Read KO E TOH TAPU KATOA TONGA KO E ME‘A FAKAHĀ 1 Bible Online

KO E ME‘A FAKAHĀ 1 - KO E TOH TAPU KATOA TONGA bible

KO E ME‘A FAKAHĀ 1

¹KO E ME‘A FAKAHĀ ‘e Sīsū Kalaisi mei he Ta‘ehāmai, ‘a ia na‘e tuku kiate ia ‘e he ‘Otua, ke fakahā ki he kau tamaio‘eiki ‘a ‘Ene ‘Afio ‘a e ngaahi me‘a kuo pau ke ho ko leva; ‘o ne fekau atu ‘i he‘ene ‘āngelo, ke fakahā fakatātā atu ia ki he‘ene tamaio‘eiki ko Sione:

²‘A ia kuo ne fakamatala ‘a e folofola ‘a e ‘Otua, mo e fakamo‘oni na‘e fai ‘e Sīsū Kalaisi, ‘io, ‘a e ngaahi me‘a kehekehe na‘a ne sio ki ai.

³Monū‘ia ā ka ko ia ‘oku lau, mo kinautolu ‘oku fanongo ki he ngaahi lea ‘o e palofisai ni, mo tauhi ‘a e ngaahi me‘a kuo tohi ai: he kuo panaki hono taimi.

⁴Tū ko au Sione, ko ‘eku tohi ki he siasi ‘e fitu ‘oku ‘i ‘Ēsia. ‘Ofa ke mou ma‘u kelesi mo e fiemālie meia ‘Oku-‘i-ai mo Na‘e-‘i-ai mo Kaha‘u; pea mei he Laumālie Fitu ‘oku ‘i he ‘ao ‘o e taloni ‘o ‘Ene ‘Afio;

⁵pea meia Sīsū Kalaisi ko e Fakamo‘oni Falala‘anga, ko e ‘Uluaki na‘e fakatupu mei he kau Pekia, mo e Pule ‘o e ngaahi Tu‘i ‘o māmani.

⁶Ko ia ‘oku ne ‘ofa kiate kitautolu, pea ne fufulu kitautolu mei he‘etau ngaahi angahala ‘aki hono ta‘ata‘a ‘o‘ona, pea ne ngaohi kitautolu ko e pule‘anga, ko e ngaahi taula‘eiki ki he ‘Otua ko ‘Ene Tamai — ke ‘o ‘Ene ‘Afio ‘a e kolōlia mo e aoniu, ‘o ta‘engata, ‘Ēmeni.

⁷Vakai, ‘oku ne ho ko mai mo e ngaahi ‘ao; pea ‘e mamata kiate ia ‘e he mata kotoa pē, ‘io, mo kinautolu na‘a nau hoka‘i ia: pea ‘e lau‘aitu ‘a e ngaahi matakali kotoa pē ‘o māmani koe‘uhi ko ia. ‘Io, ‘Ēmeni.

⁸‘Oku folofola mai ‘a ‘Ene ‘Afio ko e ‘Otua, Ko au ko e ‘Ālifa mo e ‘Ōmeka, ko ‘Oku-‘i-ai mo Na‘e-‘i-ai mo Kaha‘u, ko e Aoniu.

⁹Ko au Sione, ko homou tokoua, mo e ‘inasi fakataha mo kimoutolu ‘i he mamahi mo e pule‘anga mo e kātaki ‘oku ‘ia Sīsū — na‘a ku nofo ‘i he motu ‘oku ui ko Patimosi, koe‘uhi ko e folofola ‘a e ‘Otua, mo e fakamo‘oni na‘e fai ‘e Sīsū.

¹⁰‘Iloange na‘a ku Laumālie‘ia ‘i he ‘aho ‘o e ‘Eiki, pea na‘e ongo mei hoku tu‘a ha fu‘u le‘o, ‘o hangē ha talupite ‘oku lea mai,

¹¹‘o pehē, Ko e me‘a ‘oku ke sio ki ai ke ke tohi ‘i ha tohi, pea ‘ave ki he siasi ‘e fitu; ki ‘Efesō, pea ki Sīmana, pea ki Peakamosi, pea ki Taiataila, pea ki Sātisi, pea ki Filatelifia, pea ki Leotisia.

¹²Pea ne u tafoki ke vakai pe ko e hā ‘a e le‘o ‘oku talanoa mo au. Pea ‘i he‘eku tafoki, na‘a ku vakai ha tu‘unga maama koula ‘e fitu,

¹³pea ‘i he lotolotonga ‘o e ngaahi tu‘unga maama ha to ko taha na‘e hangē ko e Fanautama ‘a Tangata, kuo ne ‘ai ha kofu tōtōlofa, pea no‘o koula ‘i hono fatafata.

¹⁴Ko hono fofonga mo hono lau na‘e hinaekiaki, hangē ko e fulufulu‘i sipi hinehina, ‘io, hangē ko e sinou; pea ko hono ongo fo‘i fofonga na‘e hangē ha ulo‘i afi;

¹⁵pea ko hono ongo va‘e na‘e hangē ko e palasa ‘afu hina, hangē kuo ta‘o ‘i ha ngoto‘umu; pea ko hono le‘o na‘e hangē ko e le‘o ‘o e ngaahi vai lahi.

¹⁶Pea na‘e ‘i hono nima to‘omata‘u ha fetu‘u ‘e fitu; pea na‘e ‘alu atu mei hono ngutu ha heletā fakatoumata na‘e māsila; pea ko hono fōtunga na‘e hangē ko e la‘ā he‘ene ulo mālohi.

¹⁷Pea ‘i he‘eku mamata kiate ia, ne u hinga atu ki hono va‘e ‘o hangē ha mate. Pea na‘a ne ala kiate au ‘aki hono nima to‘omata‘u, ‘o ne folofola mai, ‘Oua te ke manavahē; ko au ko e ‘Uluaki mo e Kimui:

¹⁸pea ko Mo‘ui au, pea na‘a ku mate, pea vakai ‘oku ou mo‘ui ‘o lauikuonga pea ta‘engata; pea ‘oku ‘iate au ‘a e ngaahi kī ‘o Mate mo Hētesi.

¹⁹Tohi pē ‘a e ngaahi me‘a kuo ke mamata ki ai, mo hono ‘uhinga, pea mo e ngaahi me‘a ‘oku ene ke ho ko hili ‘eni;

²⁰‘io, ko e misiteli ‘o e fetu‘u ‘e fitu na‘a ke sio ki ai ‘i hoku nima to‘omata‘u, pea mo e tu‘unga maama koula ‘e fitu. Ko e fetu‘u ‘e fitu ko e kau ‘āngelo ia ‘o e siasi ‘e fitu: pea ko e tu‘unga maama ko ia ‘e fitu, ko e ngaahi siasi ‘e fitu ia.