Read KO E TOH TAPU KATOA TONGA KO E ME‘A FAKAHĀ 18 Bible Online

KO E ME‘A FAKAHĀ 18 - KO E TOH TAPU KATOA TONGA bible

KO E ME‘A FAKAHĀ 18

¹HILI ia na‘a ku vakai ha ‘āngelo ‘e taha ‘oku ‘alu hifo mei he langi, kuo ‘iate ia ha mālohi lahi; pea na‘e hulu‘ia ‘a māmani ‘i hono ngingila.

²Pea na‘a ne kalanga fu‘u le‘o lahi, ‘o pehē, Kuo tōkilalo, kuo tōkilalo ‘a fu‘u Pāpilone, Pea kuo ho ko ko e nofo‘anga tēvolo, Ko e pilīsone ‘o e fa‘ahikehe fuli pē, Mo e fīnaki ‘o e manupuna kotoa pē ‘oku ta‘ema‘a mo fehi‘anekina.

³He kuo tōkilalo ‘a e pule‘anga kotoa pē, He‘enau inu mei he uaine, Ko e tautea ‘o ‘ene fe‘auaki: Pea kuo fai fe‘auaki mo ia ‘a e ngaahi tu‘i ‘o māmani; Pea ko e kau mesianiti ‘o māmani Kuo nau koloa‘ia ko e me‘a ‘i he lahi ‘O ‘ene mo‘ui faka‘ei‘eiki.

⁴Pea na‘e ongo mai ha le‘o ‘e taha mei he langi na‘e pehē, Hiki meiate ia, ‘e hoku kakai, Ke ‘oua na‘a mou kau ‘i he‘ene hia, Pea ‘inasi ‘i hono tautea.

⁵He kuo a‘u hake ki langi ‘ene ngaahi angahala, Pea kuo manatu ‘e he ‘Otua ki he‘ene ngaahi fai ta‘etotonu.

⁶‘Ē, mou totongi kiate ia, ‘O hangē ko e totongi na‘a ne fai ‘e ia; Pea ‘ange tu‘o ‘ua Ki he‘ene ngaahi me‘a tu‘o ua; ‘O fakatatau ki he‘ene ngaahi ngāue, Ko e ipu na‘a ne fakatau ki ai lōua, Mou fakatau ki ai ma‘ana ke lōua.

⁷Tuku kiate ia ‘a e tautea mo e mamahi, ‘O fakatatau ki he‘ene fakafielahi mo ‘ene mo‘ui faka‘ei‘eiki: Koe‘uhi ko ‘ene pehē ‘i hono loto, ‘Oku ou nofo ko e kuini, Pea ‘oku ‘ikai ko e uitou au, Pea ‘e ‘ikai te u ‘ilo ha mamahi.

⁸Ko ia ‘e ho ko mai ‘i ha ‘aho pē taha Hono ngaahi tautea, ‘A e mate mo e mamahi mo e honge; Pea ‘e tutu ia ‘i he afi: He ‘oku mālohi ‘a e ‘Otua ‘A ia kuo ne fakamāu‘i ia.

⁹Pea ‘e tēngihia ia mo tangifetukia ia ‘e he ngaahi tu‘i ‘o māmani, ‘a kinautolu na‘a nau fe‘auaki mo ia, mo mo‘ui fakahākonoa, ‘i he‘enau mamata ki he kohu ‘o ‘ene vela.

¹⁰‘Oku nau tutu‘u mei he mama‘o pē, ko e me‘a ‘i he‘enau manavahē ki he‘ene mamahi, ‘o nau pehē, ‘Oiauē! ‘oiauē! ‘a e fu‘u kolo na, si‘i Pāpilone, Ko e kolo mālohi! He kuo ho ko ‘i ha houa pē taha ‘A ho fakamāu‘i.

¹¹Pea ko e kau mesianiti ‘o māmani ‘oku nau tangi mo fakamamahi ‘iate ia; koe‘uhi ‘oku ‘ikai kei fakatau ‘e ha taha ‘enau koloa:

¹²‘a ‘enau uta koula, mo e siliva, mo e makakoloa, mo e mata‘itofe, mo e tupenu mahu‘inga, mo e kofu kulokula, mo e silika, mo e kula ‘aho‘aho; ‘a e ‘akau namu kakala kehekehe, mo e ngaahi ipu lei kehekehe, mo e ngaahi ipu ‘akau mahu‘inga lahi, mo e ipu palasa mo ukamea mo māpele,

¹³mo e sinamoni, mo e me‘a pani, mo e ‘inisēnisi, mo e mula, mo e laipeno, mo e uaine, mo e lolo, mo e mahoa‘a lelei, mo e uite, mo e fanga manu, mo e fanga sipi, mo e fanga hoosi, mo e ngaahi sāliote, mo e kakai, kae‘uma‘ā ‘a e ngaahi laumālie ‘o e kakai.

