Read Кыргыз тилиндеги Библия, 2004 Аюб 18 Bible Online

Аюб 18 - Кыргыз тилиндеги Библия, 2004 bible

Аюб 18

¹Шухтук Билдат мындай деп жооп берди:

²«Ушундай сөзүңөрдү качан токтотосуңар? Жакшылап ойлонгула, анан сүйлөйбүз.

³Эмне үчүн биз айбан катары эсептелишибиз керек? Эмне үчүн биз сенин алдыңда кемсинтилишибиз керек?

⁴Оо, сен, ачууланып, өзүн азапка салган неме! Сен үчүн жер ээн калмак беле, сен үчүн аска-зоо ордунан козголмок беле?

⁵Ооба, мыйзамсыздын жарыгы өчөт, анын отунан учкун калбайт!

⁶Чатырындагы жарык караңгылайт, анын үстүндөгү шамы да өчөт.

⁷Анын кудуреттүү кадамы кыскарат, өзүнүн ою өзүн кулатат.

⁸Анткени ал өз буту менен торго түшөт, тордун үстүндө басат.

⁹Анын буту тузакка түшөт, ошондо тоноочу аны кармап алат.

¹⁰Ал үчүн жерге тузак жашыруун тартылган, жолуна капкан коюлган.

¹¹Бардык тарабынан коркунучтар анын үрөйүн учуруп, ары-бери алдастатат.

¹²Ачкалыктан алы кетет, өлүм анын жанында даяр турат.

¹³Анын дене мүчөлөрүн оору жейт, анын мүчөлөрүн эң жаман оору мүлжүйт.

¹⁴Үмүтү чатырынан куулат, бул аны үрөй учурган коркунучтар падышасына түшүрөт.

¹⁵Анын чатырына башка бирөөлөр кирет, анткени ал эми аныкы эмес. Анын үйүнө күкүрт чачылат.

¹⁶Түбүндөгү тамыры кургайт, үстүндөгү шак-бутактары соолуп калат.

¹⁷Анын аты жер үстүнөн өчөт, анын ысымы аянтта оозго алынбай калат.

¹⁸Аны жарыктан караңгылыкка кууп, жер үстүнөн жок кылышат.

¹⁹Өзүнүн элинде анын уулу да, небереси да болбойт, анын турагында эч ким калбайт.

²⁰Ал жөнүндө укканда, кийинки муундун үрөйү учат, замандаштары калтырап турушат.

²¹Мыйзамсыздын өмүрү мына ушундай, Кудайды билбегендин тагдыры мына ушундай».