Read KO E TOH TAPU KATOA TONGA KO 1 SĀMIUELA 31 Bible Online

KO 1 SĀMIUELA 31 - KO E TOH TAPU KATOA TONGA bible

KO 1 SĀMIUELA 31

¹PEA fai tau ‘a e kau Filisitia ki ‘Isileli, pea hola ‘a e kau tangata ‘Isileli mei he ‘ao ‘o e kau Filisitia, pea na‘e ai ha tō ‘i Mo‘unga Kilipoa.

²Pea tata‘o mai ‘a e kau Filisitia, ‘o nau tuli kia Saula mo hono ngaahi foha, ‘o nau taa‘i ‘a Sonatane, mo ‘Apinatape, mo Malikisua, ko e ngaahi foha ‘o Saula.

³Pea na‘e mamafa ‘a e tau kia Saula, pea na‘e ma‘u ia ‘e he kakai fana ngahau, pea na‘a ne mamahi lahi ‘i he a‘u ‘a e kau fana.

⁴Pea pehē ‘e Saula ki he‘ene fua mahafu, Unuhi ho‘o heletā, ‘o tui ‘aki au; na‘a a‘u mai ‘a e kau ta‘ekamu na, ‘o tui‘i au, ‘o nau fakatakataka ‘aki au. Ka na‘e ‘ikai fie fai ‘e he‘ene fua mahafu, ko ‘ene manavahē lahi; ko ia, na‘e to‘o ‘e Saula ‘ene heletā ‘a‘ana, ‘o ne fakahinga ki ai.

⁵Pea ‘i he vakai ‘e he‘ene fua mahafu kuo pekia ‘a Saula, na‘a ne fakahinga mo ia ki he‘ene heletā, ‘o na mate fakataha.

⁶Ko ia, na‘e pekia ‘a Saula, mo hono foha ‘e toko tolu, mo ‘ene fua mahafu, pea mo ‘ene kau tangata kotoa pē ‘i he ‘aho ko ia fakataha.

⁷Pea ko e kau tangata ‘Isileli na‘e ‘i he potu ‘e taha ‘o e lautoka, mo kinautolu na‘e ‘i he potu mai ‘o Soatani, ‘i he‘enau vakai ‘oku hola ‘a e kau tangata ‘Isileli, pea kuo pekia ‘a Saula mo hono ngaahi foha, na‘a nau li‘aki ‘a e ngaahi kolo ko ē ‘o nau hola: pea ha‘u ‘a e kau Filisitia, ‘o nofo ai.

⁸Pea ‘i he ha‘u ‘a e kau Filisitia pongipongi ke vete ‘a e pekia, na‘a nau ‘ilo ‘a Saula mo hono foha ‘e toko tolu ‘oku nau fetākoto‘i ‘i Mo‘unga Kilipoa.

⁹Pea nau tu‘usi hono ‘ulu, mo vete ‘ene mahafu, ‘o nau ‘ave holo ‘i he fonua ‘o e kau Filisitia, ke ongoongo ‘a e me‘a ki honau fale ‘aitoli mo e kakai.

¹⁰Pea nau tuku ‘ene mahafu ki he fale ‘o ‘Asiteloti: ka ko hono ‘anga‘anga na‘a nau fakama‘u fakau‘u ki he ‘ā ‘o Petesani.

¹¹Pea ‘i he fanongo ki ai ‘e he nofo Siepesikiliati, ki he me‘a kuo fai ‘e he kakai Filisitia kia Saula,

¹²pea tutu‘u ‘a e kau to‘a kotoa pē, pea nau to‘o ‘a e ‘anga‘anga ‘o Saula, mo e ngaahi ‘anga‘anga ‘o ‘ene fānau, mei he ‘ā ‘o Petesani; pea nau ha‘u mo kinautolu ki Siepesi, ‘o tanu ai.

¹³Pea nau to‘o honau ngaahi hui, ‘o tanu ‘i he lolo tamalisi ‘oku ‘i Siepesi, ‘o nau ‘aukai ‘o ‘aho fitu.