Read Кыргыз тилиндеги Библия, 2004 Аюб 13 Bible Online

Аюб 13 - Кыргыз тилиндеги Библия, 2004 bible

Аюб 13

¹«Мына ушунун баарын көзүм көрдү, кулагым укту, өзүм үчүн көңүлүмө түйүп койдум.

²Силер билгенди мен да билем, силерден кем эмесмин.

³Бирок мен кудуреттүү Кудай менен сүйлөшкүм келет, Аны менен талашып-тартышкым келет.

⁴Силер болсо жалганчысыңар. Бардыгыңар эч нерсеге жарабаган дарыгерсиңер.

⁵Унчукпай калсаңар кана! Силердин акылмандуулугуңар ошол болмок.

⁶Менин сөзүмө кулак салгыла, силерге каршы айта турган кебиме көңүл бургула.

⁷Кудай үчүн калп айтыштын кереги бар беле, Ал үчүн жалган сүйлөштүн зарылдыгы бар беле?

⁸Кудайга бет карамалык кылыштын кереги бар беле? Аны ушинтип жактоонун кереги бар беле?

⁹Ал силерди сынаса жакшы болот беле? Аны да адамды алдагандай алдай аласыңарбы?

¹⁰Тымызын эки жүздүүлүк кылсаңар да, Ал силерди катуу жазалайт.

¹¹Анын улуулугу силерди коркутпайбы, Анын коркунучу силерди каптабайбы?

¹²Силердин эскертүүңөр күлгө окшош. Силердин таяныч-чебиңер – ылай коргондор.

¹³Менин алдымда унчукпай тургула, башыма кандай күн түшсө түшсүн, мен сүйлөйүн.

¹⁴Эмне үчүн мен өз денемди өз тишим менен тиштегилешим керек, эмне үчүн өз жанымды өз колум менен кыйышым керек?

¹⁵Мына, Ал мени өлтүрүп жатат, бирок мен Андан үмүт кылам. Анын алдында өз жолумду коргосом эле болду!

¹⁶Ушунун өзү эле менин акталуум эмеспи, анткени эки жүздүү адам Анын алдына келбейт.

¹⁷Менин сөзүмдү кунт коюп уккула, менин түшүндүргөнүмө кулак салгыла.

¹⁸Мен өз ишимди сотко өткөрүүгө даярмын, анткени меники туура экенин билем.

¹⁹Менин айтканыма каршы чыга ала турган адам барбы? Эгерде бар болсо, мен унчукпай, өлүп калмакмын.

²⁰“Мага эки нерсени гана кылба, ошондо мен Сенин жүзүңдөн жашынбайм.

²¹Менден колуңду тарт, Сенин коркунучуң мени калтыратпасын.

²²Ошондо мени чакыр, мен Сага жооп берейин. Же мен сүйлөйүн, Сен мага жооп бер.

²³Менин канча кемчилигим, канча күнөөм бар? Айыбым менен күнөөмдү көрсөт!

²⁴Эмне себептен менден жүзүңдү жашырасың, эмне себептен мени Өзүңө душман санайсың?

²⁵Сен үзүлгөн жалбыракты кыйратып жаткан жоксуңбу? Куураган бир тал самандын артынан сая түшкөн жоксуңбу?

²⁶Анткени мага каршы ачуу айыптоолорду жазып жатасың, жаш кездеги күнөөлөрүмдү мойнума коюп жатасың,

²⁷буттарымды көзөнөк жыгач калканга салып жатасың, менин баскан изимди аңдып турасың, артымдан сая түшөсүң.

²⁸Мен болсо чириген нерседей жок болуп баратам, күбө жеген кийимдей болуп калдым.