Read KO E TOH TAPU KATOA TONGA KO 1 SĀMIUELA 14 Bible Online

KO 1 SĀMIUELA 14 - KO E TOH TAPU KATOA TONGA bible

KO 1 SĀMIUELA 14

¹PEA ko e ‘aho ‘e taha na‘e pehē ‘e Sonatane, foha ‘o Saula, ki he tama na‘e fua ‘ene mahafu, Ha‘u, ta laka ange ki he le‘o Filisitia mei hena. Ka na‘e ‘ikai te ne tala ki he‘ene tamai.

²Pea ko Saula na‘e nofo ‘i he taupotu ‘o Kipea, ‘i he lolo pomikānite na‘e ‘i Mikiloni; pea ko e kakai na‘e ‘iate ia na‘e toko onongeau nai;

³pea ko ‘Āhaia na‘e ‘ai ‘ēfoti, ‘a ia ko e foha ‘o ‘Ahitupi, ko e tokoua ‘o ‘Ikapote, foha ‘o Finiasi, foha ‘o ‘Īlai, ko e taula‘eiki ‘a Sihova ‘i Sailo. Pea na‘e ‘ikai ‘ilo ‘e he kakai kuo ‘alu ‘a Sonatane.

⁴Pea ‘i he vaha‘a ‘o e ongo hū‘anga, ‘a ia na‘e feinga ai ‘a Sonatane ke laka atu ki he le‘o Filisitia, na‘e hopo hake ha fu‘u makatu‘u mei he potu ko ē mo e fu‘u makatu‘u mei he potu ko ē: pea ko e hingoa ‘o e taha ko Pōsesi, mo e taha ko Sene.

⁵Na‘e hopo ‘a e maka ‘e taha hangē ha pou mei he tokelau, ‘i he hāngai ki Mikimasi, pea ko e taha mei he tonga ‘i he hāngai ki Kepa.

⁶Pea pehē ‘e Sonatane ki he talavou na‘e fua ‘ene mahafu, Ha‘u, ta laka ange ki he le‘o ‘a e kau ta‘ekamu na: hei‘ilo ‘e ngāue ‘a e ‘Eiki ma‘ataua: he ‘oku ‘ikai loki ‘a Sihova ke fai ha fakamo‘ui ‘aki ha tokolahi pe ha toko si‘i.

⁷Pea tali ‘ene to‘o mahafu, Fai pē ‘a e me‘a kotoa ‘oku ‘i ho loto: afe atu,[37] te u ‘iate koe ‘o hangē ko ho loto.

⁸Pea pehē ‘e Sonatane, Ko eni, ta laka ange ki he kau tangata, ‘o fakahā kitaua kiate kinautolu.

⁹Kapau te nau pehē mai, Mo tatali pē kae‘oua ke mau a‘u atu; pea te ta tu‘u ai pē, ‘o ‘ikai ‘alu hake kiate kinautolu.

¹⁰Ka ‘o kapau te nau lea ‘o pehē, Hake mai: pea te ta ‘alu hake: he kuo tuku mai kinautolu ‘e he ‘Eiki ki hota nima; pea ko e faka‘ilonga ia kiate kitaua.

¹¹Pea na fakahā kinaua ki he le‘o Filisitia: pea pehē ‘e he kau Filisitia, Uoi! ‘oku hū mai hani Hepelū mei he ngaahi ‘ana na‘a nau toi ai!

¹²Pea tali ‘a e kau le‘o kia Sonatane mo ‘ene fua mahafu, Hake mai, ka mau faka‘ilo[38] ha me‘a kiate kimoua. Pea pehē ‘e Sonatane ki he‘ene fua mahafu, Muimui mai; he kuo tuku kinautolu ‘e Sihova ki he nima ‘o ‘Isileli.

¹³Pea totolo hake ‘a Sonatane, pea muimui ki ai ‘ene fua mahafu: pea nau tō ‘i he ‘ao ‘o Sonatane; pea na‘e tā atu ‘ene fua mahafu ‘i hono tu‘a.

