Read KO E TOH TAPU KATOA TONGA KO 1 SĀMIUELA 8 Bible Online

KO 1 SĀMIUELA 8 - KO E TOH TAPU KATOA TONGA bible

KO 1 SĀMIUELA 8

¹PEA ‘i he faifai pea motu‘a ‘a Sāmiuela, na‘a ne fokotu‘u hono ngaahi foha ko e kau fakamaau ki ‘Isileli.

²Pea ko e hingoa ‘o hono ‘uluaki foha ko Sioeli; pea ko e hingoa ‘o hono ua ko ‘Āpaia: ko kinaua na‘e fakamaau ‘i Peasipa.

³Ka na‘e ‘ikai fou ‘ene fānau ‘i hono ngaahi founga ‘o‘ona, ka na‘a na afe ko e sio koloa, pea nau tali me‘a‘ofa, ‘o nau le‘ei ‘a e fakamaau.

⁴Pea toki fakataha mai ‘a e kau mātu‘a ‘o ‘Isileli, ‘o nau a‘u kia Sāmiuela ki Lama;

⁵pea nau pehē kiate ia, Ko eni ‘oku ke motu‘a, pea ko ho‘o fānau ‘oku ‘ikai te nau fou ‘i ho ngaahi founga: ko ia ke ke fokotu‘u hatau tu‘i ke fakamaau kitautolu, ‘o hangē ko e ngaahi kakai kotoa pē.

⁶Ka na‘e hā kovi kia Sāmiuela ‘a e me‘a, ‘a ‘enau pehē, ‘Omi hatau tu‘i ke fakamaau kitautolu. Pea lotu ‘a Sāmiuela kia Sihova.

⁷Pea folofola ‘a Sihova kia Sāmiuela, Fakaongo ki he lea ‘a e kakai ‘i he me‘a kotoa kuo nau lea‘aki kiate koe: he ‘oku ‘ikai ko koe kuo nau li‘aki, ka kuo nau li‘aki au mei he nofo ko honau tu‘i.

⁸Ko e anga ai pē ia ‘o e me‘a kotoa kuo nau fai, mei he ‘aho na‘a ku ‘ohake kinautolu mei ‘Isipite, ‘o a‘u ki he ‘aho ko eni, ‘a ‘enau li‘aki au, mo tauhi ‘otua kehe, kuo pehē foki ‘enau fai kiate koe.

⁹Pea ko eni ke ke fakaongo ki he‘enau lea; ngata pē te ke mātu‘aki na‘ina‘i kiate kinautolu, ‘o hīnoi‘i kinautolu ‘a e konisitūtone ‘o e tu‘i te ne pule kiate kinautolu.

¹⁰Pea na‘e tala ‘e Sāmiuela ‘a e ngaahi folofola kotoa ‘a Sihova ki he kakai na‘e kole ha tu‘i meiate ia.

¹¹Pea ne pehē, Ko eni ‘a e konisitūtone ‘a e tu‘i te ne pule kiate kimoutolu; te ne to‘o ho‘omou fānau tangata, ‘o fokotu‘u ke fai lakanga ma‘ana, ki he‘ene ngaahi sāliote, pea ki he‘ene ka‘ate heka hoosi; pea te nau lele mu‘omu‘a ‘i he‘ene ngaahi sāliote:

¹²pea te ne tu‘utu‘uni ma‘ane hou‘eiki tau, ke pule ki he toko‘i afe mo e toko‘i nimangofulu; pea ke huo ‘ene ngoue‘anga, pea ke utu hono ta‘u, pea ke ngaohi ‘a e nāunau ‘o e tau mo e nāunau ‘o e sāliote.

¹³Pea te ne to‘o ho‘omou fānau fefine ma‘ane kau fai lolo, pea ma‘ane kau ngaohi kai, pea ma‘ane kau ta‘o mā.

¹⁴Pea te ne to‘o homou ngaahi konga vao, mo ho‘omou ngaahi vaine, mo ho‘omou ngaahi ngoue ‘ōlive, ‘a honau lelei, ‘o foaki ki he‘ene kau tamaio‘eiki.

¹⁵Pea te ne to‘o ‘a e vahehongofulu ‘o ho‘omou pulopula, pea mo ho‘omou ngoue vaine, ‘o foaki ki he‘ene kau ‘iunoke mo ‘ene kau tamaio‘eiki.

¹⁶Pea te ne to‘o ho‘omou tamaio‘eiki, mo ho‘omou kau kaunanga, mo e lelei ‘o ho‘omou fanga pulu,[17] mo ho‘omou fanga ‘asi, ‘o ngāue‘aki ‘i he‘ene me‘a ‘a‘ana —

¹⁷‘a e vahehongofulu ‘o ho‘omou fanga sipi mo e kosi: pea ko kimoutolu te mou tamaio‘eiki kiate ia.

¹⁸Pea te mou tautapa ‘i he ‘aho ko ia, koe‘uhi ko e tu‘i na‘a mou fili ma‘amoutolu; kae ‘ikai tali kimoutolu ‘e he ‘Eiki ‘i he ‘aho ko ia.

¹⁹Ka ka ‘ikai fie fanongo ‘e he kakai ki he lea ‘a Sāmiuela; pea nau pehē, ‘Ikai; ka kuo pau ke ‘ai hatau tu‘i; koe‘uhi foki ke tau tatau mo e pule‘anga kotoa pē;

²⁰pea ke fai fakamaau ma‘atautolu ‘e hotau tu‘i, pea ke ne taki kitautolu, ‘o angi ‘i he‘etau ngaahi tau.

²¹Pea ongona ‘e Sāmiuela ‘a e ngaahi lea kotoa ‘a e kakai, ‘o ne ‘a‘au ‘i he fofonga ‘o Sihova.

²²Pea folofola ‘a Sihova kia Sāmiuela, Fakaongo pē ki he‘enau lea, ‘o fakanofo hanau tu‘i. Pea pehē ‘e Sāmiuela ki he kau tangata ‘Isileli, takitaha ‘alu ki hono kolo.