Read Кыргыз тилиндеги Библия, 2004 Чыгуу 40 Bible Online

Чыгуу 40 - Кыргыз тилиндеги Библия, 2004 bible

Чыгуу 40

¹Теңир Мусага мындай деди:

²«Биринчи айдын биринчи күнү жыйын чатырын тик.

³Анын ичине келишим сандыгын алып кирип, сандыктын алдына көшөгөнү ил.

⁴Yстөлдү алып кирип, анын үстүнө идиштерин кой, анан чырактанды алып кирип, анын үстүнө чырактарын кой.

⁵Алтындан жасалган жыпар жыттуу зат түтөтүлүүчү жайды алып кирип, келишим сандыгынын тушуна кой, жыйын чатырынын кире беришине көшөгөнү ил.

⁶Курмандык чалынуучу жайды жыйын чатырынын алдына кой.

⁷Жуунгучту жыйын чатыры менен курмандык чалынуучу жайдын ортосуна коюп, ичине суу куюп кой.

⁸Короону жабуу менен курча, короонун кире беришинин көшөгөсүн ил.

⁹Майлоочу майды алып, жыйын чатырын жана ага тиешелүү бардык нерсени ыйыкташ үчүн майлап чык, ошондо алар ыйык болот.

¹⁰Курмандык чалынуучу жайды жана ага тиешелүү бардык нерселерди майлап чык. Курмандык чалынуучу жайды ыйыкта, ошондо ал эң ыйык жай болот.

¹¹Жуунгучту жана анын түбүн майлап ыйыкта.

¹²Арунду жана анын уулдарын жыйын чатырынын алдына алып келип, сууга жуунт.

¹³Мага ыйык кызмат кылышы үчүн, Арунга ыйык кийимдерди кийгизип, аны майлап, ыйык кызматка дайында.

¹⁴Анын уулдарын алып келип, аларга узун көйнөктөрдү кийгиз.

¹⁵Алар Мага ыйык кызмат кылышы үчүн, аларды да атасын майлагандай майла. Бул майлоо аларды түбөлүккө, укумдан-тукумга ыйык кызматка дайындаган майлоо болот».

¹⁶Муса бардыгын Теңир буйругандай аткарды.

¹⁷Жыйын чатыры экинчи жылдын биринчи айынын биринчи күнү тургузулду.

¹⁸Муса жыйын чатырын тикти: анын таканычтарын орнотту, устундарын бекитти, шыргыйларын койду, мамыларын тургузду,

¹⁹анан жыйын чатырынын үстүнө жабуу жапты, Теңир буйругандай кылып, алардын үстүнө дагы бир жабуу жапты.

²⁰Мыйзамды алып, сандыкка салды, шыргыйларды сандыктын шакектерине киргизди, сандыктын үстүнө капкакты жапты.

²¹Сандыкты жыйын чатырынын ичине алып кирип, көшөгөнү илип, Теңир буйругандай, келишим сандыгын далдалап койду.

²²Жыйын чатырынын ичине, анын түндүк жагына, көшөгөнүн сыртына үстөлдү койду.

²³Теңир буйругандай, анын үстүнө Теңирдин алдына эки катар нан тизип койду.

²⁴Жыйын чатырынын ичине, үстөлдүн маңдайына, жыйын чатырынын түштүк жагына чырактанды койду.

²⁵Теңир буйругандай кылып, Теңирдин алдына чырактанды, анын үстүнө чырактарды койду.

²⁶Жыйын чатырынын ичине, көшөгөнүн жанына алтындан жасалган жыпар жыттуу зат түтөтүлүүчү жайды койду.

²⁷Теңир буйругандай, анын үстүндө жыпар жыттуу заттарды түтөттү.

²⁸Анан жыйын чатырынын кире беришине көшөгө илди.

²⁹Жыйын чатырынын алдына курмандык бүтүндөй өрттөлүүчү жайды койду, Теңир буйругандай, анын үстүнө бүтүндөй өрттөлүүчү курмандык чалып, нан курмандыктарын өрттөдү.

³⁰Анан жуунгучту жыйын чатыры менен курмандык бүтүндөй өрттөлүүчү жайдын ортосуна коюп, суу куюп койду.

³¹Андан суу алып, Муса, Арун жана Арундун уулдары колдорун, буттарын жуушту.

³²Теңир Мусага буйругандай, алар жыйын чатырына кирерде жана курмандык чалынуучу жайга жакындарда жуунушчу.

³³Жыйын чатыры менен курмандык чалынуучу жайдын тегерегин жабуу менен курчап, короонун кире беришине көшөгө илди. Ошентип, Муса бардык ишти бүттү.

³⁴Ошондо жыйын чатырын булут каптап, жыйын чатыры Теңирдин даңкына толду.

³⁵Муса жыйын чатырына кире алган жок, анткени чатырды булут каптап, Теңирдин даңкына толуп турган эле.

³⁶Булут жыйын чатырынан көтөрүлгөндө, Ысрайыл уулдары жолун улантышчу.

³⁷Эгерде булут көтөрүлбөсө, анда алар да, ал көтөрүлмөйүнчө, жолго чыгышчу эмес.

³⁸Анткени Теңирдин булуту Ысрайыл уулдарынын көз алдында жыйын чатырынын үстүндө күндүз булут болуп, түн ичинде от болуп, аларды жер кезип жүргөн учурунда коштоп жүрчү.