Read Кыргыз тилиндеги Библия, 2004 Аюб 20 Bible Online

Аюб 20 - Кыргыз тилиндеги Библия, 2004 bible

Аюб 20

¹Наамалык Сопар мындай деп жооп берди:

²«Өзүмдүн ойлорум мени жооп берүүгө түртүп жатат, ошондуктан мен аны билдирүүгө шашылам.

³Мени ыза кылган жемени уктум, мен үчүн акыл-эсим жооп берет.

⁴Сен эмне, байыртадан бери, адам баласы жер бетине коюлгандан бери эмне болгонун билбейсиңби?

⁵Мыйзамсыздардын шаттыгы убактылуу экенин, эки жүздүүнүн кубанычы көз ирмем экенин билбейсиңби?

⁶Анын даражасы асманга жетсе да, төбөсү булуттарга тийсе да,

⁷өзүнүн заңына окшоп, ал түбөлүккө жоголот. Аны көргөндөр: “Ал кайда?” – дешет.

⁸Көргөн түштөй көздөн кайым болот, аны таппай калышат. Ал түнкү көрүнүштөй жоголот.

⁹Аны көргөн көз аны экинчи көрбөйт, ал отурган орун аны билбей калат.

¹⁰Анын уулдары жакырлардан кайыр сурап калат, ал уурдагандарын өз колу менен кайрып берет.

¹¹Анын сөөктөрү жаштыктын күчүнө толгон, бирок ал аны менен бирге топуракка жатат.

¹²Эгерде кыянаттык анын оозунда балдай таттуу болсо, ал аны тилинин астында жашырып турса,

¹³аны сактап жүрсө, таштап салбай, оозунда кармап жүрсө,

¹⁴анда анын ушул тамагы ичинде уулуу жыландын уусуна айланат.

¹⁵Ал жутуп алган байлыгын кайра кусат. Кудай аны анын курсагынан чыгарат.

¹⁶Ал жыландын уусун соруп жатат, аны уулуу жыландын тили өлтүрөт.

¹⁷Ал бал менен сүт аккан өзөндөрдү, дарыяларды көрбөй өтөт.

¹⁸Тапканын кайтарып берет, жутпайт. Анын алган жазасы да байлыгына жараша болот, кубанбайт.

¹⁹Анткени ал жакырларды эзген, куру кол коё берген, өзү курбаган үйлөрдү тартып алган.

²⁰Курсагы тойгонун билбеген, ач көздүгүнөн эч нерсени аяган эмес.

²¹Анын соргоктугунан эч нерсе качып кутулган эмес. Ошон үчүн анын бактысы туруктуу эмес.

²²Ашып-ташыган молчулук болуп турса да, ал кысталышта калат. Ыза болгон ар ким ага кол көтөрөт.

²³Ал курсагын толтургандан кийин, Кудай ага Өзүнүн каарын чачат да, анын денесине дарт жаадырат.

²⁴Ал темир куралдан качып кутулса, аны жез жебе тешип өтөт.

²⁵Жебени сууруп алайын десе, ал денесин тешип чыгат, жарк этип, өтүн тешип чыгат. Аны өлүм коркунучу басып калат!

²⁶Бардык караңгы нерселер анын ичинде жашырылган. Аны эч ким тутантпаган от жалмайт. Анын чатырында тирүү калганын да кырсык басат.

²⁷Анын мыйзамсыздыгын асман ачат, жер ага каршы чыгат.

²⁸Анын үйүнө жыйганы жок болот, Кудайдын каары келген күнү бардыгы агып жок болот.

²⁹Мыйзамсыз кишиге Кудай берген үлүш ушул, кудуреттүү Кудай бөлүп берген мурас ушул».