Read Кыргыз тилиндеги Библия, 2004 Аюб 11 Bible Online

Аюб 11 - Кыргыз тилиндеги Библия, 2004 bible

Аюб 11

¹Ошондо наамалык Сопар мындай деп жооп берди:

²«Көп сөз кантип жоопсуз калсын? Же көп сүйлөгөн адамдыкы эле туура бекен?

³Сенин маңызсыз сөздөрүң адамдардын оозун жаба алабы? Же ооз көптүргөн сөздөрүң үчүн сени уяткарып койчу адам жок бекен?

⁴Сен: “Менин оюм туура, Сенин алдыңда мен тазамын”, – дедиң.

⁵Эгерде Кудай сүйлөсө, Ал сага каршы сүйлөсө,

⁶сага адамдын акылы жеткис терең сырларын ачса, анда сен эки эсе жазаланат элең! Ошондуктан билип кой, Кудай сенин кээ бир мыйзамсыз иштериңди эсине алган жок.

⁷Кудайды сен изилдөөң менен таба аласыңбы? Кудуреттүү Кудайды толук түшүнө аласыңбы?

⁸Ал асмандан да бийик, эмне кыла аласың? Ал өлгөндөр жаткан жайдан терең, эмне биле аласың?

⁹Анын ченеми жерден узун, деңизден кенен.

¹⁰Эгерде Ал өтүп бара жатып эле кимдир бирөөнү туткундап алып, жазага тартса, Ага ким каршы чыга алат?

¹¹Анткени Ал калпычы адамдарды билет, мыйзамсыздыкты көрүп турат, анан кантип ага көңүл бурбай койсун?

¹²Жапайы эшектен адам төрөлбөгөндөй эле, акылсыз адам акылдуу боло албайт.

¹³Эгерде жүрөгүңдү өзгөртүп, Кудайга колдоруңду сунсаң,

¹⁴эгерде сенин колуңда күнөө болсо, бирок аны жоюп койсоң, өз чатырыңда мыйзамсыздыктын жашашына жол бербесең,

¹⁵анда жүзүң жарык болот, бекем болосуң, коркпойсуң.

¹⁶Ошондо сен кайгыны унутасың, аны агып кеткен суудай эскересиң.

¹⁷Өмүрүң чайыттай ачык күндөн да ачык болот. Таң сыяктуу агарасың.

¹⁸Тынч жашайсың, анткени үмүтүң бар. Сен коргоодосуң, ошондуктан тынч уктай берсең болот.

¹⁹Жатканда, сени эч ким коркутпайт. Көпчүлүк сенден ырайым издейт.

²⁰Ал эми мыйзамсыздар карайлап калышат, баш калкалар жайынан айрылышат, үмүттөрү үзүлөт».