¹⁴Pea ko e ‘uluaki tā ko ia ‘a Sonatane mo ‘ene fua mahafu na‘e fe‘unga mo e toko uofulu ‘i he vaeua ‘o e ‘eka[39]

¹⁵Pea na‘e hoko ha tete ‘i he ‘apitanga tau, ‘i he vao pea ‘i he kakai kotoa; ko e le‘o foki mo e pāpani na‘e tete mo kinautolu: pea na‘e mofuike ‘a e fonua; ko ia na‘e ai ha tete fakafa‘ahikehe.

¹⁶Pea fakasio ‘e he kau taulama na‘e ‘ia Saula ‘i Kipea-Penisimani, pea tā ‘oku faka‘a‘au hifo ai pē ‘a e hōsitē, ‘o movete ki hē mo ē.

¹⁷Pea lea ‘a Saula ki he kakai na‘e ‘iate ia, Lau mu‘a, ‘o vakai pe ko hai kuo ‘alu meiate kitautolu. Pea nau lau, pea tā na‘e ‘ikai ‘i ai ‘a Sonatane mo ‘ene fua mahafu.

¹⁸Pea me‘a ‘a Saula kia ‘Āhaia, ‘Unuaki mai ‘a e ‘A‘ake ‘o ‘Elohimi.[40] He ko e ‘a‘ake ‘o ‘Elohimí na‘e ‘i ha‘a ‘Isileli ‘i he taimi ko iá.[41]

¹⁹Pea faifai, pea lolotonga ‘a e alea ‘a Saula mo e taula‘eiki, pea ko e maveuveu ‘i he ‘apitanga Filisitia na‘e fakautuutu hono lahi: pea pehē ‘e Saula ki he taula‘eiki, Ta‘ofi ho nima.

²⁰Pea na‘e fakataha ‘a Saula mo e kakai na‘e ‘iate ia ‘o nau a‘u ki he tau: pea tā ‘oku nau fetā‘aki heletā fakaekinautolu, ko e ‘ohovale lahi ‘aupito.

²¹He ko e kau Hepelū na‘e ‘i he kau Filisitia mu‘a, pea kuo nau ‘alu hake mo kinautolu ‘o nofo ‘i he ‘apitanga tau ‘i he potu kehekehe, na‘e kau;[42] mo kinautolu ki he kakai ‘Isileli na‘e ‘ia Saula mo Sonatane.

²²Pea ko e kau tangata ‘Isileli ne toi ‘i Mo‘unga ‘Ifalemi, ‘i he‘enau fanongo kuo hola ‘a e kau Filisitia, na‘e tuli tā ‘e kinautolu foki kiate kinautolu ‘i he tau.

²³Ko ia na‘e fakamo‘ui ‘e Sihova ‘a ‘Isileli ‘i he ‘aho ko ia: pea na‘e fai atu ‘a e tau ‘o tuku ki mui ‘a Peteaveni.

²⁴Ka na‘e mafasia ‘a e tangata ‘Isileli ‘i he ‘aho ko ia: he na‘e fakafuakava‘i ‘e Saula ‘a e kakai, ‘o pehē, Ke mala‘ia ‘a e tangata te ne kai me‘akai kae‘oua ke po‘uli, pea ke ‘oua ke u sauni hoku ngaahi fili. Ko ia, na‘e ‘ikai ke momo‘i mama ‘e he kakai ha me‘akai.

²⁵Pea na‘e a‘u ‘a e fonua kotoa[43] ki he vao tātā; pea na‘e ai ha honi ‘i he funga kelekele.

²⁶Pea ‘i he a‘u ‘a e kakai ki he vao, tā ‘oku tafe ‘a e honi: ka na‘e ‘ikai ‘ai ‘e ha taha hono nima ki hono ngutu; he na‘e manavahē ‘a e kakai ki he fuakava.

