Read KO E TOH TAPU KATOA TONGA KO E ME‘A FAKAHĀ 13 Bible Online

KO E ME‘A FAKAHĀ 13 - KO E TOH TAPU KATOA TONGA bible

KO E ME‘A FAKAHĀ 13

¹PEA u vakai ‘oku ‘alu hake mei he tahi ha manu fekai, na‘e nifo hongofulu pea ‘ulu fitu pea na‘e ‘ai ‘i hono ngaahi nifo ha ngaahi kalauni ‘e hongofulu, pea tohi ‘i hono ngaahi ‘ulu ha ngaahi hingoa fie ‘otua.

²Pea ko e manu na‘a ku vakai na‘e hangē ko e lēpati, pea ko hono va‘e na‘e hangē ko e va‘e ‘o ha pea, pea ko hono ngutu na‘e hangē ko e ngutu ‘o ha laione: pea na‘e tuku kiate ia ‘e he Talākoni ‘a ‘ene mālohi ‘a‘ana mo hono taloni, mo ‘ene fu‘u pule.

³Pea ko e taha ‘o hono ngaahi ‘ulu na‘e hangē kuo te‘ia ‘o mate: ka na‘e faito‘o hono te‘ia ko ia: pea tulimui ‘a māmani ki he manu fekai ‘oku nau ofongi ia.

⁴Pea nau hū ki he Talākoni, koe‘uhi kuo ne tuku ‘ene pule ki he manu fekai: pea nau hū ki he manu, ‘o nau pehē, Ko hai ‘oku tatau mo e manu fekai? pea ko hai ‘oku kākunga ke fai tau mo ia?

⁵Pea na‘e ‘ange ki ai ha ngutu lau me‘a lalahi, mo fie ‘otua; pea na‘e fakangofua ke ne ngāue ‘i he māhina ‘e fāngofulu mā ua.

⁶Pea ne tāngaki hono ngutu ke tālalakulaku ki he ‘Otua, ke laukovi ki hono huafa, mo hono Tāpanekale, ‘a kinautolu ‘oku nofo Tāpanekale ‘i he langi.

⁷Pea na‘e ‘ange ki ai ke ne fai tau mo e fa‘ahinga tapu, pea ke ne ikuna kinautolu: pea na‘e tuku kiate ia ‘a e pule ki he matakali kotoa pē, mo e fa‘ahinga, mo e lea, mo e pule‘anga.

⁸Pea ‘e hū kiate ia ‘a kinautolu kotoa pē ‘oku nofo ‘i he funga fonua, ‘a ia takitaha kuo ‘ikai tohi hono hingoa ‘i he tohi ‘o e mo‘ui ‘a e Lami, ‘a ia na‘e tāmate‘i talu mei he tanupou ‘o māmani.

⁹‘Ilonga ha taha ‘oku telinga, ke ne ongo‘i.

¹⁰‘Ilonga ha taha kuo tonu pā ki he pōpula, te ne mole pe ki he pōpula: ‘ilonga ‘a ia kuo tonupā ki he mate heletā kuo pau ke mate heletā. ‘Oku ‘i he me‘a ni ‘a e kātaki mo e tui ‘a e kakai lotu.

¹¹Pea u vakai ha manu fekai ‘e taha na‘e ‘alu hake mei he fonua, pea na‘a ne nifo ua hangē ko ha lami, pea na‘a ne lea hangē ko ha talākoni.

¹²Pea na‘a ne fai ‘a e pule kotoa ‘o e ‘uluaki manu fekai, ‘i he ‘ao ‘o e manu ko ia, pea na‘a ne ngaohi ‘a e fonua mo kinautolu ‘oku nofo ai, ke hū ki he ‘uluaki manu, ‘a e manu na‘e faito‘o hono te‘ia ke mate.

¹³Pea ‘oku ne fai ‘a e ngaahi me‘a fakaofo lahi, ‘io, ‘oku ne tuputupulefanua ke ‘alu hifo ‘a e afi mei he langi ki he fonua ‘i he ‘ao ‘o e kakai.

¹⁴Pea ‘oku ne kākaa‘i ‘a e kakai ‘oku nofo ‘i he fonua, koe‘uhi ko e ngaahi me‘a fakaofo na‘e tuku ke ne fai ‘i he ‘ao ‘o e manu fekai; he‘ene tala ki he kakai ‘oku nofo ‘i he fonua ke nau ngaohi ha ‘īmisi ‘o e manu, ‘a e manu na‘e taa‘i ‘aki ‘a e heletā kae toe mo‘ui.

¹⁵Pea na‘e tuku kiate ia ke ‘ange ha laumālie ki he ‘īmisi ‘o e manu fekai, koe‘uhi ke lea foki ‘a e ‘īmisi ‘o e manu, pea ke pule ke tāmate‘i ‘a kinautolu kotoa pē ‘e ‘ikai te nau hū ki he ‘īmisi ‘o e manu.

¹⁶Pea ‘oku ne kouna ‘a e kakai kotoa pē, ‘a e iiki mo e lalahi, ‘a e koloa‘ia mo e masiva, ‘a e tau‘atāina mo e pōpula, ke nau ‘ai kiate kinautolu ha faka‘ilonga ‘i honau nima to‘omata‘u, pe ‘i honau la‘e:

¹⁷pea ke ‘oua na‘a lava ha taha ke fakatau mai pe fakatau atu, ‘o kapau ‘oku ‘ikai ‘iate ia ‘a e faka‘ilonga ko ia, ‘a ia ko e hingoa ‘o e manu fekai, pe ko e fika ‘o hono hingoa.

¹⁸‘Oku ‘i he me‘a ni ‘a e poto. Ko ia ‘oku ‘atamai, ke ne fatu ‘a e fika ‘o e manu fekai; he ko e fika fakaetangata ia: pea ko hono fika ko e onongeau mā onongofulu mā ono.