Read KO E TOH TAPU KATOA TONGA KO 1 SĀMIUELA 24 Bible Online

KO 1 SĀMIUELA 24 - KO E TOH TAPU KATOA TONGA bible

KO 1 SĀMIUELA 24

¹PEA hili ‘a e foki ‘a Saula mei he muimui ki he kau Filisitia, na‘e fakahā kiate ia, ‘o pehē, Tokua ko Tēvita ‘oku ‘i he Toafa ‘o ‘Eniketi.

²Pea ‘ave ‘e Saula ha toko tolu afe na‘e fili mei ‘Isileli kātoa, pea ne ‘alu ke kumi ‘a Tēvita mo hono kakai, ‘i he fonua maka ‘o e fanga kosi kaivao.

³Pea ne a‘u ki he ngaahi loto‘ā sipi ‘i he hala, pea na‘e ‘i ai ha ‘ana, pea hū ki ai ‘a Saula ke fakafiemālie: ka ‘oku nofo ‘a Tēvita mo ‘ene kau tangata ki he mui ‘ana.

⁴Pea lea ‘a e kau tangata ‘a Tēvita kiate ia; Vakai, ko e ‘aho ē na‘e folofola ai ‘a e ‘Eiki kiate koe, ‘o pehē, Ko eni, te u tuku ho fili ki ho nima, ke ke fa‘iteliha kiate ia, Pea tu‘u ‘a Tēvita, ‘o tu‘usi fufū ‘a e kapa ‘o e kofu tōtōlofa na‘e ‘ia Saula.

⁵Pea hili ‘ene fai pehē na‘e tautea ‘a Tēvita ‘e hono loto, koe‘uhi kuo ne tu‘usi ‘a e kapa‘i kofu ‘o Saula.

⁶Pea ne pehē ki he‘ene kau tangata, Ko Sihova ē ha‘aku ofi ke fai pehē ki hoku ‘eiki ko e pani ‘a Sihova, ke ala hoku nima ki ai, he ko e pani ia ‘a Sihova.

⁷Ko ia na‘e ta‘ofi ‘e Tēvita ‘ene kau tangata ‘aki ‘a e ngaahi lea ko ē, ‘o ‘ikai te ne tuku ke nau tu‘u kia Saula. Pea tu‘u atu ‘a Saula mei he ‘ana, ‘o ne fai hono fononga.

⁸Pea tu‘u ‘a Tēvita, ‘o muimui atu, ‘o ne hū kitu‘a mei he ‘ana, ‘o ne ui ange kia Saula ‘o pehē, ‘Ēī ‘a e ‘afiona! Pea ‘i he kilo ‘a Saula ki mui, na‘e tō fo‘ohifo ‘a Tēvita ki he kelekele, ‘o fai ‘ene faka‘apa‘apa.

⁹Pea fakatau folofola ‘a Tēvita kia Saula, Ko e hā ‘oku ke tokanga ai ki he lau ‘a e kakai, ‘o pehē, ‘Ē, ‘oku feinga ‘a Tēvita ke fai ha kovi kiate koe?

¹⁰Vakai, ko e ‘aho ni kuo me‘a ho fofonga ki he tuku koe ‘e Sihova he ‘aho ni ki hoku nima ‘i he ‘ana: pea na‘e lau ha ni‘ihi ke u tāmate‘i koe: ka u mamae‘i koe; pea u pehē, ‘E ‘ikai te u ala ki hoku ‘eiki, he ko e pani ‘a Sihova ia.

¹¹Kae‘uma‘ā ke ke me‘a mai, ‘alā; vakai ‘a e kapa ‘o ho kofu ‘oku ou to‘o; he ko e me‘a ‘i he‘eku tu‘usi ‘a e kapa ‘o ho kofu, kae ‘ikai te u tāmate‘i koe, ke ke ‘ilo ai mo vakai ‘oku ‘ikai ha kovi pe ha pau‘u ‘iate au, pea kuo ‘ikai te u hia kiate koe, ka ko koe ‘oku ke tuli ki he‘eku mo‘ui ke pō ia.

¹²Ke fakamaau ‘e Sihova ‘i hota vaha‘a, pea ke sauni ‘e Sihova ma‘aku kiate koe; ka ‘e ‘ikai ala ki he ‘afiona ‘e hoku nima.

¹³‘O hangē ko e lau ‘a e paloveepi ‘a e kakai mu‘a, ‘Oku tupu ‘a e pau‘u mei he pau‘u; ka ko hoku nima ‘e ‘ikai ala atu.

¹⁴Ko e hā‘ele atu ‘a e Tu‘i ‘Isileli kia hai? Ko e hā ‘a e me‘a ‘oku tuli ki ai ‘a e ‘afiona? ko e kulī mate pē, ko e momo‘i kutufisi.

¹⁵Ko ia, tuku ‘a e fakamaau kia Sihova, pea ke ne fakamaau ‘i hota vaha‘a, ‘o vakai, ‘o taukapo‘i ‘eku me‘a, mo faka‘osi hoku fakamaau.

¹⁶Pea ‘i he ‘osi leva ‘e Tēvita ‘ene fakatau folofola pehē kia Saula, pea pehē ‘e Saula, Ko ho le‘o koā ena, tama Tēvita. Pea ofa‘aki ‘e Saula ‘ene fākafoa.

¹⁷Pea ne pehē kia Tēvita, ‘Oku ke mā‘oni‘oni ange ‘iate au; he ko koe kuo ke fai lelei kiate au, ka u fai kovi ‘e au kiate koe.

¹⁸Pea kuo ke fakamahino he ‘aho ni ‘a e lelei ho‘o ngāue kiate au: he neongo ne tuku au ‘e Sihova ki ho nima, kae ‘ikai te ke tāmate‘i au.

¹⁹He ka ‘iloange ‘e ma‘u ‘e ha tangata hono fili, te ne tukuange lelei pē koā ke fai hono fononga? pea ‘ofa ke totongi lelei koe ‘e he ‘eiki koe‘uhi ko e me‘a kuo ke fai kiate au he ‘aho ni.

²⁰Pea ko eni, tā kuo u ‘ilo kuo pau te ke tu‘i, pea ‘e ma‘u ‘a e pule‘anga ‘o ‘Isileli ‘i ho nima.

²¹Pea ko ia ke ke fuakava kiate au ‘ia Sihova, ‘Ilo ‘e koe, ‘o kapau te ke tu‘usi hoku hako ‘amui, pe tāmate‘i hoku hingoa mei he fale ‘o hoku tupu‘anga.

²²Pea fuakava ‘a Tēvita kia Saula. Pea ‘alu ‘a Saula ki ‘api, ka ka ‘alu hake ‘a Tēvita mo ‘ene kau tangata ki he toitoi‘anga.