²⁷Ka ko Sonatane na‘e ‘ikai te ne fanongo ki he fakafuakava‘i ‘e he‘ene ‘eiki ‘a e kakai: pea ne tuku atu ‘a e tokotoko na‘a ne to‘o, ‘o ne unu hono mui ki he vao honi, ‘o ne toe ‘ai hono mui ki hono ngutu; pea na‘e maama hono mata.

²⁸Pea fakalea ange ‘e ha taha mei he kakai ‘o pehē, Na‘e mātu‘aki fakafuakava‘i ‘e ho‘o ‘eiki ‘a e kakai, ‘o pehē, Ke mala‘ia ‘a e tangata te ne kai me‘akai he ‘aho ni. Pea kuo vaivai ‘a e kakai.

²⁹Pea pehē ‘e Sonatane, Kuo fakamamahi ‘a e fonua ‘e he‘eku tamai: vakai mai ki he maama hoku mata, neongo ko ‘eku ki‘i kamata pē ‘a e honi ni.

³⁰Huanoa ‘oka ne fu‘u kai ‘a e kakai he ‘aho ni mei he vete ‘o honau fili kuo nau ma‘u; pehē hono ‘ikai kuo lahi ange ‘a e te‘ia ‘o e kau Filisitia?

³¹Pea nau tā holo ‘a e kau Filisitia ‘i he ‘aho ko ē mei Mikimasi ki ‘Esialoni: pea na‘e vaivai ‘aupito ‘a e kakai.

³²Pea na‘e ‘oho ‘a e kakai ki he vete, pea nau to‘o sipi, mo e fanga pulu, mo e fanga kafi, ‘o nau te‘ia ‘i he kelekele: pea na‘e kai ‘e he kakai kuo pani toto.

³³Pea na‘e fakapā kia Saula, ‘o pehē; Vakai, ‘oku fai angahala kia Sihova, he‘enau kai kuo pani toto. Pea ne pehē, Kuo mou fai kākā: fakateka mai[44] leva ha fu‘u maka.

³⁴Pea pehē ‘e Saula, Mou movete atu ki he kakai, pea mou tala kiate kinautolu, Mou takitaha ‘omi kiate au ‘ene pulu, ‘ene sipi, ‘o tāmate‘i heni, pea mou kai; ‘o ‘oua ‘e fai angahala kia Sihova he kai mo e toto. Pea ‘omi ‘e he kakai takitaha ‘ene pulu, ‘o ne ha‘u mo ia ‘i he pō ko ia, ‘o ne tāmate‘i ‘i he potu ko ia.

³⁵Pea langa ‘e Saula ha ‘ōlita kia Sihova: ko e ‘uluaki ‘ōlita ‘o Sihova ia na‘a ne langa.

³⁶Pea me‘a ‘e Saula, Tau tuli hifo po‘uli ki he kau Filisitia, ‘o vete kinautolu ‘o a‘u ki he ma‘a ‘a e ‘aho: ‘o ‘oua na‘a tuku hanau taha ke toe. Pea nau tali, Ko e me‘a kotoa ‘oku hā lelei ki he ‘Afiona pea fai. Pea pehē ‘e he taula‘eiki, Tau ‘unu‘unu kia ‘Elohimi heni.

³⁷Pea huhū ‘e Saula ki he ‘Otua, Te u tuli hifo koā ki he kau Filisitia? Te ke tuku kinautolu ki he nima ‘o ‘Isileli? Ka na‘e ‘ikai ha‘ane tali ‘i he ‘aho ko ia.

³⁸Pea me‘a ‘a Saula, Mou ‘unu‘unu mai ki heni, ‘a e ngaahi pou tuliki ‘o e kakai; pea mou ‘ilo ‘o vakai pe kuo tupu ‘i he hā ‘etau hia he ‘aho ni.

³⁹He tangi mo‘ui ‘a e ‘Eiki ko e Fakamo‘ui ‘o ‘Isileli, neongo ko hoku foha ko Sonatane, te ne mātu‘aki mate. Pea na‘e ‘ikai ha taha ‘i he kakai kotoa ‘e tali.

