Read KO E TOH TAPU KATOA TONGA KO 1 SĀMIUELA 18 Bible Online

KO 1 SĀMIUELA 18 - KO E TOH TAPU KATOA TONGA bible

KO 1 SĀMIUELA 18

¹PEA ‘i he ‘osi leva ‘ene fakatau folofola kia Saula, pea pīkitai ‘a e loto ‘o Sonatane ki he loto ‘o Tēvita, pea ‘ofa ‘a Sonatane kiate ia ‘o hangē ko ‘ene mo‘ui ‘a‘ana.

²Pea puke ‘e Saula ‘a Tēvita ‘i he ‘aho ko ia, ‘o ‘ikai te ne tuku ke foki ki he ‘api ‘o ‘ene tamai.

³Pea hanga ‘a Sonatane ‘o fai fuakava mo Tēvita, koe‘uhi na‘a ne ‘ofa kiate ia ‘o hangē ko ‘ene mo‘ui ‘a‘ana.

⁴Pea hu‘ihu‘i ‘e Sonatane ‘a e kofu tōtōlofa kuo ne ‘ai, ‘o ne ‘ange kia Tēvita, pea mo hono ngaahi kofu tau, ‘io, mo ‘ene heletā, mo ‘ene kaufana, mo hono no‘o.

⁵Pea ‘alu atu ‘a Tēvita ki he tau: pea ‘i he me‘a kotoa na‘e fekau ai ia ‘e Saula, na‘a ne fai fakapotopoto: pea fokotu‘u ia ‘e Saula ke pule ki ha kau tau, pea na‘e lelei‘ia ai ‘a e kakai kotoa, kae‘uma‘ā ‘a e kau tamaio‘eiki ‘a Saula.

⁶Pea ‘i he faifai pea nau omi ki ‘api ‘i he foki ‘a Tēvita mei he taa‘i ‘o e Filisitia, na‘e hū kitu‘a ‘a e kau fefine mei he ngaahi kolo ‘o ‘Isileli, ke hiva mo me‘e ‘i he tali ‘o Kingi Saula, ‘o nau to‘o ‘a e ngaahi nafa fāngongo mo e simika, mo e ngaahi tapatolu.

⁷Pea fetāliaki ‘e he kau fefine ‘i he‘enau ngaahi lakalaka, ‘o nau pehē, ‘A e tā ‘e Saula ‘ene toko‘i afe, Mo e ngaahi mano ‘a Tēvita ē.

⁸Pea tuputāmaki lahi ai ‘a Saula, pea na‘e tau kovi ‘a e me‘a ko ia; pea ne pehē, Kuo nau tuku kia Tēvita ha toko‘i mano, kae toko afe pē kiate au: pea ko e hā mo e pule‘anga ‘oku toe ke ne ma‘u.

⁹Pea talu ai mo e siosiofi ‘e Saula ‘a Tēvita.

¹⁰Pea pongipongi hake na‘e ‘ohofia ‘a Saula ‘e he laumālie kovi mei he ‘Otua, pea ne valelau ‘i loto fale: pea tā ha‘ape ‘a Tēvita ‘o hangē ko ‘ene fa‘a fai: pea ‘oku to‘o ‘e Saula hono tao.

¹¹Pea fakapoi ‘e Saula hono tao; he‘ene pehē, Te u hoka‘i fakau‘u ‘a Tēvita ki he holisi. Ka ka kalo tu‘o ua ‘a Tēvita, ‘o hola ki tu‘a.

¹²Pea manavahē ‘a Saula ke fe‘ao mo Tēvita, koe‘uhi na‘e kau ‘a e ‘Eiki mo ia, ka kuo ne hiki meia Saula.

¹³Ko ia na‘e hiki ia ‘e Saula ki ha tu‘unga te ne mama‘o ai mo ia, ‘o ne fokotu‘u ia ke pule ki he toko afe ‘o ‘ene tau: pea na‘a ne hū kitu‘a mo hū mai ‘i he ‘ao ‘o e kakai.

¹⁴Pea ka ai ha fononga na‘a ne fai, na‘a ne lava me‘a ai; pea na‘e ‘iate ia ‘a e ‘Eiki.

¹⁵Pea ‘i he vakai ‘e Saula ‘oku ne fai me‘a lava ‘aupito, na‘a ne teteki ki ai.

¹⁶Ka ko ‘Isileli kātoa mo Siuta na‘a nau ‘ofa kia Tēvita; he ko ia ia na‘a ne hū kitu‘a mo hū mai ‘i honau ‘ao.

