Read Кыргыз тилиндеги Библия, 2004 Башталыш 5 Bible Online

Башталыш 5 - Кыргыз тилиндеги Библия, 2004 bible

Башталыш 5

¹Адамдын санжырасы мындай: Кудай адамды жаратканда, аны Кудайга окшоштуруп жаратты.

²Аларды эркек-аял кылып жаратып, аларга батасын берди. Жараткан күнү аларды «адам» деп атады.

³Адам жүз отуз жашка чыкканда, анын бейнеси боюнча ага окшош уул төрөлдү. Ал ага Шет деген ат койду.

⁴Шет төрөлгөндөн кийин, Адам сегиз жүз жыл жашады. Андан дагы уул-кыздар төрөлдү.

⁵Адам бардыгы болуп тогуз жүз отуз жыл жашап көз жумду.

⁶Шет жүз беш жашка чыкканда, андан Энош төрөлдү.

⁷Энош төрөлгөндөн кийин, Шет сегиз жүз жети жыл жашады. Андан дагы уул-кыздар төрөлдү.

⁸Шет бардыгы болуп тогуз жүз он эки жыл жашап көз жумду.

⁹Энош токсон жашка чыкканда, андан Кейнан төрөлдү.

¹⁰Кейнан төрөлгөндөн кийин, Энош сегиз жүз он беш жыл жашады. Андан дагы уул-кыздар төрөлдү.

¹¹Энош бардыгы болуп тогуз жүз беш жыл жашап көз жумду.

¹²Кейнан жетимиш жашка чыкканда, андан Маалалел төрөлдү.

¹³Маалалел төрөлгөндөн кийин, Кейнан сегиз жүз кырк жыл жашады. Андан дагы уул-кыздар төрөлдү.

¹⁴Кейнан бардыгы болуп тогуз жүз он жыл жашап көз жумду.

¹⁵Маалалел алтымыш беш жашка чыкканда, андан Жарет төрөлдү.

¹⁶Жарет төрөлгөндөн кийин, Маалалел сегиз жүз отуз жыл жашады. Андан дагы уул-кыздар төрөлдү.

¹⁷Маалалел бардыгы болуп сегиз жүз токсон беш жыл жашап көз жумду.

¹⁸Жарет жүз алтымыш эки жашка чыкканда, андан Энох төрөлдү.

¹⁹Энох төрөлгөндөн кийин, Жарет сегиз жүз жыл жашады. Андан дагы уул-кыздар төрөлдү.

²⁰Жарет бардыгы болуп тогуз жүз алтымыш эки жыл жашап көз жумду.

²¹Энох алтымыш беш жашка чыкканда, андан Матушал төрөлдү.

²²Матушал төрөлгөндөн кийин, Энох Кудай алдында үч жүз жыл жашады. Андан дагы уул-кыздар төрөлдү.

²³Энох бардыгы болуп үч жүз алтымыш беш жыл жашады.

²⁴Энох Кудай алдында түз жүрдү. Анан жок болуп кетти, анткени аны Кудай алып кетти.

²⁵Матушал жүз сексен жети жашка чыкканда, андан Лемек төрөлдү.

²⁶Лемек төрөлгөндөн кийин, Матушал жети жүз сексен эки жыл жашады. Андан дагы уул-кыздар төрөлдү.

²⁷Матушал бардыгы болуп тогуз жүз алтымыш тогуз жыл жашап көз жумду.

²⁸Лемек жүз сексен эки жашка чыкканда, андан уул төрөлдү.

²⁹Ал ага Нух деген ат коюп: «Теңир каргаган жерди иштетип, эмгектенип жатканыбызда, ал бизге сооронуч болсун», – деди.

³⁰Нух төрөлгөндөн кийин, Лемек беш жүз токсон беш жыл жашады. Андан дагы уул-кыздар төрөлдү.

³¹Лемек бардыгы болуп жети жүз жетимиш жети жыл жашап көз жумду.

³²Нух беш жүз жашка чыкканда, андан Шем, Хам, Жепет төрөлдү.