Read KO E TOH TAPU KATOA TONGA KO E ME‘A FAKAHĀ 21 Bible Online

KO E ME‘A FAKAHĀ 21 - KO E TOH TAPU KATOA TONGA bible

KO E ME‘A FAKAHĀ 21

¹PEA u vakai ha langi fo‘ou mo ha fonua fo‘ou: he ne mole ‘a e ‘uluaki langi mo e ‘uluaki fonua; pea ‘oku ‘ikai kei tu‘u ‘a e tahi.

²Pea u vakai ‘a e kolo tapu, ‘a Selusalema Fo‘ou, ‘oku ‘alu hifo mei langi mei he ‘Otua, kuo ‘osi teuteu, ‘o hangē ha ta‘ahine, kuo ‘ai teunga ki hono husepāniti.

³Pea ongo mai ha fu‘u le‘o mei he taloni, ‘oku ne pehē, Ko eni, ko e Tāpanekale ‘o e ‘Otua, ‘Oku tu‘u mo e kakai. Pea ‘e nofo hono Sikaina mo kinautolu, Pea te nau nofo ko hono kakai; Pea ‘e nofo ‘e He‘ene ‘Afio, Ko e ‘Otua ‘oku kau ma‘anautolu, ‘Io, ko honau ‘Otua.

⁴Pea te ne holoholo ‘a e lo‘imata kotoa pē mei honau mata; Pea ‘e ‘ikai toe ai ha mate, Pea ‘e ‘ikai toe ai ha mamahi, pe ha tangi, pe ha ongosia; Kuo mole ‘a e ngaahi me‘a mu‘a.

⁵Pea folofola ‘e ia na‘e ‘afio ‘i he taloni, Ko eni ‘oku ou fakafo‘ou ‘a e me‘a kotoa pē. Pea ne pehē mai, Tohi, he ko e ngaahi lea ko eni ‘oku ala falala ki ai, pea ko e mo‘oni ‘o e mo‘oni.

⁶Pea ne folofola mai, KUO FAI. Ko au ko e ‘Ālifa mo e ‘Ōmeka, ko e Kamata‘anga mo e Ngata‘anga. ‘Ilonga ‘a e fieinu te u tuku kiate ia ke ne inu ta‘etotongi mei he matavai ‘o e vai ‘o e mo‘ui.

⁷Ko ia ia te ne ikuna, ‘e tō mo‘ona ‘a e ngaahi me‘a ni, pea te u nofo ko hono ‘Otua, pea te ne nofo ko hoku foha.

⁸Ka ko e kau fo‘i, mo e ta‘etui, mo e fakalielia‘ia, mo e fakapō, mo e fe‘auaki, mo e fai fakalou‘akau, mo e kau tauhi ‘aitoli, mo e kau loi kotoa pē, te nau ‘inasi ‘i he ano ‘oku ulo afi mo sūlifa; ‘a ia ko e mate ‘angaua.

⁹Pea na‘e ha‘u ha to ko taha ‘i he kau ‘āngelo ‘e to ko fitu, ‘a ia na‘e ‘iate kinautolu ‘a e ngaahi ipu ‘e fitu na‘e fonu ‘i he tautea fakamui ‘e fitu; pea na‘a ne lea kiate au, ‘o pehē, Ha‘u, ka u fakahā kiate koe ‘a e Ta‘ahine ko e Uaifi ‘o e Lami.

¹⁰Pea na‘e ne ‘ave au, he‘eku Laumālie‘ia, ki ha mo‘unga lahi mo mā‘olunga, ‘o ne fakahā kiate au ‘a e Kolo Tapu, ko Selusalema, ‘oku ‘alu hifo mei he langi mei he ‘Otua;

¹¹‘oku ‘i ai ‘a e Sikaina ‘o e ‘Otua; pea ko hono ngingila na‘e hangē ha makakoloa fungani, ‘o hangē ha maka siasipa fakakilisitala.

¹²Na‘e ai hono ‘ā lahi, mo mā‘olunga: na‘e ai hono matapā ‘e hongofulu mā ua, pea tu‘u ‘i he ngaahi matapā ha ‘āngelo ‘e hongofulu mā ua, pea tohi ai ha ngaahi hingoa, ‘a ia ko e ngaahi hingoa ‘o e ngaahi matakali ‘e hongofulu mā ua ‘o ha‘a ‘Isileli.

