Read Кыргыз тилиндеги Библия, 2004 Аюб 15 Bible Online

Аюб 15 - Кыргыз тилиндеги Библия, 2004 bible

Аюб 15

¹Теймандык Элипаз мындай деп жооп берди:

²«Акылман маңызы жок билим менен жооп бермек беле? Кардын ысык желге толтурмак беле?

³Пайдасыз сөздөр менен, күчү жок кеп менен актанмак беле?

⁴Кудайдан коркконду да унуттуң, Кудайга сүйлөгөндү да оңой көрүп жатасың.

⁵Күнөөң оозуңду ушунчалык күүлөгөн экен, сен амалкөй адамдардын тилин тандап алдың.

⁶Сени мен эмес, өз оозуң айыптап жатат, өз тилиң өзүңө каршы сүйлөп жатат.

⁷Сен эмне, биринчи адам болуп туулдуң беле? Адырлардан мурда жаралдың беле?

⁸Сен эмне, Кудайдын кеңешин угуп, акылмандыкка ээ болуп калдың беле?

⁹Биз билбегенди сен билесиңби? Биз түшүнбөгөндү сен түшүнөсүңбү?

¹⁰Арабызда атаңан да улуу, ак сакалдуу да, кары да бар.

¹¹Сага Кудайдын сооротуусу аздык кылабы? Сен ушуну да билбейсиңби?

¹²Жүрөгүң сени кайда ээликтирип жатат, эмнеге мынчалык текебер карайсың?

¹³Эмнеге Кудайга каршы рухуңду багыттайсың? Мындай сөздөрдү кантип оозуңа алдың?

¹⁴Таза болгудай, адам ким? Аялдан төрөлгөн адил болмок беле?

¹⁵Ал Өз ыйыктарына да ишене албайт, Анын алдында асман да таза эмес.

¹⁶Адилетсиздикти суудай ичкен адам андан бетер таза эмес, ыпылас.

¹⁷Мен сүйлөйүн, сен кулак сал. Көргөнүмдү сага айтып берейин.

¹⁸Акылмандар аталарынан уккандарын жашырышкан эмес.

¹⁹Жер аларга гана берилген, алардын арасында бөлөк-бөтөн элдер болгон эмес.

²⁰Мыйзамсыз өмүр бою өзүн өзү кыйнап өтөт, зулумга өмүр жылдары жашыруун.

²¹Анын кулагына үрөй учурган дабыштар угулат. Бейкапар жашап жатканда, ага кыйратуучу келет.

²²Караңгылыктан кутуларына ишенбейт. Өзүн кылыч күтүп турганын билет.

²³Бир сындырым нан үчүн анын кыдырбаган жери калбайт. Өзү үчүн караңгылыктын күнү даярдалганын билет.

²⁴Жокчулук менен кысымчылык анын жүрөгүнүн үшүн алып, аны согушка камданган падышадай басып алат.

²⁵Анткени ал Кудайга каршы кол сунуп, кудуреттүү Кудайга каршы чыкты.

²⁶Калың калканын алып, кекирейип, Ага каршы бет алды.

²⁷Анткени анын бетин май басты, сандары жоонойду.

²⁸Ал бүлүнгөн шаарларды, урап түшөрүнө аз калган ээн үйлөрдү турак кылат.

²⁹Ал бай болбойт, анын мал-мүлкү тура бербейт, тапканы жер жүзүнө тарабайт.

³⁰Караңгылыктан качып кутулбайт. Анын көчөттөрүн жалын жалмайт, аны Өзүнүн оозунун жели менен алып кетет.

³¹Адашкан адам курулай убаракерчиликке таянбай эле койсун, анткени анын шыбагасы да курулай убаракерчилик болот.

³²Ал мезгилсиз өлөт, анын бутагы көгөрбөйт.

³³Ал жүзүм сабагы сыяктуу, бышпаган мөмөсүн силкип салат, зайтун дарагы сыяктуу, гүлүн күүп салат.

³⁴Кудайсыздардын үйү ушинтип кыйрайт, паракордун үйүн өрт жалмайт.

³⁵Анын боюна кыянаттык бүтүп, жалгандык төрөдү, курсагы алдамчылык даярдайт».