Read KO E TOH TAPU KATOA TONGA KO 1 SĀMIUELA 19 Bible Online

KO 1 SĀMIUELA 19 - KO E TOH TAPU KATOA TONGA bible

KO 1 SĀMIUELA 19

¹PEA lea ‘a Saula ki hono foha ko Sonatane, pea ki he‘ene kau tamaio‘eiki, ki he tāmate‘i[55] ‘o Tēvita.

²Ka ko Sonatane foha ‘o Saula na‘a ne manako lahi kia Tēvita. Pea tala ‘e Sonatane kia Tēvita, ‘Oku feinga ‘a ‘eku ‘eiki ko Saula ke tāmate‘i koe: ko ia, ke ke tokanga mu‘a kia koe ‘apongipongi, pea nofo ‘i ha potu lilo, ‘o toi:

³pea te u ‘alu atu au ‘o tu‘u mo e tangata‘eiki ‘i he vao ‘oku ke ‘i ai, pea te u talanoa mo e tangata‘eiki ‘iate koe; pea u vakai pe kuo fēfē, pea te u tala kiate koe.

⁴Pea lea ‘a Sonatane ki he‘ene ‘eiki ko Saula ki he mālō ‘a Tēvita, ‘o ne fakatau folofola ki ai, ‘o pehē, Ke ‘oua na‘a fai angahala ‘a e ‘Afiona ki ho‘o sevāniti ko Tēvita; he tala‘ehai kuo ne hia ki he ‘Afiona, pea kuo lelei ‘aupito ‘ene ngāue ma‘au:

⁵he na‘a ne ‘alu mo ‘ene mo‘ui ‘o ne taa‘i ‘a e Filisitia, pea feia ‘e Sihova ha fakamo‘ui lahi ma‘a ‘Isileli kātoa: na‘a ke mamata ki ai, pea ke fiefia: pea ko e hā te ke angahala ai ki he ta‘ehalaia, ke tāmate‘i ‘a Tēvita ta‘ehano ‘uhinga?

⁶Pea fakaongo ‘e Saula ki he lea ‘a Sonatane: pea fuakava ‘a Saula, Tangi ‘a e mo‘ui ‘a e ‘Eiki ‘e ‘ikai tāmate‘i ia.

⁷Pea ui ‘e Sonatane ‘a Tēvita, ‘o ne fakahā ki ai ‘a e ngaahi lea ko ia. Pea ‘omi ‘e Sonatane ‘a Tēvita kia Saula, pea ne taka ‘i hono ‘ao, ‘o hangē ko e taimi mu‘a.

⁸Pea na‘e toe fai ‘a e tau; pea hū kitu‘a ‘a Tēvita, ‘o tau mo e kau Filisitia, ‘o taa‘i kinautolu — ko e tā ka ko ha ta! — pea nau hola mei hono ‘ao.

⁹Pea hā‘ele kia Saula ha laumālie kovi meia Sihova, ka ‘oku nofo ia ‘i hono fale, ‘o to‘o hono tao; pea tā ha‘ape ‘a Tēvita.

¹⁰Pea feinga ‘a Saula ke veloi fakau‘u ‘a Tēvita ki he holisi; ka ka kalo pē ia mei he ‘ao ‘o Saula, pea tau ‘a e tao ‘i he holisi: pea hola ‘a Tēvita, ‘o ne hiki ‘i he pō ko ia.

¹¹Pea kouna ‘e Saula ha kau talafekau ki he fale ‘o Tēvita ke lama ia, pea ke tāmate‘i ia ‘apongipongi: pea fakahā kia Tēvita ‘e Maikale ko hono uaifi, ‘o pehē, Kapau ‘e ‘ikai te ke kalofaki ho‘o mo‘ui he pō ni, ‘e tāmate‘i koe ‘apongipongi.

¹²Ko ia na‘e tuku hifo ‘e Maikale ‘a Tēvita ‘i he kātupa: pea ne ‘alu, ‘o hola, ‘o hao.

¹³Pea to‘o ‘e Maikale ‘a e telāfimi, ‘o ne tuku ki he mohenga, mo ha ‘ufi‘ufi fulufulu‘i kosi ‘i hono ‘ulu, ‘o ne kafu ‘aki ha pulupulu.

¹⁴Pea ‘i he fekau mai ‘e Saula ha ni‘ihi ke puke Tēvita, na‘e pehē ‘e he fefine, ‘Oku mahaki.

¹⁵Pea fekau atu ‘e Saula ha ni‘ihi ke fakasio kia Tēvita, ‘o ne me‘a, ‘Ohake kiate au ‘i he mohenga, ka u tāmate‘i ia.

¹⁶Pea ‘i he hū mai ‘a e kau talafekau, tā ko e telāfimi ‘i he mohenga, mo e me‘a fulufulu‘i kosi ‘i hono ‘ulu.

¹⁷Pea folofola ‘a Saula kia Maikale, Ko e hā kuo ke kākaa‘i pehe‘i ai au, ‘o tuku ange hoku fili, pea kuo ne hao? Pea tali ‘e Maikale kia Saula, Na‘a ne pehē mai, Tuku ange au; koe‘uma‘ā ‘eku tāmate‘i koe?

¹⁸Pea ko eni, ne hola ‘a Tēvita, ‘o hao, ‘o ne a‘u kia Sāmiuela ki Lama, ‘o ne tala ki ai ‘a e me‘a kotoa kuo fai ‘e Saula kiate ia. Pea ‘alu ‘e ia mo Sāmiuela, ‘o na nonofo ‘i he Ako.

¹⁹Pea na‘e fakahā kia Saula, ‘o pehē; Vakai, ko Tēvita ‘oku ‘i he Ako ‘i Lama.

²⁰Pea fekau atu ‘e Saula ha ni‘ihi ke puke ‘a Tēvita: pea ‘i he‘enau mamata[56] ki he fakataha‘i palōfita ‘oku nau palofisai, mo e tu‘u ‘a Sāmiuela ‘o angi, na‘e hā‘ele ‘a e Laumālie ‘o ‘Elohimi ki he kau talafekau ‘a Saula, ‘o nau palofisai mo kinautolu.

²¹Pea ‘i hono fakahā kia Saula, na‘a ne tuku atu hani talafekau kehe, pea nau palofisai mo kinautolu. Pea ne tuku atu mo ha ni‘ihi hono tu‘o tolu, pea nau palofisai mo kinautolu.

²²Pea toki ‘alu ‘e ia foki ki Lama, ‘o ne a‘u ki he fu‘u lepa ‘oku ‘i Seku; pea ne fehu‘i ‘o pehē, ‘oku ‘i fē ‘a Sāmiuela mo Tēvita? Pea tali ‘e ha taha, Tokua ‘oku na ‘i he Ako ‘i Lama.

²³Pea ne ‘alu ki ai, ki he Ako ‘i Lama: pea hā‘ele ‘a e Laumālie ‘o e ‘Otua kiate ia foki, pea ne ‘alu atu ai pē mo fai palofisai, ‘o a‘u ki he Ako ‘i Lama.

²⁴Pea hu‘ihu‘i mo ia foki hono kofu, pea palofisai mo ia foki ‘i he ‘ao ‘o Sāmiuela, ‘o ne tō teketekefili ‘i he ‘aho kotoa ko ia mo e pō, ‘a ē ā ‘oku nau pehē ai, ‘Oku ‘i he kau palōfita koā ‘a Saula foki?