⁴⁰Pea me‘a ia ki ‘Isileli kātoa, Ke fa‘ahi ‘e taha kimoutolu, pea fa‘ahi ‘e taha au mo hoku foha ko Sonatane. Pea pehē ‘a e kakai kia Saula, Ha me‘a ‘oku hā lelei ki he ‘Afiona pea fai.

⁴¹Pea fakatau folofola ‘a Saula kia Sihova ko e ‘Otua ‘o ‘Isileli, Fakahā ‘a e totonu.[45] Pea na‘e tonu kia Saula mo Sonatane, kae hao ‘a e kakai.

⁴²Pea pehē ‘e Saula, Fai talotalo kiate kimaua mo hoku foha ko Sonatane. Pea na‘e tonu kia Sonatane.

⁴³Pea pehē ‘e Saula kia Sonatane, Tala mai pe ko e hā ‘a e me‘a kuo ke fai. Pea fakahā ki ai ‘e Sonatane, ‘o pehē, Ko ‘eku ki‘i kamata pē ha momo‘i honi ‘i he mui tokotoko na‘a ku to‘o, pea tā te u mate ‘apē.

⁴⁴Pea me‘a ‘a Saula, ‘Ilo ‘e au ‘o lahi hake, ‘o kapau ‘e ‘ikai te ke mate, Sonatane.

⁴⁵Pea fakatau folofola ‘a e kakai kia Saula, ‘O mate koā ‘a Sonatane, ‘a ia kuo ne fai ‘a e fakamo‘ui lahi ni ma‘a ‘Isileli? Molekemama‘o! Tangi mo‘ui ‘a e ‘Eiki, ‘e ‘ikai tō kelekele hano tu‘oni lou‘ulu; he kuo ne ngāue mo e ‘Otua he ‘aho ni. Ko ia na‘e huhu‘i ‘e he kakai ‘a Sonatane, pea na‘e ‘ikai te ne mate.

⁴⁶Pea me‘a hake ‘a Saula mei he tuli ‘o e kau Filisitia, pea ‘alu ‘a e kau Filisitia ki honau feitu‘u.

⁴⁷Pea hili ‘a e puke ‘e Saula ‘a e pule ki ‘Isileli, na‘a ne fai tau ‘i he potu kotoa pē ki hono ngaahi fili, ki Moape, pea ki ha‘a ‘Āmoni, pea ki ‘Ītomi, pea ki he ngaahi Tu‘i Sopa, pea ki he kau Filisitia.

⁴⁸Pea ‘ilonga kinautolu na‘a ne hanga ki ai, na‘a ne ngaohikovi‘i:[46] ‘io, na‘a ne fai fita, ‘o ne taa‘i ‘a ‘Amaleki; ‘o ne hamusi ‘a ‘Isileli mei he nima ‘o hono kau vete.

⁴⁹Pea ko e hako ‘o Saula ko Sonatane, mo Sisui, mo Malikisua: pea ko e hingoa ‘o hono ongo ‘ōfefine; ko e ‘uluaki ko Mēlape, pea ko e tehina ko Maikale:

⁵⁰pea ko e hingoa ‘o e uaifi ‘a Saula ko ‘Ahinoami ko e ‘ōfefine ‘o ‘Ahima‘asi: pea ko e hingoa ‘o e kapiteni ‘o ‘ene tau ko ‘Āpina ko e foha ‘o Nā ko e tokoua ‘o e tamai ‘a Saula.

⁵¹Pea ko Kisi ko e tamai ‘a Saula, mo Na‘a ko e tamai ‘a ‘Āpina, ko e hako ‘o ‘Apieli kinaua.

⁵²Pea na‘e fai mālohi ‘a e tau ki he kau Filisitia ‘i he taimi kotoa pē ‘o Saula: pea ka vakai ‘e Saula ha tangata kaukaua, pe ha tangata to‘a, na‘a ne to‘o mo‘ona.