Read KO E TOH TAPU KATOA TONGA KO 1 SĀMIUELA 27 Bible Online

KO 1 SĀMIUELA 27 - KO E TOH TAPU KATOA TONGA bible

KO 1 SĀMIUELA 27

¹PEA pehē ‘e Tēvita ‘i hono loto, Tokaange ha ‘aho te u mole ‘i he fai ‘a Saula: ko e me‘a pē taha ‘oku toe kiate au ke u mātu‘aki hola ki he fonua ‘o e kau Filisitia; pea ‘e tuku ‘e Saula ‘ene kei kumi au ‘i he ngaahi feitu‘u ‘o ‘Isileli: ko ia te u hao mei hono nima.

²Pea tu‘u ‘a Tēvita, ‘o laka ange, ‘e ia mo e toko onongeau na‘e ‘iate ia kia ‘Ākisi foha ‘o Maoki, ko e Tu‘i Kati.

³Pea nofo ‘a Tēvita kia ‘Ākisi ‘i Kati, ‘e ia mo ‘ene kau tangata, takitaha mo hono fale, pea ‘ia Tēvita hono ongo ‘unoho ko ‘Ahinoami ko e fefine Sisilili, mo ‘Apikale ko e fefine Kāmeli, ‘a ia na‘e nonofo mo Nāpale.

⁴Pea na‘e fakahā kia Saula, Tokua kuo hola ‘a Tēvita ki Kati, pea na‘e ‘ikai te ne toe kumi ki ai.

⁵Pea lea ‘a Tēvita kia ‘Ākisi, Ka kuo u ta‘imālie ho‘o ‘ofa, pea ke nau tuku mai ha potu, ha taha pē ‘i he ngaahi kolo ‘i tuku‘uta, ka u nofo ai: he koe‘uma‘ā ke nofo ki he ‘afio na‘a ho‘o tamaio‘eiki ko au ‘i he kolo hau?

⁶Pea ‘ange ki ai ‘e ‘Ākisi ‘i he ‘aho ko ia ‘a Sikilaki: ‘a ē ā ‘oku kau ai ‘a Sikilaki ki he ngaahi Tu‘i Siuta, ‘o a‘u ki he ‘aho ni.

⁷Pea ko e fuoloa ‘o e nofo ‘a Tēvita ‘i he tuku‘uta ‘o e kau Filisitia ko e ta‘u kātoa mo e māhina ‘e fā.

⁸Pea ‘alu hake ‘a Tēvita mo ‘ene kau tangata, ‘o nau tau‘i ‘a ha‘a Kēsuli, mo ha‘a Kīsili, mo ha‘a ‘Amaleki: ko kinautolu na‘e nofo ‘i he fonua talu mu‘a ‘i ho‘o ‘alu ki Sua, ‘o fai ki ‘Isipite.

⁹Pea taa‘i ‘e Tēvita ‘a e fonua, ‘o ‘ikai te ne tuku ke mo‘ui ha tangata pe fefine, ‘o ne ‘ave ‘a e fanga sipi, mo e pulu, mo e ‘asi, mo e kāmeli, mo e kofu; pea ne foki, ‘o a‘u kia ‘Ākisi.

¹⁰Pea me‘a ‘a ‘Ākisi, Tā kuo mou toki fai tau ki ha potu ‘inē? Pea tali ‘e Tēvita, Ki he potu tonga ‘o Siuta, pea ki he potu tonga ‘o ha‘a ‘Ilameeli, pea ki he potu tonga ‘o ha‘a Keini.

¹¹Pea kuo ‘ikai tuku ‘e Tēvita ke mo‘ui ha tangata pe fefine ke ha‘u mo kinautolu ki Kati, he‘ene pehē, Na‘a nau tala ‘etau me‘a, Tokua na‘e pehē ‘a e fai ‘a Tēvita, pea ‘e pehē ‘ene anga lolotonga ‘ene nofo ‘i he tuku‘uta ‘o Filisitia.

¹²Pea tui ‘e ‘Ākisi kia Tēvita, ‘o ne pehē, Kuo mātu‘aki fakanamukuu‘i ia ‘e ia ki hono kakai ‘Isileli, ko ia te ne nofo ko ‘eku tamaio‘eiki ‘o ta‘engata.