Read Кыргыз тилиндеги Библия, 2004 Аюб 17 Bible Online

Аюб 17 - Кыргыз тилиндеги Библия, 2004 bible

Аюб 17

¹Алдан тайдым, өмүрүмдүн шамы өчүп баратат, көр оозунда турам.

²Алардын шылдыңы болбогондо, талаш-тартышта солк этпей туруп берет элем.

³“Мага болуш, мен үчүн Өзүңдүн алдыңда Өзүң кепилдикке өт! Болбосо ким мага кепил болот?

⁴Анткени Сен түшүнбөсүн деп, алардын акылын жаап салдың, ошондуктан алардын жеңишке жетишине жол бербейсиң”.

⁵Досторун душманга олжо кылган адамдын балдарынын көзү агып калат.

⁶Ал мени элге лакап, күлкү кылды.

⁷Кайгыдан көздөрүм тунарды, бүт мүчөм сөлөкөт болуп калды.

⁸Бул тууралуу адил адамдар таң калышат. Айыпсыз адам эки жүздүү адамга кыжырданат.

⁹Бирок адил адам өз жолун бек кармайт, колу таза адам барган сайын күч алат.

¹⁰Баарыңар чогулуп келип сүйлөсөңөр да, араңардан акылманды таппайм.

¹¹Менин өмүрүм өттү. Жүрөгүмдүн энчиси болгон ойлорум кыйрады.

¹²Алар болсо түндү күнгө айланткысы, жарыкты караңгыга жакындаткысы келет.

¹³Канчалык күтсөм да, менин үйүм – өлгөндөр жаткан жай. Мен төшөгүмдү караңгы жерге төшөйм.

¹⁴Көрүмө: “Сен менин атамсың”, – дейм, куртка: “Менин энемсиң да эжемсиң”, – дейм.

¹⁵Ушундан кийин мен эмнеден үмүттөнөм? Менин күткөнүмдү ким көрөт?

¹⁶Ал үмүт мени менен кошо өлгөндөр жаткан жайга түшүп, мени менен бирге топуракка жатат».