Read KO E TOH TAPU KATOA TONGA KO E ME‘A FAKAHĀ 4 Bible Online

KO E ME‘A FAKAHĀ 4 - KO E TOH TAPU KATOA TONGA bible

KO E ME‘A FAKAHĀ 4

¹HILI ia pea u vakai, pea tā ko e matapā kuo fakaava ‘i langi, pea ko e le‘o na‘e fua ongo mai kiate au hangē ko e talupite, na‘e lea mai ‘o pehē, Ha‘u ki ‘olunga ni, pea te u faka‘ali‘ali kiate koe ‘a e ngaahi me‘a kuo pau ke ho ko ‘amui.

²Pea u Laumālie‘ia leva: pea tā ko e taloni na‘e tu‘u ‘i langi, pea na‘e ‘afio ha Toko Taha ‘i he taloni.

³Pea ko Ia na‘e ‘afio ai, na‘a ne hā hangē ko e maka ko e siasipa, mo e sātio: pea na‘e takatakai ki he taloni ‘a e ‘umata, ‘o hā hangē ko e ‘emalata.

⁴Pea takatakai ki he taloni na‘e ‘i ai ha ngaahi taloni ‘e uofulu mā fā: pea na‘e nofo ‘i he taloni ‘e uofulu mā fā ko ia ha kau mātu‘a, kuo nau ‘ai kofu hinehina, pea kuo ‘ai ki honau fofonga ha kalauni koula.

⁵Pea na‘e ‘alu atu ma‘u pē mei he taloni ha ngaahi ‘uhila, mo e ngaahi le‘o, mo e ngaahi mana; pea na‘e ulo ‘i he mu‘a taloni ha ngaahi maama afi ‘e fitu, ‘a ia ko e Laumālie Fitu ‘o e ‘Otua.

⁶Pea ko e ‘ao ‘o e taloni na‘e hā ‘o hangē ko e tahi sio‘ata ia, ‘o tatau mo e kilisitala; pea ‘i he loto taloni, na‘e ‘i ai ha me‘a mo‘ui ‘e to ko fā, kuo tofu kano‘i mata honau sino ‘i ‘ao mo tu‘a.

⁷Pea ko e ‘uluaki me‘a mo‘ui na‘e hangē ko e laione, pea ko hono ua ‘o e me‘a mo‘ui na‘e hangē ko e pule, pea ko hono tolu ‘o e me‘a mo‘ui ko hono fōtunga na‘e hangē ko e tangata, pea ko hono fā ‘o e me‘a mo‘ui na‘e hangē ko e ‘īkale ‘oku puna.

⁸Pea ko e ngaahi me‘a mo‘ui ‘e fā ko ia tāutaha na‘a nau taki ono ‘a e kapakau; takatakai ki he ngaahi kapakau ko ia, pea ‘i he ‘aofi kapakau, na‘a nau tofu kano‘i mata: pea ‘oku ‘ikai ha‘anau mālōlō, he‘enau lea ‘i he ‘aho mo e pō, ‘o pehē, ‘Ēī Mā‘oni‘oni! ‘Ēī Mā‘oni‘oni! ‘Ēī Mā‘oni‘oni! ‘a e ‘Afiona ko e ‘Otua, ko e ‘Eiki Aoniu! ‘a e ‘Afiona na‘e ‘i ai, pea ‘oku ‘i ai, pea ‘oku ha‘u!

⁹Pea ‘oka fai ‘e he ngaahi me‘a mo‘ui ‘enau tuku kolōlia mo e faka‘apa‘apa mo e fakafeta‘i kiate ia ‘oku ‘afio ‘i he taloni, ‘a ‘Ene ‘Afio ‘oku mo‘ui ‘o lauikuonga pea ta‘engata,

¹⁰pea toki mape‘e ki lalo ‘a e mātu‘a ‘e to ko uofulu mā fa ‘i he ‘ao ‘o Ia ‘oku ne ‘afio‘i he taloni, pea nau fai ‘enau hū kiate Ia ‘oku mo‘ui ‘o laukuonga pea ta‘engata, pea nau laku honau ngaahi kalauni ki he ‘ao ‘o e taloni he‘enau pehē,

¹¹Taau pē Koe, ‘a e ‘Afiona ko homau ‘Otua, Ke lau ki ai ‘a e kolōlia, mo e faka‘apa‘apa, mo e mafai: He ko koe ia na‘a ke ngaohi ‘a e me‘a kotoa pē, Pea na‘a nau ‘i ai, pea na‘e ngaohi kinautolu, Koe‘uhi pē ko ho finangalo ia.