Read KO E TOH TAPU KATOA TONGA KO 1 SĀMIUELA 4 Bible Online

KO 1 SĀMIUELA 4 - KO E TOH TAPU KATOA TONGA bible

KO 1 SĀMIUELA 4

¹PEA ‘alu atu ‘a ‘Isileli ke fakahoko tau mo e kakai Filisitia,[12] ki ‘Epenisa: ka ka ‘apitanga ‘a e kakai Filisitia ‘i ‘Ēfeki.

²Pea na‘e fakatē ‘a e kau Filisitia ke fai mo ‘Isileli: pea ‘i he tuku atu ‘a e tau, na‘e nuiki ‘a ‘Isileli ‘i he ‘ao ‘o e kau Filisitia: he na‘a nau taa‘i ‘i he vao ha toko fā afe nai ‘i he mata tau.

³Pea ‘i he a‘u ‘a e kakai ki he ‘apitanga, na‘e pehē ‘e he kau mātu‘a ‘Isileli, Ko e hā kuo nuiki ai kitautolu ‘e Sihova he ‘aho ni ‘i he ‘ao ‘o e kau Filisitia! Tau ‘omi mu‘a mei Sailo ‘a e ‘A‘ake ‘o e Kovinānite ‘o Sihova, ke ha‘u ia[13] ki hotau lotolotonga, ‘o fakahaofi kitautolu mei he nima ‘o hotau ngaahi fili.

⁴Ko ia, na‘e fekau ‘e he kakai ki Sailo, ‘o nau ‘omi mei ai ‘a e ‘A‘ake ‘o e Kovinānite ‘o Sihova Sāpaoti, ‘a ia ‘oku ne ‘afioa ‘a e ongo selupimi:[14] pea na‘e ‘i ai ‘a e ongo foha ‘o ‘Īlai, ko Hofinai mo Finiasi, ‘o fakafe‘ao ki he ‘A‘ake ‘o e Kovinānite ‘o ‘Elohimi.

⁵Pea ‘i he hū mai ‘a e ‘A‘ake ‘o e Kovinānite ‘o Sihova ki he ‘apitanga, pea hiki ‘e ‘Isileli kātoa ‘enau fu‘u tuē, pea fe‘u‘ulu ai ‘a e fonua.

⁶Pea ‘i he fanongo ‘e he kau Filisitia ki he ongoonga‘a mai ‘a e tuē, na‘a nau pehē, Ko e hā ‘a e fu‘u tuē na ‘i he ‘apitanga ‘o e kau Hepelū ‘oku ongoonga‘a mai? Pea nau ‘ilo tā ko e ‘a‘ake ‘o Sihova kuo hū mai ki he ‘apitanga.

⁷Pea na‘e manavahē ‘a e kau Filisitia he‘enau pehē, Kuo hā‘ele mai ‘a e ‘Otua ki he ‘apitanga. Pea nau pehē, ‘Oiauē kitautolu! he kuo te‘eki pehē ha me‘a ha taimi.

⁸‘Oiauē kitautolu! Ko hai te ne fakahaofi kitautolu mei he nima ‘o e ngaahi ‘Otua Māfimafi na? Ko eni ‘a e ngaahi ‘otua na‘e taa‘i ‘a e kau ‘Isipite ‘aki ‘a e ngaahi tā kehekehe ‘i he Toafa.

⁹Mou lototo‘a, ‘a e kau Filisitia, ‘o fai ngali tangata, na‘a mou tamaio‘eiki ki he kau Hepelū, ‘o hangē ko ‘enau tamaio‘eiki kiate kitautolu: ko ia mou fai ‘o ngali tangata.

¹⁰Pea tau ‘a e kau Filisitia, pea na‘e nuiki ‘a ‘Isileli, ‘o nau hola takitaha ki honau tēniti: pea na‘e fai ha tā lahi ‘aupito: he na‘e tō ha toko tolu mano ‘i he tau hā‘ele ‘a ‘Isileli,

¹¹pea na‘e ma‘u ‘a e ‘A‘ake ‘o e ‘Otua, pea na‘e tāmate‘i ‘a e ongo foha ‘o ‘Īlai, ko Hofinai mo Finiasi.