¹⁴Pea kuo mole meiate koe ‘a e me‘a na‘a ke tō ta‘u ki ai, ‘a e ngaahi me‘a na‘e holi ki ai ho‘o mo‘ui; ‘io, kuo ‘auha meiate koe ho‘o ngaahi me‘a kotoa pē na‘e ifoifolelei mo matamatalelei, pea ‘e ‘ikai ‘aupito te ke toe ‘ilo ia.

¹⁵Ko e kau mesianiti na‘a nau fakatau ‘a e ngaahi me‘a ko ia, ‘o nau ma‘u koloa ai mei he fefine, te nau tutu‘u mei he mama‘o ko e me‘a ‘i he‘enau manavahē ki he‘ene mamahi, ‘o nau tangi mo fakamamahi,

¹⁶mo nau pehē, ‘Oiauē! ‘oiauē! ‘a e fu‘u kolo na! ‘a e kolo na‘e kofu ‘aki ‘a e tupenu mahu‘inga, Mo e kofu kulokula, Mo e kula ‘aho‘aho; Mo teu ‘aki ‘a e koula, Mo e makakoloa, Mo e mata‘itofe!

¹⁷He kuo to‘o meiate ia ‘i he ‘aho pē taha ‘a e koloa ko ia na‘e pehē fau. Pea ‘ilonga ha toutai, pea ‘ilonga ha tangata fai folau, mo e ngaahi kauvaka, mo ia kotoa pē ‘oku ngāue ‘i tahi, na‘a nau tutu‘u mei he mama‘o.

¹⁸Pea ‘i he‘enau sio ki he kohu ‘o ‘ene vela na‘a nau kalanga ‘o pehē, Ko hai ‘oku tatau mo e fu‘u kolo na!

¹⁹Pea na‘a nau laku efu ki honau ‘ulu, pea nau kalanga ‘i he‘enau tangi mo fakamamahi, ‘o pehē, ‘Oiauē! ‘oiauē! ‘a e fu‘u kolo na, ‘A ia na‘e ma‘u koloa ai ‘a e kakai kotoa pē, Na‘e ma‘u vaka ke folau ‘i tahi, Koe‘uhi ko ‘ene mo‘ui ‘aki ‘a e me‘a mahu‘inga! He kuo lusa ‘i ha houa pē taha.

²⁰Fiefia pē ‘a langi ‘i he fefine, Mo kimoutolu ‘a e kau lotu, ‘A e kau ‘Aposetolo mo e kau Palōfita; He kuo fakamaau ‘e he ‘Otua ho‘omou me‘a, ‘O ‘eke kiate ia.

²¹Pea na‘e hanga ‘e ha to ko taha, ko e ‘āngelo mālohi, ‘o ne hiki ha fu‘u maka hangē ha maka momosi, ne lī ki tahi, ‘o ne pehē, ‘E pehē foki ‘a e makamu hifo ‘a e fu‘u kolo ko Pāpilone ‘i hono lī hifo, pea ‘e ‘ikai ‘aupito toe ‘iloa.

²²‘Io, ‘e ‘ikai ‘aupito toe ongona ‘iate koe ‘a e tā ‘a e kau tā ha‘ape, mo e kau faiva, mo e kau ifi fangufangu, mo e kau ifi talupite; pea ‘e ‘ikai toe ‘iloa ‘iate koe ‘a e kau ngāue ‘i he faiva kehekehe, pea ‘e ‘ikai toe ongona ‘iate koe ‘a e longoa‘a ‘o e me‘a momosi;

²³pea ‘e ‘ikai toe ulo ‘iate koe ha maama, pea ‘e ‘ikai toe ongona ‘iate koe ha le‘o ‘o ha tangata-ta‘ane mo ha ta‘ahine: koe‘uhi ko ho‘o kau mesianiti ko e hou‘eiki ia ‘o māmani, pea na‘e takihē‘i ‘a e ngaahi pule‘anga kotoa pē ‘e ho‘o fai fakalou‘akau.

²⁴Kae‘uma‘ā na‘e ‘ilo ‘iate ia ‘a e toto ‘o e kau palōfita mo e kakai lotu; mo kinautolu kotoa pē kuo mate tāmate‘i ‘i māmani.