Read Кыргыз тилиндеги Библия, 2004 Аюб 14 Bible Online

Аюб 14 - Кыргыз тилиндеги Библия, 2004 bible

Аюб 14

¹Аялдан туулган адамдын өмүрү кыска жана азапка толгон.

²Ал гүл сыяктуу чыгат да, соолуп, күбүлүп калат. Көлөкөдөй качат, токтобойт.

³Сен ушундай адамга да көзүңдү кадайсыңбы, мени Өзүң менен соттошууга алып барасыңбы?

⁴Таза эместен ким таза болуп төрөлсүн? Эч ким.

⁵Эгерде анын өмүрүн ченеп койсоң, ай-күндөрү Сенин колуңда турса, эгерде Сен анын өтө албаган чегин чектеп койсоң,

⁶анда андан жүзүңдү бур. Ал жалчынын күндөрүндөй болгон күндөрү бүткүчө, эс алып алсын.

⁷Даракта үмүт бар, ал кыйылса да, кайра өсөт, чырпыктары токтоосуз чыга берет.

⁸Эгерде анын жердеги тамыры картайып, дүмүрүн топурак басып катып калса да,

⁹сууну сезери менен, жаш чырпык чыгарып, жаңы отургузулган көчөттөй болуп, бутактарын жаят.

¹⁰Адам болсо өлөт, анан чирийт. Адам өлдү, эми ал кайда?

¹¹Көлдөн суулар агып кетет, дарыя соолуп, какшыйт,

¹²адам да жатса турбайт. Асман жок болмоюнча, ал ойгонбойт, уйкусунан турбайт.

¹³Оо, каарың тарап кеткенче, Сен мени өлгөндөр жаткан жайга бекитип, жашырып турсаң кана! Анан мага мөөнөт берип, ошондон кийин гана мени эстесең кана!

¹⁴Адам өлгөн соң, кайра жашамак беле? Анда мага берилген мөөнөт бүткөнчө, менин ордума келе турганды күтөр элем.

¹⁵Сен чакырсаң, мен Сага жооп берер элем. Ошондо Сен Өз колуң менен жаратканыңа ырайым кылар элең.

¹⁶Ошондо Сен менин кадамымды эсептер элең, күнөө кылып жатканымда карап турбас элең.

¹⁷Сен менин мыйзамсыздыгымды түрмөк кагазга жазып мөөр басып салар элең, менин айыбымды жаап салар элең.

¹⁸Бирок тоо кулап талкаланат, аска-зоо ордунан козголот.

¹⁹Суу таштарды жеп кетет, анын ташкыны жер топурагын жууп кетет. Сен адамдын үмүтүн да так ошондой жок кыласың.

²⁰Аны акырына чейин кысымга аласың, ал кетет. Жүзүн өзгөртүп, аны кетиресиң.

²¹Балдары ардакталып жатабы, ал аны билбейт; кор болуп жатабы, ал аны сезбейт.

²²Бирок анын денеси сыздап, жаны кыйналып жатат”».