¹³Na‘e tolu ‘a e matapā ki hahake; pea tolu ‘a e matapā ki he tokelau; pea tolu ‘a e matapā ki he tonga; pea tolu ‘a e matapā ki hihifo.

¹⁴Pea ko e ‘ā ‘o e kolo na‘e hongofulu mā ua hono maka tu‘unga, pea tu‘u ai ‘a e hingoa ‘e hongofulu mā ua ‘o e kau ‘Aposetolo ‘e hongofulu mā ua ‘a e Lami.

¹⁵Pea ko ia na‘e talanoa mo au na‘e ne to‘o ha fua, ko ha kaho koula, ke ne fua ‘aki ‘a e kolo, mo hono ngaahi matapā, mo hono ‘ā.

¹⁶Pea ‘oku tapafā ‘a e kolo, pea ko hono lōloa ‘oku tatau mo hono māukupu; pea na‘a ne fua ‘a e kolo ‘aki ‘a e kaho, pea ne a‘u ki he ngaahi vahevalu ‘e taha mano mā ua afe ‘o e maile; ko hono lōloa mo hono māukupu mo hono mā‘olunga ‘oku tatau pē.

¹⁷Pea na‘a ne fua hono ‘ā, ko e kiupite ‘e teau mā fāngofulu mā fā:[8] ko e fua fakaetangata ia, he ko e fua faka‘āngelo ia.[9]

¹⁸Pea ko e me‘a na‘e langa ‘aki hono ‘ā ko e siasipa: pea ko e kolo ko e koula haohaoa, hangē ko e sio‘ata haohaoa.

¹⁹Ko e ngaahi makatu‘unga ‘o e kolo na‘e teu ‘aki ‘a e makakoloa kehekehe. Ko e ‘uluaki makatu‘unga ko e siasipa; ko hono ua, ko e sāfaia; ko hono tolu, ko e kalisitone; ko hono fā, ko e ‘emalata;

²⁰ko hono nima, ko e satoniki; ko hono ono, ko e sātio; ko hono fitu, ko e kalisolaite; ko hono valu, ko e pelili; ko hono hiva, ko e tōpasi; ko hono hongofulu, ko e kelai-sāpaso; ko hono hongofulu mā taha, ko e siasini; ko hono hongofulu mā ua, ko e ‘ametisi.

²¹Pea ko e matapā ‘e hongofulu mā ua, ko e ngaahi mata‘itofe ia ‘e hongofulu mā ua, na‘e ngaohi ‘a e ngaahi matapā takitaha ‘aki ha mata‘itofe ‘e taha: pea ko e hala ‘o e kolo ko e koula haohaoa, ‘o hangē ha sio‘ata ‘asinisini.

²²Pea na‘e ‘ikai te u sio ‘i ai ki ha temipale: he ko hono temipale ‘o‘ona ‘a ‘Ene ‘Afio ko e ‘Otua Aoniu, pea mo e Lami.

²³Pea na‘e ‘ikai ‘aonga ‘a e la‘ā ki he kolo, pe ko e māhina, ke ulo ki ai: he na‘e fakamaama ia ‘e he Sikaina ‘o e ‘Otua; pea ko hono maama ko e Lami.

²⁴Pea ‘e hā‘ele ‘a e ngaahi kakai ko e me‘a ‘i he‘ene maama; pea ko e ngaahi tu‘i ‘o māmani te nau ‘omi honau nāunau kiate ia.

²⁵Pea ko hono ngaahi matapā ‘e ‘ikai ‘aupito tāpuni ‘aho; he ‘oku ‘ikai ha pō ‘i he feitu‘u ko ia.

²⁶Pea te nau ‘omi ki ai ‘a e nāunau mo e me‘a mahu‘inga ‘o e ngaahi kakai.

²⁷Pea ‘e ‘ikai ‘aupito hū ki ai ha momo‘i me‘a ‘oku ta‘etaau, pe ‘oku fai fakalielia, pe ‘oku loi: ngata pē ‘iate kinautolu kuo tohi ‘i he tohi ‘o e mo‘ui ‘a e Lami.