Read KO E TOH TAPU KATOA TONGA KO 1 SĀMIUELA 26 Bible Online

KO 1 SĀMIUELA 26 - KO E TOH TAPU KATOA TONGA bible

KO 1 SĀMIUELA 26

¹PEA ha‘u ‘a e kau Sifi kia Saula ki Kipea, ‘o nau pehē, ‘Ikai ‘oku toi ‘a Tēvita ‘i he mā‘olunga ko Hākila, ‘i he mata ‘o e lala?

²Pea tu‘u ‘a Saula, ‘o ne ‘alu hifo ki he Toafa ‘o Sifi, ‘o ne ‘alu mo ia ha toko tolu afe kuo fili mei ‘Isileli ke kumi ‘a Tēvita ‘i he Toafa ‘o Sifi.

³Pea ‘apitanga ‘a Saula ‘i he mā‘olunga ko Hākila, ‘a ia ‘oku ‘i he mata ‘o e lala, ‘i he ve‘ehala. Ka ‘oku nofo ‘a Tēvita ‘i he toafa, pea ne vakai kuo ha‘u ‘a Saula hono kumi ki he toafa.

⁴Ko ia na‘a ne fekau atu ha kau asiasi, ‘o ne ‘ilo tā kuo ha‘u mo‘oni ‘a Saula.

⁵Toki tu‘u ‘a Tēvita, ‘o ne ha‘u ki he potu ‘oku ‘apitanga ai ‘a Saula: pea ne vakai ‘a e potu ‘oku toka ai ‘a Saula mo ‘Āpina foha ‘o Nā, ko e ‘eiki ‘o ‘ene tau. Pea na‘e toka ‘a Saula ‘i he loto‘ā sāliote, pea ‘apitanga ‘a e kakai takatakai kiate ia.

⁶Pea hanga ‘a Tēvita, ‘o lea kia ‘Ahimeleki ko e Heti, pea kia ‘Apisai ko e tokoua ‘o Sioape ko e tama ‘a Seluvaia, ‘o pehē, Ko hai ‘e ‘alu hifo mo au kia Saula ki he ‘apitanga? Pea tali ‘e ‘Apisai, Ko au eni te u ‘alu hifo mo koe.

⁷Pea a‘u ‘a Tēvita mo ‘Apisai ki he kakai ‘i he po‘uli, pea tā ko Saula ē ‘oku toka ‘i he loto‘ā sāliote, ‘oku mohe, pea ko hono tao ‘oku hunuki ‘i he kelekele mei hono ‘ulu: pea ko ‘Āpina mo e kakai na‘e fetākoto‘i takatakai kiate ia.

⁸Pea lea ‘a ‘Apisai kia Tēvita, Kuo tuku ‘e he ‘Otua he pō ni ho fili ki ho nima: pea ko ia, ka u veloi fakau‘u mu‘a ia ki he kelekele tu‘o taha pē, ‘e ‘ikai te u toe ‘ai.

⁹Pea tali ‘e Tēvita kia ‘Apisai, ‘Oua ‘e tāmate‘i ia: he ko hai ‘e ala ki he pani ‘a Sihova ta‘ehalaia?

¹⁰Pea fai atu ‘a Tēvita, Tangi mo‘oni ‘a e ‘Eiki, ko e ‘Eiki pē te ne taa‘i ia, pe hoko hono ‘aho ke pekia, pe te ne ‘alu hifo ki he tau ‘o mole ai.

¹¹Ko Sihova ē ha‘aku ofi ke ala ki he pani ‘a e ‘Eiki: ka ko eni, ke ke to‘o mu‘a ‘a e tao ‘oku tu‘u mei hono ‘ulu, pea mo e hina vai, pea tā ō kitaua.

¹²Pea to‘o ‘e Tēvita ‘a e tao mo e hina vai mei he ‘ulu ‘o Saula, pea na ō kinaua, ‘o ‘ikai sio ‘e ha taha, pea ‘ikai ha taha na‘e ‘ilo ki ai, pe ai ha taha na‘e ‘ā: he kuo nau ma‘u mohe kotoa pē, he kuo tō kiate kinautolu ha mohe ma‘u meia Sihova.

¹³Pea laka ‘a Tēvita ki he potu ‘e taha, ‘o ne tu‘u ‘i he funga mo‘unga atu, ‘o mama‘o ‘aupito meiate kinautolu.

