Read Кыргыз тилиндеги Библия, 2004 1 Жылнаама 16 Bible Online

1 Жылнаама 16 - Кыргыз тилиндеги Библия, 2004 bible

1 Жылнаама 16

¹Алар Кудайдын келишим сандыгын алып келишип, аны Дөөт тургузган жыйын чатырынын ортосуна коюшту. Анан Кудайга арнап бүтүндөй өрттөлүүчү курмандыктарды жана тынчтык курмандыктарын чалышты.

²Дөөт бүтүндөй өрттөлүүчү курмандыктар менен тынчтык курмандыктарын чалгандан кийин, элге Кудайдын ысымынан бата берди.

³Анан бардык ысрайылдыктарга, эркектерге жана аялдарга бирден нан, бир кесимден эт, мейиз кошулган бирден таттуу токоч таратты.

⁴Ысрайылдын Кудай-Теңирин даңктап, ыр менен мактап, ыраазычылык билдирип туруш үчүн, Теңирдин келишим сандыгынын алдына лебилерди кызматка койду.

⁵Асапты башчы кылып койду. Арфа чертип, лира тартып туруш үчүн, экинчи катарга Захарияны, Жейелди, Шемирамотту, Жехиелди, Мататияны, Элийапты, Бенаяны, Обейт-Эдомду жана Жейелди койду. Жез табак кагып турушу үчүн Асапты койду.

⁶Ал эми ыйык кызмат кылуучулар Беная менен Жехазиелди Кудайдын келишим сандыгынын алдында дайыма сурнай тартып туруу үчүн койду.

⁷Ошол күнү Дөөт биринчи жолу Асапка жана анын бир туугандарына Теңирди даңктап ырдап туруш үчүн, бул забурду тапшырды:

⁸«Теңирди даңктагыла, Анын ысымын жар салгыла, Анын иштерин бүт элдерге жарыялагыла.

⁹Ага ырдагыла, Аны даңктагыла, Анын бардык кереметтери жөнүндө айткыла.

¹⁰Анын ыйык ысымы менен мактангыла. Теңирди издегендердин жүрөгү кубансын.

¹¹Теңирди жана Анын күчүн издегиле, Анын жүзүн тынымсыз издегиле.

¹²Ысрайыл тукуму, Анын кулдары, Жакыптын уулдары, Анын тандалгандары, силер,

¹³Ал жасаган кереметтерди, Анын жышаандарын жана Анын оозунан чыккан өкүмдөрүн унутпагыла.

¹⁴Ал биздин Кудай-Теңирибиз. Анын өкүмдөрү бүт жер жүзүндө.

¹⁵Анын келишимин, Анын муундан муунга осуят кылган сөзүн унутпагыла.

¹⁶Ал сөз – Ыбрайымга берилген осуят, Ыскакка берилген ант.

¹⁷Аны Жакыпка мыйзам кылып, Ысрайылга түбөлүк келишим кылып берем.

¹⁸Ал: “Мен сага Канаан жерин мураска берем”, – деп айткан.

¹⁹Ошол убакта алардын саны аз, өтө эле аз эле. Ал жерде алар келгин эл болуп жашап турушкан.

²⁰Алар бир элден бир элге, бир өлкөдөн бир өлкөгө барып жер кезишкен.

²¹Бирок Ал эч кимдин аларды кордоосуна жол берген эмес, алар үчүн падышаларды ашкере кылган:

²²“Менин майлангандарыма тийбегиле, Менин пайгамбарларыма жамандык кылбагыла”.

²³Бүт жер жүзү, Теңирге ырда, Анын куткаруусун күн сайын жарыялагыла.

²⁴Анын даңкын бутпарастарга, кереметтерин жер жүзүндөгү бардык элдерге жарыя кылгыла.

²⁵Анткени Теңир улуу жана мактоого татыктуу, бардык кудайлардан коркунучтуу.

²⁶Анткени башка элдердин кудайлары – болбогон нерсе. Ал эми Теңир асманды жараткан.

²⁷Даңк менен улуулук Анын алдында, кудурет жана кубаныч Ал турган жерде.

²⁸Бүт элдер, Теңирге Өзүнө тиешелүүсүн бергиле, Теңирди даңктагыла жана урматтагыла.

²⁹Теңирди даңктагыла, Анын ысымын даңазалагыла. Тартуу алып, Анын алдына баргыла, Ага Өзүнүн ыйык жайында табынгыла.

³⁰Бүт жер жүзү, Анын алдында титире, анткени Ал ааламды негиздеген, ал солк этпейт.

³¹Асман кубансын, жер шаттансын, элдер: “Теңир падышачылык кылып жатат!” – дешсин.

³²Деңиз шарпылдасын, анын ичиндегилер кубансын. Талаа жана андагы бардык нерселер кубансын.

³³Токойдогу дарактардын бардыгы Теңирдин алдында кубанышсын, анткени Теңир жерди соттогону келе жатат.

³⁴Теңирди даңктагыла, анткени Анын ырайымы түбөлүктүү.

³⁵“Кудайыбыз, Куткаруучубуз, бизди куткар! Бизди чогулт, бизди башка элдерден куткар, биз Сенин ыйык ысымыңды даңктайлы, Сенин даңкың менен мактаналы!” – дегиле.

³⁶Ысрайылдын Кудай-Теңири кылымдан кылымга даңкталсын!» Ошондо бүт эл: «Оомийин! Теңирди даңктагыла!» – деди.

³⁷Келишим сандыгынын алдында дайыма, ар күнү кызмат кылып туруш үчүн, Асапты жана анын бир туугандарын Дөөт ошол жерге калтырды.

³⁸Обейт-Эдомду жана анын бир туугандарын, алтымыш сегиз адамды калтырды. Жедутундун уулу Обейт-Эдомду жана Хосаны дарбазачы кылып койду.

³⁹Ал эми ыйык кызмат кылуучу Садок менен анын ыйык кызмат кылуучу бир туугандарын Гибон дөңсөөсүндөгү Кудай үйүнүн алдына,

⁴⁰курмандык чалынуучу жайда дайыма, ар күнү эртең менен жана кечинде Теңирге арнап бүтүндөй өрттөлүүчү курмандык өрттөп туруу үчүн, Теңирдин Ысрайылга берген мыйзамында жазылгандын бардыгын аткарып туруш үчүн койду.

⁴¹Алар менен бирге Эйманды, Жедутунду жана Теңирди даңктап туруш үчүн, аттары аталып, атайы дайындалган дагы башка тандалган адамдарды койду, анткени Теңирдин ырайымы кылымдардан кылымдарга!

⁴²Алардын алдында Эйман менен Жедутун сурнай тартып, жез табак кагып, ар түрдүү күү аспаптарды чертип, Кудайды даңктап турушту. Ал эми Жедутундун уулдарын дарбазанын алдына койду.

⁴³Ошондон кийин бардык эл, ар ким өз үйүнө кайтты. Дөөт да өз үй-бүлөсүнө бата бериш үчүн кайтып келди.