Read Кыргыз тилиндеги Библия, 2004 Аюб 12 Bible Online

Аюб 12 - Кыргыз тилиндеги Библия, 2004 bible

Аюб 12

¹Аюб мындай деп жооп берди:

²«Чынында, силер, бар болгону, адамсыңар, акылмандыгыңар өзүңөр менен кошо жок болот!

³Менде да силердикиндей эле жүрөк бар. Силерден мен кем эмесмин. Муну ким билбейт?

⁴Өз досума шылдың болдум, Кудайга кайрылып жүргөн, Анын Өзүнөн жооп алып жүргөн мендей адил, кемчиликсиз адам күлкү болду.

⁵Тынч жашаган адам кырсыкты жек көрүү керек деп эсептейт, кырсык бутунан мүдүрүлгөнгө даярдалган деп ойлойт!

⁶Талап-тоноочулар өз үйлөрүндө тынч жашашат, Кудайды өз колуна көтөрүп жүргөнсүп, Аны каарданткандар да коопсуз жашашат.

⁷Чынында, жаныбардан сурасаң, ал сага үйрөтөт, асмандагы чымчыктан сурасаң, ал сага кабарлайт.

⁸Же болбосо жер менен маектешип көр, ал сага акыл-насаат айтат, деңиздеги балыктар да сага айтып беришет.

⁹Ушунун бардыгын көрүп туруп, муну Теңирдин колу жаратканын ким билбейт?

¹⁰Ар бир тирүү жандын жаны, ар бир адамдын руху Анын колунда.

¹¹Сөздү айырмалаган кулак эмеспи? Тамактын даамын билген тил эмеспи?

¹²Даанышмандык карыларда, акыл көп жашагандарда болот.

¹³Акылмандык менен күч Кудайда. Акыл менен кеңеш Анда.

¹⁴Ал кыйраткан нерсе кайра курулбайт. Ал камаган бошонбойт.

¹⁵Сууларды токтотуп койсо, бардыгы куурап калат. Коё берсе, жер көркүнө чыгат.

¹⁶Кудурет да, даанышмандык да Анда, адашкан адам да, адаштырган адам да Анын алдында.

¹⁷Ал кеңешчилерди акыл-эсинен ажыратат, сотторду акылсыз кылат.

¹⁸Ал падышаларды кишенден бошотот, алардын белдерин кур менен курчайт.

¹⁹Төрөлөрдү даражасынан ажыратат, эр жүрөктөрдүн күчүн майтарат.

²⁰Чечендерди тилинен, карыларды акылынан ажыратат.

²¹Атактууларды уятка калтырат, күчтүүлөрдү алсыратат.

²²Караңгы туңгуюктун түпкүрүн ачат, өлүм көлөкөсүн жарыкка чыгарат.

²³Элдерди көбөйтөт да жок кылат. Элдерди чачыратып жиберет да чогултат.

²⁴Эл башчыларын акылдан ажыратат, жолсуз чөлгө калтырат.

²⁵Алар жарыгы жок караңгы жерде сыйпалап басышат, мастардай темтеңдешет».