko ‘eku tohi kiate kimoutolu kuo ‘ofeina ‘i he ‘Otua ko e Tamai, pea kuo tauhi ma‘a Sīsū Kalaisi, ko e kakai kuo ui.

²‘Ofa ke fakalahi kiate kimoutolu ‘a e meesi mo e melino mo e ‘ofa.

³Si‘i ‘ofa‘anga, ‘i he hu‘u hoku loto ke fai ha tohi kiate kimoutolu ki he fakamo‘ui ‘oku ta taha ai, na‘e hā kiate au, kuo pau ke u tohi leva kiate kimoutolu ke enginaki ke mou fefa‘uhi he taukapo‘i ‘a e tokāteline na‘e ‘omi tu‘o taha ki he kakai lotu.

⁴He kuo moulu mai ha tu‘unga tangata, ‘io, ‘a kinautolu kuo loa honau tohi ki he fakamo‘ua ko ia, ‘a ia ko e kau faka‘otuamate, ‘o nau liliu ‘a e kelesi ‘a hotau ‘Otua ‘o fai‘anga pau‘u fakalielia, kae‘uma‘ā ‘oku nau fakafisinga‘i ‘a e ‘Eiki Motu Taha mo hotau ‘Eiki ko Sīsū Kalaisi.

⁵Ka ‘oku ou fie fakamanatu pē, (he na‘e ai ha taimi na‘a mou ‘ilo hono kotoa), na‘e fakahaofi ‘e Sīsū ‘a e kakai mei ‘Isipite, pea ne toki faka‘auha ‘a kinautolu na‘e ‘ikai tui.

⁶Ko e kau ‘āngelo foki, ‘a kinautolu na‘e ‘ikai te nau tauhi ‘a e tu‘unga na‘e ‘onautolu, ka nau li‘aki honau nofo‘anga totonu, ‘oku mo‘u tauhia ‘a kinautolu ‘e he ‘Ene ‘Afio ‘i he ngaahi ha‘i ta‘engata ‘i he lalo fakapo‘uli, ‘o a‘u ki he fakamaau ‘o e ‘Aho Lahi.

⁷Ko Sōtoma foki mo Komola, mo e ngaahi kolo na‘e tu‘u takai ki ai, ‘a ia na‘a nau tuli ki he fe‘auaki, ‘o hangē tofu pē ‘a e fa‘ahinga ko ē, ‘o nau afe ki ha fa‘ahinga kakano kehe, ko ia kuo fokotu‘u kinautolu ko e taipe, honau mo‘ua he tautea totonu, ko e afi ta‘engata.

⁸Ka neongo ia, ka ko e fa‘ahinga fai misi na ‘oku nau fakamousa‘a pehē ‘a e kakano, mo nau ta‘etoka‘i ‘a hou‘eiki; ‘io, ‘oku nau tālalakulaku ki he fa‘ahinga lāngilangi‘ia.

⁹Ka ko Maikeli, ko e ‘āngelo pule, ‘i he‘ene fakakikihi mo e Tēvolo, he‘ena tālanga‘i ‘a e sino ‘o Mōsese, tala‘ehai na‘a ne ta‘e‘apasia, ‘o lea ‘asi ke lau ‘ene kovi; ka na‘a ne me‘a, Ke lōmia koe ‘e he ‘Eiki.

¹⁰Ka ko e kau siana ni, ka ‘ilonga ha me‘a ‘oku ‘ikai te nau ‘ilo ki ai ‘oku nau laukovi ki ai; pea ‘ilonga ha me‘a ‘oku nau ‘ilo fakaenatula pē, ‘o tatau mo e fanga manu ta‘e‘atamai, ko e ngaahi me‘a ko ia ‘oku nau fakalusa ai kinautolu.

¹¹‘Oiauē ‘a kinautolu! he kuo nau ‘alu ‘i he ‘alunga ‘o Keini, ‘o nau tafe atu ‘i he hē ‘a Pēlami ko e sio totongi, pea nau ‘auha ‘i he angatu‘u ‘a Kola.