¹⁷Pea me‘a ‘a Saula kia Tēvita, Ko eni ‘a hoku ‘ōfefine lahi, ‘a Mēlape, te u ‘atu ia kia koe ke mo nonofo: kehe pē ke ke fakafitefita‘a ma‘aku, he fai ‘a e ngaahi tau ‘a Sihova. He ne pehē ‘e Saula, Ke ‘oua na‘a ala hoku nima ki ai, ka ko e nima ‘o e kau Filisitia.

¹⁸Pea tali ‘a Tēvita kia Saula, Ko hai au, mo hai hoku fāmili ‘i ‘Isileli, ke foha ‘aki au ‘e he ‘Afiona?

¹⁹Ka ‘i he faifai pea hoko ‘a e taimi ke tuku ‘a Mēlape ko e ‘ōfefine ‘o Saula kia Tēvita, na‘e ‘ange ia ke nonofo mo ‘Ātalieli ‘a e matāpule Mēhola.

²⁰Pea ‘ofa kia Tēvita ‘a e ‘ōfefine ‘o Saula ko Maikale, pea nau fakahā kia Saula, pea na‘e hā lelei ‘a e me‘a kiate ia.

²¹Pea pehē ‘e Saula, Te u ‘ange ‘a e fefine kiate ia mōno tauhele‘i, kae ‘iate ia ‘a e nima ‘o e kau Filisitia. Ko ia na‘e me‘a ‘a Saula kia Tēvita, Te ke hoko he ‘aho ni ko hoku foha ko hono tu‘o ua.

²²Pea fekau ‘e Saula ‘ene kau tamaio‘eiki, Mou alea fufū mo Tēvita, ‘o pehē; Vakai, ‘oku manako ‘a e tu‘i kiate koe, pea ‘oku ‘ofa kiate koe ‘e he‘ene kau tamaio‘eiki kotoa: ko ia ke ke hoko ko hono foha mali.

²³Pea fanafana pehē ‘a e kau tamaio‘eiki ‘a Saula kia Tēvita. Pea tali ‘e Tēvita, He ‘oku mou pehē ko e me‘a ma‘ama‘a ke te hoko ko e foha ‘o e tu‘i; ‘osi, ko e masiva au mo ta‘etokanga‘i?

²⁴Pea fakahā ki he ‘afio ‘e he kau tamaio‘eiki ‘a Saula, he‘enau pehē, Ko e ngaahi lea e ‘a Tēvita.

²⁵Pea lea ‘a Saula, Ko eni ho‘omou lea kia Tēvita, ‘Oku ‘ikai manako ‘e he tu‘i ki ha koloa, ka ko e teau‘i kili‘i ‘ao ‘o e kau Filisitia, ke fai ‘a e sauni ‘o e ngaahi fili ‘o e tu‘i. Ka ko e puleaki ‘a Saula ke tō ‘a Tēvita ‘i he tā ‘a e kau Filisitia.

²⁶Pea ‘i he fakahā kia Tēvita ‘e he kau tamaio‘eiki ‘a ‘ene ‘Afio ‘a e lea ko ia, pea na‘e lelei ‘a e me‘a kia Tēvita ke ne hoko ko e foha ‘o e tu‘i.

²⁷Pea ‘i he te‘eki kakato ‘a e taimi, na‘e tu‘u ‘a Tēvita ‘o ‘alu, ‘e ia mo ‘ene kau tangata, pea ne taa‘i ha tu‘unga tangata Filisitia ‘e toko uangeau; pea ‘omi ‘e Tēvita honau kili‘i ‘ao, ‘o fakakakato ki he tu‘i, ke ne hoko ko hono foha mali. Pea ‘ange ‘e Saula kiate ia hano ‘ōfefine ko Maikale ke na nonofo.

²⁸Pea vakai ‘e Saula ‘o ‘ilo ‘oku kau ‘a e ‘Eiki mo Tēvita; mo e ‘ofa kiate ia ‘a Maikale ko hono ‘ōfefine:

²⁹pea na‘e fakautuutu ai ‘a e manavahē ‘a Saula kia Tēvita; pea ko e fili ia ‘o Tēvita ma‘u ai pē.

³⁰Pea hū kitu‘a ‘a e ngaahi ‘ulu ‘o e kau Filisitia: pea ka ‘iloange na‘a nau hū ki tu‘a, pea lava me‘a ‘a Tēvita ‘o lahi ange ‘i he kau tamaio‘eiki kotoa pē ‘a Saula; ko ia na‘e ma‘ongo‘onga hono hingoa.