Read Кыргыз тилиндеги Библия, 2004 Аюб 21 Bible Online

Аюб 21 - Кыргыз тилиндеги Библия, 2004 bible

Аюб 21

¹Аюб мындай деп жооп берди:

²«Менин сөзүмдү кунт коюп уккула, силердин укканыңар менин көңүлүмдү жубатат.

³Чыдап тургула, мен сүйлөйүн. Мен айтып бүткөндөн кийин, шылдыңдай бергиле.

⁴Мен адамга даттанып жатамбы? Анан кантип мен жүрөкзаадалык кылбайын?

⁵Мени карагыла, үрөйүңөр учсун. Колуңар менен оозуңарды жапкыла.

⁶Эстесем эле селт этем, денемди калтырак басат.

⁷Эмне үчүн мыйзамсыздар жашап, карылыкка жетишет, анан калса, күүлүү-күчтүү?

⁸Балдары тегерегинде, неберелери маңдайында.

⁹Yйлөрү коркунучтан коопсуз, алардын үстүндө Кудайдын таягы жок.

¹⁰Алардын букалары тукум берет, уругун бекер агызбайт. Алардын уйлары тууйт, музоо салбайт.

¹¹Өз балдарын малды жайытка чыгаргандай чыгарышат, алардын балдары так секирип ойношот.

¹²Дап менен кыл аспаптын коштоосунда ырдашат, чоордун коштоосунда көңүл ачышат.

¹³Күндөрүн бактылуу өткөрүшөт да, өлгөндөр жаткан жайга көз ирмемде киришет.

¹⁴Ошондой болсо да алар Кудайга мындай дешет: “Бизден ары кет, Сенин жолдоруңду билгибиз келбейт!

¹⁵Биз кызмат кылгыдай, кудуреттүү Кудай ким болуп калыптыр? Ага кайрылганда эмне пайда?”

¹⁶Көрдүңбү, алардын бактысы өздөрүнүн колунан чыккан эмес. Мыйзамсыздардын кеңеши менден алыс болсун!

¹⁷Мыйзамсыздардын чырагы кээде эле өчөт, алардын башына кээде эле мүшкүл түшөт, Кудай Өзүнүн каары менен аларды кээде эле кайгыга салат.

¹⁸Алар шамал алдындагы самандай, куюн учурган жука кабыктай болушу керек.

¹⁹“Кудай алардын ордуна балдарын жазалайт”, – дейсиң. Ал өз күнөөсүн билиш үчүн, Кудай анын өзүн жазаласын.

²⁰Ал өз жазасын өзү тартсын, кудуреттүү Кудайдын каарын ал өзү ичсин.

²¹Анткени анын көзү өткөндөн кийин, үй-бүлөсүнө кандай тиешеси бар?

²²Кудай асмандагыларды да жазага тартып жатса, ким Ага акыл үйрөтө алат?

²³Кээ бирөөлөр өз күчү толуп турганда, кайгы-капасыз тынч өлүшөт.

²⁴Анын ичеги-карды майлуу, анын жилиги чучуктуу.

²⁵Кээ бирөөлөр жакшылык көрбөй, жаны кайгыга батып өлүшөт.

²⁶Бирок экөө тең топуракка жатат, аларды курт каптайт.

²⁷Мага каршы ойлоп тапкан оюңар менен амалыңарды билем.

²⁸“Төрөнүн үйү кайда? Мыйзамсыздар жашаган чатыр кайда?” – дейсиңер.

²⁹Силер саякатчы адамдардан сураган жок белеңер? Алардын байкоолору менен тааныш эмессиңерби?

³⁰Зулумга өлөр күнү да ырайым болорун, каар күнү ал четте каларын билбейсиңерби?

³¹Ага жолун ким көрсөтөт? Кылган иши үчүн анын жазасын ким берет?

³²Аны көргө узатышат, анын мүрзөсүнө сакчы коюшат.

³³Ага өрөөндүн кесек таштары да жакшы көрүнөт, анын артында толгон эл баратат, алдында бараткандарга сан жетпейт.

³⁴Мени курулай сөздөр менен соороткуңар барбы? Силердин жообуңар жалаң калп болуп жатат».