Read KO E TOH TAPU KATOA TONGA KO E ME‘A FAKAHĀ 10 Bible Online

KO E ME‘A FAKAHĀ 10 - KO E TOH TAPU KATOA TONGA bible

KO E ME‘A FAKAHĀ 10

¹PEA u vakai ha ‘āngelo mālohi ‘e taha ‘oku ne ‘alu hifo mei langi, kuo kofu ‘aki ha ‘ao, pea na‘e ‘i hono fofonga ‘a e ‘umata, pea ko hono fōtunga na‘e hangē ko e la‘ā, pea ko hono ongo va‘e na‘e hangē ha ongo pou afi:

²pea na‘a ne to‘o ha ki‘i tohi kuo folahi, pea na‘a ne ‘ai hono va‘e to‘omata‘u ki he tahi, mo e to‘ohema ki he fonua,

³pea ne kalanga le‘o lahi, ‘o hangē tofu pē ko ha kālou ‘a ha laione: pea ‘i he‘ene kalanga leva pea fai ‘e he mana ‘e fitu ‘enau lea.

⁴Pea ‘i he fai leva ‘e he mana ‘e fitu ‘enau lea, na‘a ku ofa ke tohi: pea ongo mai ha le‘o mei he langi na‘e pehē mai, Sila‘i pē ‘a e ngaahi me‘a na‘e lea‘aki ‘e he mana ‘e fitu, ‘o ‘oua ‘e tohi ia.

⁵Pea ko e ‘āngelo ‘a ia na‘a ku vakai ‘oku ne tu‘u ‘i he tahi mo e fonua, na‘a ne hiki hono nima to‘omata‘u ki he langi,

⁶‘o ne lea tuki kiate Ia ‘oku ne mo‘ui ‘o lauikuonga pea ta‘engata, ‘a ‘Ene ‘Afio na‘a ne ngaohi ‘a e langi mo e ngaahi me‘a ‘oku ‘i ai, mo e fonua mo e ngaahi me‘a ‘oku ‘i ai, mo e tahi mo e ngaahi me‘a ‘oku ‘i ai, Tokua ‘oku ‘ikai kei toe ha taimi:

⁷ka ‘i he ngaahi ‘aho ‘o e lea ‘a hono fitu ‘o e ‘āngelo, ‘oka ofa ‘aki ‘e ia ke ifi, pea fakakakato ai ‘a e misiteli faka‘otua, ‘o hangē ko ‘ene ongoongolelei na‘a ne tuku ki he‘ene kau tamaio‘eiki ‘a e kau palōfita.

⁸Pea ko e le‘o na‘e ongo mai mei langi na‘e toe lea mai ‘o pehē, ‘Alu ‘o to‘o ‘a e tohi ‘a ia ‘oku folahi ‘i he nima ‘o e ‘āngelo ‘oku tu‘u ‘i he tahi mo e fonua.

⁹Pea u ‘alu ki he ‘āngelo, ‘o u tala kiate ia ke ne tuku mai ‘a e ki‘i tohi. Pea ne pehē mai kiate au, To‘o pē, ‘o kai ke ‘osi ia: pea ‘e konā ai ho kete, ka ‘i ho ngutu te ne ifo melie ‘o hangē ha honi.

¹⁰Pea u to‘o ‘a e ki‘i tohi mei he nima ‘o e ‘āngelo, pea u kai ia ‘o ‘osi; pea ‘i hoku ngutu na‘e hangē ko e honi ‘ene melie; pea ‘i he ‘osi ‘eku kai ia na‘e toki konā ai hoku kete.

¹¹Pea na‘a nau pehē kiate au, Kuo pau te ke toe palofisai ki ha ngaahi fa‘ahinga, mo ha ngaahi pule‘anga, mo ha ngaahi lea, mo ha tu‘i to ko lahi.