¹⁴Pea ui ‘e Tēvita ki he kakai, kae‘uma‘ā kia ‘Āpina foha ‘o Nā, ‘o pehē, ‘Āpina, ‘oku ‘ikai koā te ke tali? Pea tali ‘e ‘Āpina ‘o pehē, Ko hai koe ‘oku ke kalanga pehē ki he tu‘i?

¹⁵Pea pehē ‘e Tēvita kia ‘Āpina, Tā ko e toki to‘a koe, pea ko hai ‘i ‘Isileli ‘oku tatau mo koe? Pea ko e hā na‘e ‘ikai te ke le‘ohi ai ho ‘eiki ko e tu‘i? he na‘e a‘u atu ha taha ‘o e kakai ke tāmate‘i ho ‘eiki ko e tu‘i.

¹⁶‘Oku ‘ikai lelei ‘a e me‘a ni kuo ke fai. Tangi ‘a e mo‘ui ‘a e ‘Eiki, ‘oku totonu ke mou mate ko e ‘ikai te mou le‘ohi homou ‘eiki ko e pani ‘a Sihova. Pea ko eni, mou vakai pe ko e fe‘ia ‘a e tao ‘o e tu‘i mo e hina vai mei hono ‘ulu.

¹⁷Pea na‘e ‘ilo ‘e Saula ‘a e le‘o ‘o Tēvita, ‘o ne pehē, Ko ho le‘o koā ena, tama Tēvita? Pea tali ‘e Tēvita, ‘Ēī ‘a e ‘afiona, ko hoku le‘o pē.

¹⁸Pea ne fai atu, Ko e hā ‘oku tuli pehē ai ‘a e ‘afiona ko ho‘o tamaio‘eiki ko au? He ko e hā kuo u fai? Pe ko e hā ha kovi ‘iate au?

¹⁹Pea ko eni, ke me‘a mai mu‘a ‘a e ‘afiona ko e tu‘i ki he ngaahi lea ‘a ho‘o tamaio‘eiki, Kapau ko e ‘Eiki kuo ne ue‘i koe kiate au, pea ke ne tali ha holo; ka ‘o kapau ko e Maama, ‘ofa ke nau mala‘ia meia Sihova; he kuo nau kapusi au he ‘aho ni mei he kau ki he tofi‘a ‘o Sihova, hangē ‘oku nau pehē, ‘alu ‘o tauhi ‘otua kehe.

²⁰Pea ko eni, ‘ofa ke ‘oua na‘a tō kelekele hoku toto ‘i ha potu mama‘o mo Sihova: he kuo hā‘ele atu ‘a e Tu‘i ‘Isileli ke kumi ha momo‘i kutufisi, ‘o hangē ko e tuli ha patelisi ‘i he ngaahi mo‘unga.

²¹Pea tali ‘e Saula, Kuo u angahala: foki mai, hoku foha ko Tēvita: he ‘ikai te u toe fai ha kovi kiate koe, koe‘uhi na‘a ke mahu‘inga‘ia ‘i he‘eku mo‘ui he pō ni: ko eni, kuo u fai sesele, pea kuo u fai hala lahi ‘aupito.

²²Pea tali ‘e Tēvita, ‘o ne pehē; Vakai, ko e tao eni ‘o e ‘afiona, ke laka mai ha taha ‘o e kau tama ‘o ‘atu.

²³Pea ke totongi ‘e Sihova ki he tangata takitaha ‘ene faitotonu mo tōnunga: he ne tuku koe ‘e Sihova ki hoku nima he pō ni, kae ‘ikai te u fie ala ki he pani ‘a e ‘Eiki.

²⁴Pea ko eni, hangē na‘e mamafa ho‘o mo‘ui kiate au he pō ni, ‘ofa ke mamafa pehē ‘eku mo‘ui ‘i he ‘ao ‘o Sihova, pea ke ne hamusi au mei he fakamamahi kotoa pē.

²⁵Pea tali ‘e Saula kia Tēvita, ‘ofa ke ke monū‘ia, tama Tēvita: te ke fai me‘a lalahi, pea te ke lava foki. Pea fai atu ‘e Tēvita hono fononga, pea foki ‘a Saula ki hono potu.