¹²Pea na‘e lele ha tangata Penisimani mei he matatau, ‘o ne a‘u ki Sailo ‘i he ‘aho pē ko ia kuo hae hono kofu, pea kuo fakaefuefu hono ‘ulu.

¹³Pea ‘i he‘ene a‘u mai, tā ‘oku nofo ‘a ‘Īlai ‘i hono nofo‘a ‘i he ve‘ehala ke vakai; he na‘e moalo‘oa telia ‘a e ‘A‘ake ‘o ‘Elohimi. Pea ‘i he a‘u ‘a e tangata ki he kolo, ‘o tala ‘a e ongoongo, na‘e ‘oiauē ‘a e kolo kotoa.

¹⁴Pea ‘i he ongoonga‘a mai kia ‘Īlai ‘a e tangi, na‘a ne pehē, Ko e hā tū ‘a e maveuveu ni ‘oku longoa‘a? Pea fakavave mai ‘a e tangata, ‘o ne fakamatala kia ‘Īlai.

¹⁵Pea kuo hivangofulu mā valu ta‘u ‘a ‘Ilai: pea kuo ma‘u hono mata, ‘o ‘ikai te ne lava ke sio.

¹⁶Pea pehē ‘a e tangata kia ‘Īlai, Ko au mei he matatau, pea na‘a ku hola mei ai he ‘aho ni.

¹⁷Pea pehē ‘e ia, Na‘e fēfē ‘a e me‘a, tama? Pea tali ‘e ia na‘e ha‘u mo e ongoongo, ‘o pehē, Kuo hola ‘a ‘Isileli ‘i he ‘ao ‘o e kau Filisitia, pea kuo lahi foki ‘a e tō ‘a e kakai, pea kuo pekia ho ongo foha foki, ko Hofinai mo Finiasi, pea kuo ‘ave ‘a e ‘A‘ake ‘o ‘Elohimi.

¹⁸Pea ‘i he ‘iloange na‘a ne lau ki he ‘A‘ake ‘o ‘Elohimi, na‘a ne tō fo‘ohake mei hono nofo‘a ‘i he tafa‘aki matanikolo, pea na‘e fasi hono kia, ‘o ne pekia: he ko e motu‘a ia, pea mamafa ‘aupito. Pea kuo ne fai fakamaau ‘i ‘Isileli, ‘o fāngofulu ta‘u.

¹⁹Pea ko e uaifi ‘o hono foha ko Finiasi kuo feitama, ‘o tei fā‘ele: pea ‘i he‘ene fanongo ki he ongoongo, tokua kuo ‘ave ‘a e ‘A‘ake ‘o ‘Elohimi, pea kuo pekia hono husepāniti, mo ‘ene tamai, na‘a ne punou hifo leva ‘o fā‘ele; he na‘e langa‘i ai ‘ene langā.

²⁰Pea ‘i he‘ene hokotaki, na‘e pehē ange ‘e he kau fefine na‘e tutu‘u ofi mai, ‘Oua te ke manavahē; he kuo ke fā‘ele‘i ha tama. Ka na‘e ‘ikai ha‘ane tali, pea na‘e ‘ikai te ne tokanga ki ai.

²¹Pea ne fakahingoa ‘a e tamasi‘i ko ‘Ikapote (ko Ta‘e-ha-lāngilangi), he‘ene pehē, Kuo mole ‘a e lāngilangi ‘o ‘Isileli: ko ‘ene lau ki he ‘ave ‘o e ‘A‘ake ‘o ‘Elohimi, pea mo hono husepāniti mo ‘ene tamai.

²²Pea ne pehē, Kuo mole ‘a e lāngilangi mei ‘Isileli; he kuo ‘ave ‘a e ‘A‘ake ‘o ‘Elohimi.