¹²Ko eni ia ‘a e ngaahi hakau ‘oku tu‘u ‘i ho‘omou ngaahi kātoanga ‘ofa, he‘enau keinanga ta‘e‘apasia mo kimoutolu mo nau tauhi kinautolu pē. Ko e ngaahi ‘ao ta‘ehano vai kinautolu, ‘oku leleekina ‘e he ngaahi matangi; ko e ngaahi ‘akau ‘i fakaafumate ‘oku ta‘efua, kuo mate tu‘o ua, kuo ta‘aki fu‘u;

¹³ko e ngaahi peau fasi ‘o e tahi ‘oku nau koa ‘aki ‘enau ngaahi ngāue fakamā; ko e ngaahi fetu‘u hē, ‘a ia kuo tauhi ma‘anautolu ‘a e po‘uli ‘o e kaupō‘uli ‘o ta‘engata.

¹⁴‘Io, na‘e kau foki kiate kinautolu ‘a e palofisai ‘a ‘Īnoke, ko hono toko fitu meia ‘Ātama, he‘ene pehē, Vakai! ne hoko mai ‘a e ‘Eiki ‘oku ha‘ofia ia ‘e hono ngaahi toko mano tapu.

¹⁵Ke fai fakamaau ki hē kakai kotoa pē, pea ke fakamo‘oni ki he kau faka‘otuamate kotoa pē ‘enau ngaahi ngāue faka‘otuamate kotoa pē, ‘a ia kuo nau fai ‘ilo pē, pea mo e ngaahi lea fefeka kuo fai kiate ia ‘e hē kau angahala faka‘otuamate.

¹⁶Ko e kakai ko ia ko e koto lāunga, ko e ta‘etōli‘a ‘i honau tufakanga kuo tō, ‘oku nau fou ‘i he ngaahi holi ‘anautolu; pea ‘oku lau me‘a lalahi honau ngutu, ‘o nau filifilimānako ko e sio me‘a.

¹⁷Ka ko kimoutolu, si‘i ‘ofa‘anga, ke mou manatu ki he ngaahi lea na‘e lea‘aki ‘i mu‘a ‘e he kau ‘Aposetolo ‘a hotau ‘Eiki ko Sīsū Kalaisi:

¹⁸hē na‘a nau tala kiate kimoutolu, ‘o pehē, Tokua ‘e hoko ‘i he kuonga fakamui ha kau manuki ‘oku fou ‘i hē ngaahi holi ‘anautolu, ko e koto faka‘otuamate,

¹⁹‘a ia ko e kakai ia‘oku nofo mavahe, ko e koto fakaenatula pē, ‘o ‘ikai ma‘u ‘a e Laumālie.

²⁰Ka ko kimoutolu, si‘i ‘ofa‘anga, mou fai homou langa hake ‘i he me‘a toputapu kuo mou tui ki ai, mo mou lotu ‘i he Laumālie Mā‘oni‘oni,

²¹mo tauhi ai kimoutolu ‘i he ‘ofa ‘a e ‘Otua; ‘o mou nofo‘aki tali ki he meesi ‘a hotau ‘Eiki ko Sīsū Kalaisi, ‘o a‘u ki he mo‘ui ta‘engata.

²²Pea ko e ni‘ihi ke mou lea o‘o ki ai ‘i he‘enau fakakikihi mai;

²³ka ko ho‘omou fakamo‘ui ‘a e ni‘ihi, hamusi pē mei he afi; ka ko e ni‘ihi ke mou ‘ofa ki ai mo tailiili, ‘o mou fakalili‘a foki ki honau kofu, he kuo pani he kakano.

²⁴Pea ko ‘Ene ‘Afio, ‘a ia ‘oku ne mafai ke tauhi kimoutolu ke ‘oua ‘e humu, pea ke fokotu‘u kimoutolu ‘i he ‘ao ‘o ‘Ene ‘Afio, ‘oku mou ta‘emele, pea ‘oku mou hākailangitau;

²⁵‘io, ko e ‘Otua pē taha, ‘a ia ko hotau Fakamo‘ui ‘ia Sīsū Kalaisi ko hotau ‘Eiki — ke ‘o ‘Ene ‘Afio ‘a e kolōlia mo e lāngilangi‘ia mo e māfimafi mo e pule, mei ‘ītāniti, pea ‘i onopooni, pea ke ‘osi‘osingamālie ‘a e ngaahi kuonga. ‘Ēmeni.