Read Кыргыз тилиндеги Библия, 2004 Аюб 16 Bible Online

Аюб 16 - Кыргыз тилиндеги Библия, 2004 bible

Аюб 16

¹Аюб мындай деп жооп берди:

²«Мен мындайдын далайын уккам. Баарыңар эч нерсеге жарабаган сооротуучусуңар.

³Маанисиз сөзүңөрдүн аягы болобу? Ушинтип жооп берүүңө эмне түрткү болду?

⁴Эгерде силер менин ордумда болсоңор, мен да силердей эле сүйлөмөкмүн. Силерге каршы сөз жаадырып, башымды чайкап турмакмын.

⁵Силерди сөзүм менен кубаттап, оозумдун кыбыроосу менен сооротор элем.

⁶Айткан менен азабым азайбайт, унчукпай койсом да, андан арылбайм.

⁷Бирок азыр Ал мени алсыратып бүттү. “Сен менин бүт үй-бүлөмдү кыйраттың.

⁸Мага каршы күбө катары бетиме бырыш түшүрдүң. Менин жабыркаганым өзүмө каршы чыгып, мени тайманбай жемелеп жатат”.

⁹Анын каары кыйнап, мени менен касташып жатат. Мага тиштерин кычыратып жатат. Душманым менден тикирейген көзүн албайт.

¹⁰Мага азуусун араандай ачышты, мени шылдыңдап, жаакка чапкылап жатышат: баары мага каршы сүйлөшүп алышкан.

¹¹Кудай мени мыйзамсыздардын колуна салып берди, кара ниет адамдардын колуна ыргытты.

¹²Мен тынч жашап жаткам, бирок Ал мени силкилдетти. Желкемен кармап урду, Өзүнө бута кылып койду.

¹³Анын жаачылары мени курчап алышты. Ал кардымды жарды, аяган жок, өтүмдү жерге төктү.

¹⁴Мени кайра-кайра тешкилеп жатат, мени көздөй жоокердей атырылып келе жатат.

¹⁵Денеме зумбал кийип, башыма топурак жаздандым.

¹⁶Ыйдан бетим кызарды, кабагымда – өлүм сөлөкөтү.

¹⁷Ошондой болсо да эч кимге зордук көрсөткөн жокмун, сыйынуум да таза.

¹⁸Оо жер! Менин канымды жашыра көрбө, менин муң-зарыма орун болбосун.

¹⁹Азыр менин Күбөм асманда, менин Коргоочум жогоруда!

²⁰Көп сүйлөгөн досторум! Көз жашым Кудайга төгүлүп жатат.

²¹Оо, адам баласы өз жакыны менен талашып-тартышкандай, Кудай менен талашып-тартыша алса кана!

²²Анткени менин көрөр күнүм бүттү, келбес сапарыма кеткени турам.