Read KO E TOH TAPU KATOA TONGA KO LUTE 4 Bible Online

KO LUTE 4 - KO E TOH TAPU KATOA TONGA bible

KO LUTE 4

¹KA kuo ‘alu hake ‘a Poasi ki he matanikolo, ‘o ne nofo ai: pea ‘iloange na‘e laka ange ‘a e koeli na‘e lau ki ai ‘e Poasi; pea ne pehē, ‘E Me‘a, afe mai, ‘o nofo heni.

²Pea ne afe mai ‘o nofo. Pea ne fili ha tu‘unga tangata ‘e toko hongofulu ‘i he mātu‘a ‘o e kolo, ‘o ne pehē, Mou nofo hē. Pea nau nofo.

³Pea ne pehē ki he koeli, Ko Neomai kuo foki mei he tuku‘uta ‘o Moape ‘oku ne tala fakatau ‘a e konga vao, ko e tofi‘a ‘o hota kāinga ko ‘Elimeleki:

⁴pea u pehē ke u fanafana kiate koe, ‘o pehē, Fakatau ia ‘i he ‘ao ‘o e nofo ni, ‘io, ‘i he ‘ao ‘o e mātu‘a ‘o hoku kakai, Kapau ‘oku ke loto ke huhu‘i, pe‘i huhu‘i; ka ‘o kapau ‘e ‘ikai te ke huhu‘i, pea tala mai ke u ‘ilo: he tala‘ehai ‘oku toe ai ha taha ke huhu‘i, ko koe pē; pea ‘oku hoko mo au. Pea ne pehē, Te u huhu‘i pē.

⁵Pea pehē ange ‘e Poasi, Ko e ‘aho ‘oku ke fakatau ai ‘a e konga vao meia Neomai, te ke fakatau ai ‘ia Lute Moape foki,[6] ko e uaifi ‘o e pekia, ke fakamo‘ui ‘a e hingoa ‘o e pekia ‘i hono tofi‘a.

⁶Pea pehē ‘e he koeli, ‘E ‘ikai te u lava ke huhu‘i mo‘oku, na‘a ku maumau‘i ‘a e tofi‘a ‘o‘oku: ma‘u pē koe hoku lakanga koeli; he ‘ikai te u lava ke koeli ‘e au.

⁷Pea ko e anga mu‘a ‘i ‘Isileli eni ‘i he fai koeli mo e fetongi me‘a, ke fakapapau ‘a e me‘a kotoa pē, na‘e to‘o ‘e he tangata hono sū, ‘o ‘ange ki he taha; pea ko e fakamo‘oni ia ‘i ‘Isileli.

⁸Ko ia na‘e pehē ‘e he koeli kia Poasi, Fakatau ia mo‘ou. ‘O ne to‘o hono sū.[7]

⁹Pea pehē ‘e Poasi ki he mātu‘a, pea ki he kakai kotoa, Ko e kau fakamo‘oni kimoutolu he ‘aho ni kuo u fakatau ‘a e me‘a kotoa ‘o ‘Elimeleki, mo e me‘a kotoa ‘o Kilioni mo Māloni, meia Neomai.

¹⁰Pea ko Lute foki ko e fefine Moape, ko e uaifi ‘o Māloni, kuo u fakatau ia mooku ‘unoho, ke fakamo‘ui ‘a e hingoa ‘o e pekia ‘i hono tofi‘a, ke ‘oua na‘a mole ‘a e hingoa ‘o e pekia mei he lau ‘o hono kāinga, pe mei he matanikolo ‘o hono feitu‘u: ko e kau fakamo‘oni kimoutolu he ‘aho ni.

¹¹Pea pehē ‘e he kakai kotoa na‘e ‘i he matanikolo, pea mo e tu‘unga mātu‘a, Ko e fakamo‘oni kimautolu. Tauange mo e ‘Eiki ke hoko ‘a e fefine kuo hū ki ho fale ke hangē ko Lesieli, pea hangē ko Lia, ‘a e ongo me‘a na‘a na langa ‘a e fale ‘o ‘Isileli: pea ke kaukaua koe ‘i ‘Efalata, mo ongoongoa ‘i Pētelihema:

¹²pea ke hoko ho fale ke hangē ko e fale ‘o Felesi, ‘a ia na‘e fā‘ele‘i ‘e Tema kia Siuta, ‘i ha hako ‘e ‘atu kiate koe ‘e Sihova ‘i he ta‘ahine ni.

¹³Pea mali ‘a Poasi mo Lute, ‘o na nonofo; pea ne ‘alu kiate ia, pea tuku ‘e he ‘Eiki ke ne feitama, ‘o ne fā‘ele‘i ha tama tangata.

¹⁴Pea na‘e pehē ‘a e kau fefine kia Neomai, Mālō mo e ‘Eiki, he ‘ikai te ne tuku koe he ‘aho ni ta‘eha koeli; pea ‘ofa ke ongoongoa hono hingoa ‘i ‘Isileli.

¹⁵Pea te ne hoko ko e fakaato ‘o ho‘o mo‘ui, pea te ke kaukauola ki ai ‘i ho‘o a‘ua‘u: he ko e fā‘ele‘i ia ‘e ho‘o ta‘ahine ne ‘ofa kiate koe ‘a ia ‘oku mahu‘inga ‘i ha tama ‘e toko fitu.

¹⁶Pea to‘o ‘e Neomai ‘a e tamasi‘i, ‘o ne ‘ai ki hono fatafata,[8] ‘o ne hoko ko hono tauhi.

¹⁷Pea na‘e fakahingoa ia ‘e he kau fefine na‘e nofo ofi he‘enau pehē, Kuo fanau‘i ha tamasi‘i kia Neomai; ko ia na‘a nau ui ia ko ‘Ōpeti (Ko e Taha-ke-tauhi): ko e tamai ia ‘a Sese, ‘a ia ko e tamai ‘a Tēvita.

¹⁸Pea ko e tohi eni ‘o e hako ‘o Felesi: na‘e tupu ‘ia Felesi ‘a Hēloni;

¹⁹pea tupu ‘ia Heseloni ‘a Lame, pea tupu ‘ia Lame ‘a ‘Aminatape;

²⁰pea tupu ‘ia ‘Aminatape ‘a Na‘asoni, pea tupu ‘ia Na‘asoni ‘a Salemone;

²¹pea tupu ‘ia Salemone ‘a Poasi, pea tupu ‘ia Poasi ‘a ‘Ōpeti;

²²pea tupu ‘ia ‘Ōpeti ‘a Sese, pea tupu ‘ia Sese ‘a Tēvita.