Read Кыргыз тилиндеги Библия, 2004 Аюб 19 Bible Online

Аюб 19 - Кыргыз тилиндеги Библия, 2004 bible

Аюб 19

¹Аюб мындай деп жооп берди:

²«Качанкыга чейин жанымды кейите бересиңер? Качанкыга чейин мени сөзүңөр менен кыйнай бересиңер?

³Мына, мени ушуну менен он мертебе маскара кылдыңар, мени кыйнап-кыстагандан уялбадыңар.

⁴Эгерде мен чындыгында эле кылмыш кылсам, анда менин күнөөм өзүмдө калат.

⁵Эгерде өзүңөрдү менден жогору койгуңар келсе жана мени маскара болгонум үчүн жемелегиңер келсе,

⁶анда мени Кудай жыкканын, туш-тушума Өзүнүн торун жайып койгонун билгиле.

⁷Ошондуктан мен: “зордук!” – деп кыйкырып жатам, бирок эч ким укпайт. Жардамга чакырып жатам, бирок акыйкаттык жок.

⁸Ал менин жолумду бөгөдү, ошондуктан мен өтө албай жатам, менин жолума караңгылык түшүрдү.

⁹Менден атак-даңкты буруп кетти, башымдан таажымды чечип алды.

¹⁰Мени бүт бардыгынан ажыратты, өзүм да бүтүп баратам. Yмүтүмдү дарак сыяктуу түбүнөн омкорду.

¹¹Мага Өзүнүн каарын чачып, мени Өзүнүн кас душманы катары эсептеди.

¹²Анын түмөн кошууну биригип келди, багытын мага буруп, менин чатырымды курчап алышты.

¹³Ал менден бир туугандарымды алыстатты, мени билгендер менден оолактап калышты.

¹⁴Жакындарым мени таштап кетишти, тааныштарым мени унутуп коюшту.

¹⁵Yйүмдөгү келгиндер жана күңдөрүм мени бөтөн адам катары эсептешет. Аларга мен жат кишидей болуп калдым.

¹⁶Кызматчымды чакырсам, ал мага жооп бербейт. Мен ага жалынып-жалбарышым керек.

¹⁷Дем алганым өз аялыма жакпай калды, өзүмдөн чыккан балдарым үчүн ага жалынышым керек.

¹⁸Атүгүл, мени кичинекей балдар да жек көрүшөт. Өйдө турсам, алар мени шылдың кылышат.

¹⁹Ынак досторум да менден жийиркенип калышты. Жакшы көргөн адамдарым да мага каршы чыгып калышты.

²⁰Сөөктөрүм денем менен териме жабышып, тишимдин бүйлөсү менен гана калдым.

²¹Ырайым кылгыла мага, досторум, мага силер ырайым кылгыла, анткени мага Кудайдын колу тийди!

²²Эмнеге силер да мени Кудай сыяктуу куугунтуктайсыңар, эмнеге этиме тойбой жатасыңар?

²³Оо, менин сөздөрүм жазылып калса кана! Алар китепке жазылса кана!

²⁴Коргошунга темир кескич менен чегилсе кана! Аска ташка түбөлүккө басылса кана!

²⁵Мен болсо Куткаруучум тирүү экенин билем, Ал акыркы күнү менин чирип бара жаткан теримди топурактан кайра тургузат.

²⁶Мен өз денемде Кудайды көрөм.

²⁷Мен Аны өзүм көрөм. Башка бирөөнүн көзү эмес, Аны өзүмдүн көзүм көрөт. Көкүрөгүмдө жүрөгүм эрип бара жатат!

²⁸Силер: “Биз аны эмнеге куугунтукка алып жатабыз?” – деп айтууңар керек эле. Менден кыянаттыктын тамыры табылгандай карайсыңар да.

²⁹Кылычтан корккула, анткени кылыч жалгандан өч алат. Сот бар экенин билип койгула».