Read KO E TOH TAPU KATOA TONGA KO 1 SĀMIUELA 28 Bible Online

KO 1 SĀMIUELA 28 - KO E TOH TAPU KATOA TONGA bible

KO 1 SĀMIUELA 28

¹PEA ko e taimi ko ia na‘e tānaki ‘e he kau Filisitia ‘enau ngaahi kongakau, ke fakataha ‘o fai tau mo ‘Isileli. Pea me‘a ‘a ‘Ākisi kia Tēvita, Ke mahino kiate koe te ta ō mo au ‘i he kongakau, ‘a koe mo ho‘o kau tangata.

²Pea tali ‘e Tēvita kia ‘Ākisi, Ka pehē, te ke ‘ilo ‘a e me‘a ‘e fai ‘e ho‘o tamaio‘eiki. Pea tali ‘e ‘Ākisi kia Tēvita, Ka pehē, te u ngaohi koe ko e tauhi ‘o hoku ‘ulu ma‘u ai pē.

³Pea ko eni, ko Sāmiuela kuo pekia, pea kuo fai hono tēngihia ‘e ‘Isileli kotoa, pea kuo nau telio ia ‘i Lama, ‘i hono kolo ‘o‘ona; pea kuo kapusi ‘e Saula ‘a e kau fakahā‘ele fa‘ahikehe mo e fa‘ahinga tuki mei he fonua.

⁴Pea fakataha ‘a e kau Filisitia, pea nau ha‘u ‘o fokotu‘u tēniti ‘i Sūnemi; pea tānaki ‘e Saula ‘a ‘Isileli kātoa, ‘o nau fokotu‘u tēniti ‘i Kilipoa.

⁵Pea ‘i he vakai ‘e Saula ‘a e hōsitē Filisitia, na‘a ne ilifia, pea toutou hono manava.

⁶Pea kuo huhū ‘a Saula ki he ‘Eiki, ka na‘e ‘ikai te ne tali ‘i ha misi, pe ‘i he ‘Ūlimi, pe ‘i ha palōfita.[74]

⁷Pea na‘e toki me‘a ‘a Saula ki he‘ene kau tamaio‘eiki, Kumi mai ha fefine fakahā‘ele fa‘ahikehe, ka u ‘alu ki ai, ‘o huhū ki ai. Pea tali ‘e he‘ene kau tamaio‘eiki, Tokua ‘oku ‘i ai ha fefine ‘i ‘Enitoa ‘oku fai fakahā‘ele.

⁸Pea fakakehe ia ‘e Saula, ‘o ne ‘ai ha kofu kehe, ‘o ne ‘alu fakataha mo ha ongo tangata, ‘o nau a‘u ki he fefine po‘uli, ‘o ne pehē, Fai mu‘a ha tongafisi ma‘aku ‘i ho tēvolo, pea fakahā‘ele hake kiate au ‘a e toko taha te u tala kiate koe.

⁹Pea tali ‘e he fefine, ‘Ē, ‘oku ke ‘ilo ‘a e me‘a kuo fai ‘e Saula, ‘ene kapusi mei he fonua ‘a e kau fakahā‘ele mo e kau tuki[75] pea ko e hā ai ‘oku ke ‘ai ha tauhele ki he‘eku mo‘ui ke u mate ai?

¹⁰Pea fuakava ‘a Saula ki he fefine ‘ia Sihova, he‘ene pehē, Tangi mo‘oni ‘a Sihova ‘e ‘ikai tō kia koe ha kovi ‘i he me‘a ni.

¹¹Pea toki pehē ‘a e fefine, Ko hai te u ‘ohake kiate koe? Pea tali ‘e ia, Fakahā‘ele mai ‘a Sāmiuela.

¹²Pea ‘i he mamata ‘a e fefine kia Sāmiuela, na‘a ne fu‘u kaila le‘o lahi. Pea lea ‘a e fefine kia Saula, ‘o pehē, Ko e hā kuo ke kākaa‘i ai au, he ko Saula koe?

¹³Pea me‘a ‘a e tu‘i ki ai, ‘Oua te ke manavahē; he ko e hā ‘a e me‘a ‘oku ke sio ki ai? Pea tali ‘e he fefine kia Saula, ‘Oku ou sio ki ha fa‘ahikehe ‘oku ‘alu hake mei he kelekele.

