Read Кыргыз тилиндеги Библия, 2004 Башталыш 7 Bible Online

Башталыш 7 - Кыргыз тилиндеги Библия, 2004 bible

Башталыш 7

¹Ошондо Теңир Нухка мындай деди: «Бүт үй-бүлөң менен кемеге кир, анткени замандаштарыңдын ичинен сени Өзүмдүн алдымда адил деп таптым.

²Жер үстүндө тукумун сактап калыш үчүн, ар бир адал малдын эркек-ургаачысынан жетини, адал эмес малдын эркек-ургаачысынан экини,

³асман канаттууларынын эркек-ургаачысынан жетини ал.

⁴Анткени жети күндөн кийин Мен жер бетине кырк күн, кырк түн жамгыр төгүп, Өзүм жараткан тирүү жандардын баарын жер бетинен жок кылам».

⁵Теңир эмнени буйруса, Нух ошонун бардыгын жасады.

⁶Жер бетин топон суу каптаганда, Нух алты жүз жашта эле.

⁷Топон суу каптардын алдында Нух уулдары, аялы, келиндери менен кемеге кирди.

⁸Адал жана адал эмес малдар, жер үстүндө сойлоп жүрүүчү жаныбарлар,

⁹Кудай Нухка буйрук кылгандай, түгөй-түгөйү менен, эркек-ургаачы болуп, Нухтун кемесине киришти.

¹⁰Жети күн өткөндөн кийин жер бетин топон суу каптады.

¹¹Нухтун өмүр сүргөнүнө алты жүз жыл болгондо, экинчи айдын он жетинчи күнү зор туңгуюктун бардык булактары атырылып ачылды, асман терезелери да ачылды.

¹²Жер бетине кырк күн, кырк түн жамгыр төгүп турду.

¹³Так ошол күнү Нух уулдары Шем, Хам, Жепет менен, аялы жана келиндери менен кемеге кирди.

¹⁴Алар менен кошо бардык жаныбарлар, түр-түрү менен малдар, жер үстүндө сойлоп жүрүүчү жаныбарлар, түр-түрү менен бардык учуп жүрүүчүлөр, бардык канаттуулар, бардык куштар,

¹⁵өмүр деми бар тирүү жандыктардын баары түгөйү менен Нухтун кемесине киришти.

¹⁶Кудай Нухка буйругандай, бардык жаныбарлар эркек-ургаачы болуп кемеге киришти. Ошондо алардын артынан Теңир эшикти жапты.

¹⁷Жер бетинде топон суу кырк күнгө созулду. Суу көбөйүп, кемени көтөрдү. Кеме жерден жогору көтөрүлдү.

¹⁸Суу болсо күчөп, көбөйгөндөн көбөйө берди. Кеме суунун үстүндө калкып калды.

¹⁹Суу жер бетинде күчөгөндүктөн, асман астындагы бардык бийик тоолор суу астында калды.

²⁰Суу тоолордон он беш чыканактай жогору көтөрүлүп, аларды басып калды.

²¹Жер бетиндеги кыбыр эткен бардык тирүү жандар: канаттуулар, малдар, жаныбарлар, жер үстүндө сойлоп жүрүүчү бардык жаныбарлар жана бардык адамдар өмүрүнөн ажырады.

²²Кургактыкта жашаган, таноосунда өмүр рухунун деми бар тирүү жандардын бардыгы кырылды.

²³Жер үстүндөгү тирүү жандын бардыгы кырылды: адамдан тартып малга чейин, сойлоп жүрүүчү жаныбарлар, асман канаттуулары – бардыгы кырылып, жер бетинен жок болду. Нух менен кемеге киргендер гана тирүү калышты.

²⁴Жер бетинде суунун деңгээли жүз элүү күн бою улам жогорулап турду.