Read KO E TOH TAPU KATOA TONGA KO 1 SĀMIUELA 29 Bible Online

KO 1 SĀMIUELA 29 - KO E TOH TAPU KATOA TONGA bible

KO 1 SĀMIUELA 29

¹PEA tānaki ‘e he kau Filisitia ‘enau ngaahi kongakau ki ‘Ēfeki: ka na‘e ‘apitanga ‘a e kau ‘Isileli ‘i he fauniteni ‘oku ‘i Sisilili.

²Pea laka atu ‘a e ngaahi ‘ulu ‘o e kau Filisitia, ‘o fakateau mo fakaafe, pea ko Tēvita mo ‘ene kau tangata na‘e ‘alu ‘i he tukutau mo ‘Ākisi.

³Pea pehē ‘e he hou‘eiki Filisitia, Ko e hā ‘a e kau Hepelū na? Pea tali ‘e ‘Ākisi ki he hou‘eiki Filisitia, ‘Ikai ko Tēvita ia ko e tamaio‘eiki ‘a Saula ko e Tu‘i ‘Isileli, ‘a ia kuo ne nofo kiate au fuoloa, ‘o lau ta‘u, ‘o ‘ikai te u ‘ilo ha me‘a ‘i ai talu e ‘aho na‘a ne tō mai ai.

⁴Ka na‘e tuputāmaki kiate ia ‘a e hou‘eiki Filisitia, ‘o nau pehē ki ai, Fakafoki ‘a e tangata ni ke ne foki ki he potu kuo ke vahe kiate ia, ‘o ‘oua te ne ‘alu hifo mo kitautolu ki he tau; na‘a ne hoko ko hotau fili lolotonga ‘a e tau: he ko e hā ha toe me‘a ke fakalelei ‘aki ‘e he siana ni mo hono ‘Eiki? ‘ikai ko e ngaahi ‘ulu ‘o e kau tangata ni?

⁵‘Ikai ko Tēvita ‘eni, ‘a ia na‘a nau hiva fetāliaki ai ‘i he‘enau ngaahi me‘e, ‘o pehē, ‘A e taa‘i ‘e Saula ‘ene toko‘i afe, Mo e ngaahi mano ‘a Tēvita ē?

⁶Pea ui ange ‘e ‘Ākisi ‘a Tēvita, ‘o ne pehē ki ai, Tangi mo‘oni ‘a Sihova, kuo ke fai tōnunga, pea ko ho‘o ‘alu kitu‘a mo hū mai ‘i he tau kuo u lelei‘ia ai; he kuo ‘ikai te u ‘ilo ha kovi ‘iate koe tālunga ‘a e ‘aho na‘a ke ha‘u ai kiate au; ka ‘oku ‘ikai lelei‘ia ‘iate koe ‘a hou‘eiki.

⁷Pea ko ia ke ke foki, ‘o ‘alu fiemālie, na‘a kovi ho‘o ngāue ‘i he ‘ao ‘o e ‘ulu Filisitia.

⁸Pea tali ‘e Tēvita kia ‘Ākisi, He ko e hā kuo u fai? pe ko e hā ha me‘a kuo ke ‘ilo ‘i ho‘o tamaio‘eiki talu ‘eku taka ‘i ho ‘ao ‘o a‘u ki he ‘aho ni, ke tapu ai ‘eku ‘alu ke fai tau mo e ngaahi fili ‘o e ‘afio ‘a e tu‘i?

⁹Pea tali ‘a ‘Ākisi, ‘o ne pehē kia Tēvita, ‘oku ou ‘ilo pē ‘oku ke hā lelei kiate au, ‘o hangē ha ‘āngelo ‘a e ‘Otua; ka neongo ia, ka kuo me‘a ‘a e hou‘eiki Filisitia, ‘E ‘ikai ‘alu ia mo kitautolu ki he tau.

¹⁰Ko ia ke ke tu‘u hengihengi hake, mo e kau tamaio‘eiki ‘a ho ‘eiki kuo omi mo koe; pea kuo mou tu‘u hake leva hengihengi, pea kuo maama, pea mou ō.

¹¹Ko ia na‘e tu‘u hake hengihengi ‘e ia mo ‘ene kau tangata, ke ‘alu pongipongi, ‘o foki ki he fonua ‘o e kau Filisitia. Pea ‘alu hake ‘a e kau Filisitia ki Sisilili.