¹⁴Pea ne me‘a kiate ia, ko e hā hono anga? Pea ne tali, Ko e tangata motu‘a ‘oku ‘alu hake, pea ‘oku ne ‘ai ha kofu tōtōlofa. Pea ‘ilo ‘e Saula, tā ko Sāmiuela, pea ne punou ki he kele kele, ‘o faka‘apa‘apa.

¹⁵Pea pehē ‘e Sāmiuela kia Saula, Ko e hā kuo ke ue‘i ai au ke ‘ohake au? Pea tali ‘e Saula, Kuo u faingata‘a‘ia lahi, he ‘oku fai tau kiate au ‘e he kau Filisitia, pea kuo mahu‘i ‘a e ‘Otua meiate au, ‘o ‘ikai te ne kei tali au ‘i he kau palōfita, pe ‘i ha misi; ko ia kuo u ui ai koe, koe‘uhi ke ke fale‘i au ki ha me‘a te u fai.

¹⁶Pea tali ‘e Sāmiuela, Pea koe‘uma‘ā ho‘o huhū kiate au, ka kuo mahu‘i ‘a e ‘Eiki meiate koe, pea kuo ne hoko ko ho fili?

¹⁷Pea kuo hanga ‘o fai ‘e Sihova ‘o hangē ko ‘ene folofola ‘iate au, pea hae ‘e Sihova ‘a e pule‘anga meiate koe, pea kuo ne tuku ki ho kaungā‘api, kia Tēvita.

¹⁸Koe‘uhi ā na‘e ‘ikai te ke fakaongo ki he le‘o ‘o Sihova; pea na‘e ‘ikai te ke fakaai ‘a e kakaha ‘o ‘ene houhau ki ‘Amaleki, ‘a ē ā kuo feia ai ‘e Sihova ‘a e me‘a ko eni kia koe he ‘aho ni.

¹⁹Kae‘uma‘ā ‘e tuku ‘e Sihova ‘a ‘Isileli foki fakataha mo koe ki he nima ‘o e kau Filisitia; pea ko e ‘apongipongi ko koe mo ho ngaahi foha te mou ‘i heni mo au: pea ‘e tuku foki ‘e Sihova ‘a e hōsitē ‘o ‘Isileli ki he nima ‘o e kau Filisitia.

²⁰Pea tō lafalafa leva ‘a Saula ki he kelekele kuo ne ilifia ‘aupito ‘i he ngaahi lea ‘a Sāmiuela; na‘e ‘ikai foki ha mālohi ‘iate ia, he kuo ‘ikai te ne kai me‘akai ‘i he ‘aho kotoa mo e pō.

²¹Pea ha‘u ‘a e fefine kia Saula, ‘o ne vakai kuo ne mo‘utāfu‘ua, ‘o ne fakatau folofola kiate ia, Ko eni, kuo fakaongo ‘e ho‘o kaunanga ko au ki ho le‘o, pea kuo u tuku noa ‘eku mo‘ui, pea u fakaongo ki he folofola na‘a ke fai mai.

²²Pea ko ia, fakamolemole ka ke fakaongo mo koe foki ki he le‘o ‘o kita tu‘a ni, ka u tuku ‘i ho ‘ao ha kihi‘i me‘a tokoni, ka ke fai ho‘o taumafa, ke ai ha‘o mālohi ‘oka ke ka fai atu ho‘o fononga.

²³Ka ka fakafisi ‘e ia, ‘o ne pehē, ‘E ‘ikai te u tokoni. Ka ka fai mālohi ki ai ‘ene ongo tamaio‘eiki mo e fefine foki; pea ne fakaongo kiate kinautolu; ko ia na‘a ne tu‘u mei he kelekele, ‘o ne nofo ‘i he mohenga.

²⁴Pea na‘e ma‘u ‘e he fefine ‘i he fale ha ki‘i pulu tali ‘eiki: pea ne fai vave ‘o tāmate‘i ia, ‘o ne to‘o mahoa‘a ‘o natu, ‘o ta‘o keke ta‘elēvani.

²⁵Pea ne ‘omi, ‘o tuku ‘i he ‘ao ‘o Saula, pea ki he ‘ao ‘o ‘ene ongo tamaio‘eiki, pea na‘a nau tokoni, pea nau tutu‘u ‘o ‘alu ‘i he pō ko ia.