Read KO E TOH TAPU KATOA TONGA KO LUTE 1 Bible Online

KO LUTE 1 - KO E TOH TAPU KATOA TONGA bible

KO LUTE 1

¹PEA ko eni, ‘i he taimi na‘e pule ai ‘a e Kau Fakamaau na‘e honge ‘a e fonua. Pea na‘e ‘alu ha tangata mei Pētelihema-Siuta ke ‘āunofo ‘i he tuku‘uta ‘o Moape, ‘a ia mo hono uaifi mo hono ongo foha.

²Pea ko e hingoa ‘o e tangata ko ‘Elimeleki, pea ko hono uaifi ka Neomai, pea ko hono ongo foha ko Māloni mo Kilioni, ko e tu‘unga ‘Efalata kinautolu mei Pētelihema-Siuta. Pea na‘a nau a‘u ki he tuku‘uta ‘o Moape, ‘o nofo ai.

³Pea pekia ‘a ‘Elimeleki ko e husepāniti ‘o Neomai; pea na‘e tuku ‘a e finemotu‘a mo ‘ene ongo tama.

⁴Pea na mali mo ha ongo fafine Moape; ko e hingoa ‘o e taha ko ‘Opa, pea ko e taha ko Lute: pea nau nofo ai ‘o hongofulu ta‘u nai.

⁵Pea pekia ‘a Māloni mo Kilioni fakatou‘osi; pea tuku ‘a e finemotu‘a ta‘eha‘ane ongo tama mo hano husepāniti.

⁶Pea nau tutu‘u, ‘e ia mo e ongo uaifi ‘o ‘ene ongo tama, ke ne foki mei he tuku‘uta ‘o Moape: he kuo ne fanongo ‘i he tuku‘uta ‘o Moape kuo ‘a‘ahi ‘a e ‘Eiki ki hono kakai, he‘ene tuku ke nau ma‘u me‘akai.

⁷Pea ne ‘alu atu mei he potu kuo ne nofo ai, pea ō mo ia ‘ene ongo fafine; pea nau fou ‘i he hala ke foki ki he fonua ‘o Siuta.

⁸Pea lea ‘a Neomai ki he‘ene ongo fafine, Ō, ‘o foki takitaha ki he fale ‘o ‘ene fa‘ē; tauange mo Sihova ke ne fai ‘ofa kiate kimoua, ‘o hangē ka ho‘omo fai ki he pekia,

⁹Ke tuku mai ‘e Sihova ke mo ma‘u ha mālōlō‘anga takitaha ‘i he fale ‘o hano husepāniti. Pea ne toki ‘uma kiate kinaua; pea nau ofa‘aki ‘enau fākafoa.

¹⁰Pea na pehē kiate ia, ‘Ikai, ka te tau foki mo koe ki ho kakai.

¹¹Ka ka pehē ‘e Neomai, Foki atu pē, nga‘ata; ko ‘etau omi mo au koe‘uma‘ā? ‘Oku toe koā ha ngaahi tama ‘i hoku manava ke mali mo kimoua?

¹²Foki ā, nga‘ata, ‘o ō; he kuo u motu‘a fau ke toe ma‘u husepāniti. Ka ne u pehē ‘oku ai ha‘aku ‘amanaki ki ai, ‘io, ka ne u ma‘u ha tangata he pō ni, ‘o u fā‘ele‘i ha ongo tama; te mo tatali koā ki he‘ena tangata?

¹³te mo nofo alafianga ai koā, ‘o ta‘ema‘u husepāniti? ‘Oua, nga‘ata; he ‘oku ou mamahi telia kimoua,[1] he kuo tō kiate au ‘a e tā ‘a Sihova.

¹⁴Pea nau toe ofa‘aki ‘enau fākafoa: pea ‘uma ‘a ‘Opa ki he‘ene fa‘ē;[2] ka ka pīkitai ki ai ‘a Lute.

¹⁵Pea pehē ‘e he finemotu‘a; Vakai, kuo foki ho tokoua ki hono kakai, pea ki hono ‘otua:[3] muimui koe ki ho tokoua.

¹⁶Ka ka pehē ‘e Lute, ‘Oua te ka o‘i au ke li‘aki koe, pea ke tuku ‘eku muimui ‘iate koe: he ko e potu ‘oku ke ‘alu ki ai, te u ‘alu ki ai au; pea ko e potu ‘oku ke mohe ai, te u mohe ai: ko ho kakai ko hoku kakai, pea ko ho ‘Otua ko hoku ‘Otua:

¹⁷ko e potu te ke pekia ai, te u pekia ai, pea ‘e tanu ai au. ‘Ilo ‘e au, ‘o lahi hake, ‘o kapau ‘e ai ha me‘a ‘e fakamāvae kitaua, ko e mate pē.[4]

¹⁸Pea ‘i he vakai ‘e he finemotu‘a kuo pau hono loto ke omi mo ia, na‘a ne tuku ‘ene lea ki ai.

¹⁹Pea na fononga ai kinaua, ‘o na a‘u ki Pētelihema. Pea ‘i he‘ena hū ki Pētelihema, pea ngatētē tu‘u ‘a e kolo kotoa kiate kinaua, pea pehē ‘e he kau fefine, Ko Neomai koā eni?

²⁰Pea ne pehē kiate kinautolu, ‘Oua ‘e ui au ko Neomai (ko Melie), ui au ko Mala (ko Kona); he kuo fai kona ‘a Sātai kiate au.

²¹Na‘a ku ‘alu atu kuo u fonu, pea kuo fakafoki au ‘e Sihova kuo u maha: ko e hā ‘oku mou ui ai au ko Neomai; ‘osi, kuo hopo mo au ‘a Sihova, pea kuo fakamamahi‘i au ‘e Sātai?

²²Ko ia na‘e foki ‘a Neomai, pea omi mo ia ‘a Lute, ko e uaifi ‘o ‘ene tama, ko e fefine Moape, ko ‘ena foki mei he tuku‘uta ‘o Moape: pea na‘a na a‘u ki Pētelihema ‘i he kamata utu ‘a e ta‘u pa‘ale.